香港究竟有幾耐冇發生過打劫金舖或銀行呢類型大茶飯罪行？因為收租，好過打劫啦。
小人物的患難見真情
15年前的《亞李．爸爸兩個大盜》，就借打劫過橋，訴說兩個失意香港小人物的患難見真情小故事。
鄺文偉，在港產片盛世的80年代開始擔任編劇，90年代電影市道由盛轉衰時專門編寫一些格局細的電影，像陰曆系列鬼片（《七月十四》、《二月三十》、《正月十五之一生一世》，又例如《終生大事》及《999誰是兇手》，以上各齣在整體上或許都存在瑕疵和簡陋，卻往往交出一些精彩的細節處理和人物描寫（反而80年代的港產片，偏向重視扭橋和交代故事情節），對那個港產片末世也不時帶有自省式的嘲諷。
《亞李．爸爸兩個大盜》是鄺文偉首部自編自導作品，實際票房我不太清楚（但應該唔會高得去邊，因為當年冇乜邊齣港產片票房能夠高得去邊……），但我真的極愛這部1998年電影。
來到人生轉折位的自我發現
最勁的喜劇，是會令你笑住喊，到最後唔知笑好定喊好，只能用一聲「唉」來總結成件事。
1.「李家成」，銀行低級職員，有個住老人院的阿媽，明明心儀一名女同事但又唔敢表白，只能眼白白睇住禽獸高層終日在性騷擾對方；冇朋友的他，因為被一個（所謂朋友介紹的）所謂朋友出賣，欠下三百萬巨債，最後連份工都冇埋。「肥佬黎」，有個朵叫「爸爸」，過氣蠱惑仔，行蠱惑的年代沒有任何戰績；本來有一個固定女友，但最後女友頂佢唔順，決定分手。
2.演「李家成」的是張達明，黃子華則演「肥佬黎」。可以說，《亞李．爸爸》由始至終的賣點就是佢同佢，每一場對手戲，猶如一次棟篤笑雙打（事實是幾乎每場戲都必定見到兩位）。
3.成本，應該是幾低的，由場景到道具到服裝以至燈光所透出的那份簡陋是掩不住的——唯一一件稱得上精緻的道具，是兩件用汽水罐handmade而成的避彈衣——製作者是黎耀祥。
4.黎耀祥是黃子華角色行蠱惑年代的唯一一條。應該是全片最精明最叻睇形勢的一個下靶角色，因為黃子華這大佬太廢，廢到連劈友都唔敢，黎耀祥才可以冇穿冇爛；又因為黃子華鍾意半途而廢的個性，讓黎耀祥得以全盤接收其報紙檔，有份穩定收入。但佢份人稱得上衰嗎？又唔算，只是一個像他也像你和我的現實香港人吧。仲有，囉唆都要講，黎耀祥在電影圈打拚的年代真的交出不少精彩演出，九成都比後視帝時代的好。
5.黃子華和張達明打算打劫銀行搵一筆就算數，但對這兩個零經驗罪犯，打劫實在是一件……都唔知點樣形容好的事，所以，需要練習。大半齣戲，就是交代二人打劫前的種種演習：練打人、學壯膽、諗定校腳方法、買槍等等，而笑料，就主要在上述過程中出現，但更重要是——笑的過程中我們發現黃子華是個講咗等於做咗、所以成世人連一件事都完成不了的人，張達明則一直在鞭策自己一直在升level，最後發現自己原來並不是一條被注定的廢柴。
6.高潮，自然是那一場打劫戲。這場戲依然很簡陋，但又笑到我爆廠，更正是打劫後的一場街頭追逐——羅蘭姐這位警花，拚命地追足九條街扯晒蝦都要捉拿到亞李和爸爸——這處理，鄺文偉根本就是在戲謔他有份創造的龍婆。
7.這一次經過不周詳計劃的械劫案，是以「好成功咁救番一個差婆」作結……唉，不劇透了。
8.這其實是有關兩個本質善良到根本做唔出壞事的小人物，在人生某個轉折位的一次自我發現，笑，也是苦笑——但未竟全功，真正再進一步是2002年《一蚊雞保鑣》，人性位去得更盡，對回歸後香港的隱喻也更絕——在這個不知所謂的年代大抵我們都是被注定的下靶，但下靶不下靶，應該是跟人格無關的。
有人認為佔中猶如打劫金舖，所以聯袂走去報警，舉報佔中三子涉唆使別人犯法。他們有可能睇得太多《Minority Report》，才有樣學樣去把一件根本未曾發生的（事情先定性為）罪行，根據他們的邏輯去制止。
既然連（未發生的）佔中都可以被視為打劫，那麼，（已發生的）高官明明做唔到嘢但繼續心安理得地穩袋人工，又係咪擺明在向作為社會下靶的市民進行集體詐騙？
沒有留言:
發佈留言