2015年12月31日星期四

ROBOCAT 511


浪漫月巴睇90s(7):子華一思考,人類就發笑



























這夜,我又翻炒了一次《跟住去邊度》。黃子華90年代思想最深邃的一個棟篤笑。

1.當然你有權反對。

2.又或,你已經忘記了那個在90年代透過讓我們發笑而冒起、為了Keep住讓我們發笑而努力掙扎的黃子華。

3.首次欣賞黃子華演出,是1992年的《神算》,即(黃子華冇諗過係由)Leon做男主角嗰套。但Sorry,齣戲我其實覺得OK悶,悶不在故事,是許冠文的喜劇節奏在當年已有點不合時宜,而當年的Leon又擺明不是搞笑材料……結果我的目光只能放在方剛和黃子華——方剛,我向來熱愛他的奔放(其實是狂放)演出風格;黃子華呢,只覺得呢條友賤得嚟又幾好笑喎,根本不知道他是乜水,不知道他有份編劇,更加不知道他是因為《娛樂圈血肉史》而令許冠文主動搵佢……

4.第二次欣賞黃子華演出,是《棟篤笑雙打之玩無可玩》,即拍住張達明那一個——不是入場睇,而是透過TBB的失驚無神轉播剪輯版。記得當時的我一路睇一路笑,笑到拍晒手恍如癲咗嗰隻。

5.後來我添置了一部具有播放VCD功能的Desktop,除了用來播放各類型高級成人藝術動作電影,還有黃子華頭三個棟篤笑:《娛樂圈血肉史》、《色情家庭》、《跟住去邊度》。有個說法:任何創作人在第一個創作裡總是難免講自己,從個人經驗 / 歷出發,《娛樂圈血肉史》交代的便是黃子華的一段過去,一段好想做演員偏偏做唔到但又不願放棄的過去。明明很悲涼,卻被黃子華化成一連串自嘲,一連串好笑到極端殘忍的自嘲,我們笑得愈大聲,對作為當事人的他便愈殘忍。我認,就是這種自嘲的殘忍,令我深深愛上黃子華(當時讀了一點哲學,尤其愛那個「李小龍識功夫 + 讀哲學所以拍動作片,佢唔識功夫 + 讀哲學所以拍文藝片」的錯誤邏輯推演示範)。

6.至於《色情家庭》,我冇乜印象。對於《跟住去邊度》,我就好深印象——深印象在開波15分鐘全場只有零星笑聲,但當逐漸進入主題,觀眾開始由冷漠到勁笑——同而家好唔同,現在去睇黃子華棟篤笑,係預咗好笑,黃子華出場連嘢都未講只消轉個圈,全場已經笑咗先;當年去睇黃子華棟篤笑,係好奇,睇吓係咪真係咁好笑先?於是形成了一個笑的防護罩,想我笑?冇咁易。的確頗衰格,亦有點殘忍。

7.由個人奮鬥辛酸的殘忍自嘲到展示人生方向的深邃和虛無後,97,終於來到。《秋前算帳》,大陸收番香港前三個月,說「全港市民熱烈慶祝回歸」呢十個字,有八個字係呃人……同時陳述了一遍溫水煮蛙的預言,而我們只識笑,只覺得是一個玩笑……世紀末的《拾下拾下》,是黃子華給他本人和香港人的一次總結,原來我們活在香港這個經濟城市,作為經濟動物,所秉持的就只能是「搵食啫~犯法呀?我想㗎!?」的精神。

8.然後,不需要事隔多年,好多人已經身體力行去證明,證明他們為了搵食,可以變異成另一個人,一個令你咬牙切齒的人,畢竟令人咬牙切齒不屬違法。至於當中是否隱含了一種「我想㗎!?」的無奈?謎。

9.人類都係傾向麻木,唔只係香港人問題——基本上人類傾向於保護自己,咪麻木多啲囉,而香港呢個環境就更加需要去麻木,所謂嘅麻木,包括好多嘢,譬如良知、公義。某程度嘅麻木係生存嘅本能。——黃子華在97年某一集《鏗鏘集》訪問中咁講。原來我咁愛子華,是愛他的不麻木;因為他不麻木,對塵世間人和事的荒謬還有感覺,感覺不一定下下都要直筆甩地吶喊,喊出的大可以化成一個個玩笑,笑到你淚流不止。

10.黃子華的玩笑,由一開始就墊著一層悲。愈好笑愈悲涼,因為世間如此。
(原文刊於am730)

2015年12月30日星期三

食到無窮Fat自多——自省對話錄






















古語有云:吾日三省吾身。
黐線。現代人生活步伐急促,加上又要忙於食Buffet,省到半嘢已經難得。

但一年一省,還是可以。尤其一年將盡時,更加是自省的好時光,反問自己過去一年(冇)做過乜、多少快樂與哀愁,以及有幾多逆來順受。以下是一個「食到無窮Fat自多」的月巴佬自省過程。為求懶有趣味,本文將採用一種嶄新的精神分裂寫作手法,亦即自問自答。

月:最近忙乜?
巴:寫paper寫paper寫paper寫paper寫paper寫paper寫paper寫paper寫paper寫paper……
月:Well,其實你答一次便可以。感覺如何?
巴:好正好正好正好正好正好正好正好正好正真係好正總之就係好正!
月:寫paper需要睇好多書嗎?
巴:幾本總需要吧。畢竟能力所限,唔似得某啲人咁掂,我一日頂籠只能睇三十頁學術書籍……最衰寫paper唔准用雜誌作為參書考目,嘿,抵特首叫啲商家佬唔好捐錢俾大學。但如果班人真係咁聽話,又算不算是另一種形式的官商勾結?
月:OK……可以交代一下讀書的理由嗎?
巴:因為我唔叻。
月:點樣謂之叻?
巴:好似阿叻。但當我知道阿叻學歷不高時,我立即後悔,早知去報國力書院或傳說中的蘇文大學。
#########
月:好似問極都只在邊皮徘徊,不如轉問其他:2015你最難忘的一個人是?
巴:太多,過去一年實在太多出類拔萃到我難忘的人了,如果一定要講一個,盧寵茂。他的所作所為所言令我明白到,強如醫生,讀過咁多書,一樣會受傷,受傷時一樣渴望別人慰問,如果得不到預期的慰問,仲會識嬲,實在是一個性情中人。
月:性情中人是咁解的嗎?
巴:說到性情中人,其實我又何嘗不是?過去我會為自己爆粗而歉疚,現在不會了,冚家……
月:有沒有難忘的說話?
巴:官.到.無.求.膽.自.大!過去一年高官們都好大膽,大膽地用公帑,大膽地頻頻外訪。
#########
月:你似乎講來講去都是別人的事,但現在明明是進行自我反省。
巴:在這個官到無求膽自大的年頭再配合性情中人和容易受傷的醫生及阿叻諸如此類出類拔萃人士夾擊的情況下我依然食得屙得瞓得翻瞓亦得,我認為自己已經能人所不能。
月:感覺好逆來順受。
巴:有啲上一代人講,因為他們逆來順受,才能擁有今日成就。
月:但你是嗰啲上一代嗎?嗰啲上一代同你有親嗎?嗰啲上一代有So過你嗎?
巴:嗰啲上一代有獅子山精神嘛……
月:獅子山只是一座咁啱望落狀似Lion的山,但無論似乜,都只是一座山,山只是山,甚麼精神都只是嗰啲上一代人加落去;精神再慢慢凝固成一個規訓式緊箍咒,箍實你呢一代、下一代、下下一代,直到永遠。
#########
巴:嗚嗚……咁哪一天我們會飛?
月:不如問哪一天佢哋先捨得死。
巴:而偏偏佢哋的人生超級續航。
月:一聽到呢四粒字即刻想高歌一曲今天我……
巴:Hey唔該你咪再唱。年尾流流我唔想發火。
月:最後一條:你交咗稅未?
巴:頂頂頂頂頂!今天我……預祝大家新年快樂。
(原文刊於am730)

ROBOCAT 510


2015年12月24日星期四

浪漫月巴睇90s(6):90年代後半OK很美,只因有妳。



























估不到,事隔多年後,我會再次狂聽Kelly的歌。事情是這樣開始的……

1.冬至夜,要開夜。同事F跟我說:聽晚我去睇Kelly演唱會喎——同一時間同事B也說:咦我又係聽晚睇喎。而我只能說一聲:哦。

2.同事F & B先後收工。我需要留多陣。突然心血來潮,想上YouTube搵一隻歌聽,一隻我N年冇聽但十幾年前成日聽和唱的歌:Kelly的《懦弱》。

3.Wow,原來真係有,而且有兩個版本,一個是TBB自家製MV版,一個是用《天涯海角》電影片段剪輯而成的卡拉OK版(但由到尾都見唔到金城武個樣),「從沒有勇氣,人獨個地飛,害怕被放棄,被置之不理。我懦弱地挽留你……」Well,我兩個都睇 / 聽晒,而思緒,恍如返番去十幾年前……

4.1996年。我讀緊Year 3。即使那一年要籌備畢業論文,但有排都未畢業,使乜咁急籌備呢……加上少堂,(又冇拖拍,單拖的)空閒時間特別多,那時候最鍾意去沙田娛樂城睇番齣Movie,貪易買飛(其實當年好多戲院都好易買飛)。

5.《天涯海角》上映第二周。晏晝兩點半場,全場加埋帶位得四個人。事前我唔覺意在某報睇過篇影評,《天涯海角》被某著名影評人狠插,話裡頭充滿政治式獻媚,結果評分只得,四分,十分滿分。

6.我就是抱住這個先入為主的「四分觀感」入場。散場一刻我耷低著頭,我不想別人望見我似乎(想喊但強忍著淚不過又真係)喊過喎的模樣。問心,我也不清楚是邊一Part觸動了我,但當望住他們仨站在天涯海角,自命硬漢的我已經好想大喊……

7.投入,其實同我當時身分有關——我是Kelly Fans。由1995年仲夏、在漫畫舖做暑期工時偶然聽到她的《一切很美 只因有你》已經立即舉手成為Fans。事實是,當年的Kelly明明初出道,但感覺已經唔似初出道(反而今時今日不少唱咗五、六年的現役歌手感覺還只是個新人)——當然,她有著一股新人才有的清新,但同時又有著一份壓場感;總之在我眼中,她一出道就已經好紅,好離譜地紅;新人必經的那些磨難挫折,Kelly都似乎不曾遇上過——而更離譜是,好多新人王到了入行第三、四年遇上的樽頸位,她亦好似免疫……(回看跟她同年出道的樂壇新人,大部分都消失風雨中,除了陳曉東鍾漢良)

8.買齊Kelly碟 / 睇勻Kelly戲 / 唱K必點Kelly金曲來睇(還有張學友《離開以後》,卡拉OK版MV有Kelly演出),對一個Fans來講,責無旁貸,而在我這麼一個小小小Fans眼中,Kelly外型實在賦予了她太多可能性:她固然靚,靚得不庸俗,仲OK有性格;而呢份性格,令她同時有型,你不妨睇番黃耀明《春光乍洩》MV,即使只是用搖晃鏡頭拍著裝扮完全一樣的明哥和Kelly,在一個禁閉空間Keep住行嚟行去企吓坐吓,但就是有型。在那年頭,任何新人(不論男女)都只會 / 能用一個(被包裝的)形象拋入市場,唯獨Kelly,由可愛到野蠻到懦弱到性感到有型,玩晒。咁多年來,再沒有出現過這麼一個樂壇新人。

9.而因為Kelly,我們同時認識了雷頌德(仲有Dry……)。我承認他寫的某些歌是好聽的,像《懦弱》,我鍾意到當年在K場不知唱了多少次;仲未計《醉迷情人》、《風花雪》等……

10.Kelly填充了我的90年代後半。廿年後的今天,她已經帶兩個仔到紅館舞台上了。唉時間使唔使過得咁快唉。
(原文刊於am730)

續航力,比原力更神秘!

手機講究續航力,其實人也一樣。尤其在香港。

原力有乜用?
睇《星戰》,當睇見女主角原力覺醒,立即可以隔空呼喚光劍,同歹角格起劍來——超,有乜用?
我可以肯定,如果女主角活在香港,就算空有一身澎湃原力,也只是一個廢青。
因為她實在太有立場太疾惡如仇。就算歹角利誘她加盟到自己嗰一方,她也不為所動,實在太不識趣——在香港,不識趣,只會減低你的人生續航力。不識趣,等同罪。
但塵世間任何事都要付出代價,你希望你的人生(像家強般)超級續航?就要預咗作出犧牲……整件事太深奧,我決定援引一些成功地超級續航的現實例子,讓你更易明白。

超級續航人物代表
1.阿叻——大鑊,近幾篇文都情不自禁地提起他,證明他真的極具參考價值。對於佢話如果自己後生啲甚至做到facebook創辦人的言論,我絕不懷疑。畢竟他人到中年還夠膽外面著see-through裡面著泳褲示眾,仲有乜難倒佢?
2.性情中人——事實證明,只要閣下爆粗對象政治正確,是完全沒問題的,而且更可獲委任其他公職……冚家——嗱嗱嗱我即學即用,我也是性情中人。
3.吳克儉——民望如浮雲,支持率也只是數字,對官位絲毫無損,局長續航能力匪夷所思,好正!
4.王晶——Why佢可以屹立影壇咁多年、續航能力咁強勁?咪多得你同你繼續捧場囉。
5.「家駒」——這例子有點不同。家駒明明不在人世,卻是一位(剩餘價值)超級續航的樂壇傳奇,因為勝在求其搵個人笠件紅色褸就扮到,亦因為勝在家強一樣能夠照攬如儀——家強表情話俾我知,佢真係攬緊阿哥(即使冇人覺得係)。

超級續航下的一些異變
原力只能幫你call劍和格劍,續航力卻足以令一件事改變、變質,但冇所謂,續航力永遠是優先考慮,變唔變質?Who cares?
1.Beyond——這已經成為了一個令家強冇咁幸福的名字,難怪當他攬著那個「家駒」時,個樣好慘。
2.勁歌總選——搞了咁多年,已差唔多變成「星夢娛樂旗下歌手之夜」,即使依然以樂壇盛事包裝,盛事到在電視城錄影廠閉門進行,連頒獎嘉賓都冇,但有理由相信,依然會長搞落去……(註:三十年前的1985年,勁歌總選在紅館舉行,出席歌手包括張國榮梅艷芳張學友阿叻個friend等等,頒獎喜賓計有周潤發鍾楚紅黃霑等等)
3.Uber——曾經是創新的代名詞,如今,變成挑戰香港法治核心價值的代表。整個變化,唔使半年。
4.天災——已暗地裡變成人禍,但依然被包裝成天災。無論人禍定天災,都阻不了超級續航的發展。

Finally,How to提升續航力?
這一part,我只提供兩個名詞,請自行參透。
1.深圳——一個令香港自卑、如果香港做到一半已經很好的地方。
2.肥肉——食齋使人瘦,肥肉令人肥;想提升續航力?仲唔快啲去搶?
海濶天空下,May the 續航force be with you!
(原文刊於am730)

ROBOCAT 509


ROBOCAT 508:《原地紮醒》(呢個名由《月巴事一二三》的封面設計師諗~~)


2015年12月18日星期五

浪漫月巴睇90s(5):真誠地情不自禁,可愛的女機械人~



























我看得最多男性肉體 & 女性胴體的時間,必定是(我最血氣方剛的)90年代初。

1.因為多得三級片。

2.這裡所指的三級片,不是《黑太陽731》那種,而是由葉玉卿《情不自禁》作起點,繼而被狂拍濫拍終於拍到爛晒的鹹濕三級片。

3.我先認罪。在鹹濕三級片風起雲湧之際,我擺明未夠秤,未能入戲院場內觀看,但好彩,可以租LD。如果你經歷過LD年代,自然知道一隻LD的半徑是很長的,以致圓周也很長,總之,相當大隻啦……所以當我每一次成功騙過租碟舖老闆娘(事隔多年後回想,該名老闆娘應該知道我未夠秤,但見我咁持之以恆地勇氣可嘉,才不揭穿我),租到一隻我未夠秤觀看的三級片LD時,我必定非常淆底,淆底在驚返屋企途中遇到警方攔截!所以,每一次都必定以「一秒」都不敢停下來的摩打腳飛返屋企(我點會估到廿幾年後的今日,一秒,就隨時換來無情情的一棍)。

4.那段時間真是癲的。Non-stop地有鹹濕三級片上映,換言之Non-stop地有鹹濕三級片租賃,也換言之Non-stop地有電影業人士在拍鹹濕三級片……同樣換言之有男女演員在Non-stop地剝衫,演繹各種做愛做的事……

5.鹹濕三級片不是AV,是需要劇情的——當然不少AV也有劇情,但劇情從來是副,動作戲才是主。90年代的港產三級片,即使必然包含男女肉體相遇後的各種交鋒演繹,但還是有一個OK完整的故事,而因應不同故事,當年的鹹濕三級片更有著多種類型:多多鹹多多趣的荒誕喜劇(像掀起三級波瀾的《情不自禁》、令男人從此對鄰居爆水喉充滿錯誤幻想的《三度誘惑》、狂玩男女身分顛倒錯摸的《哎吔女朋友》)、是緣是債是場夢式都市愛情(像我極度喜愛的《太太的情人》,借用了少少《風月俏佳人》條橋但又加入辦公室喜劇成份、中間仲唔覺意攝咗場大型槍戰的《卿本佳人》)、(偽)科幻(真)技擊(但只得一齣,《女機械人》!)、古色古香的古裝情色(首選自然是由頭離譜到尾、最後更離譜地以道德包裝作結的《玉蒲團之偷情寶鑑》)、結合社會實況(例如突顯中港矛盾但最後失驚無神變成心理驚慄但同Leon首歌無關的《我來自北京》)、警匪罪案(但最後異變成殘虐片的《賊王》,施虐的一方,是由李修賢領導的警方)……嘩實在不能盡錄吖,但無論邊種類型,總之叫得做三級片的,就必定有露的。

6.或許當年的我正值青春期,在鹹濕方面實在太過鹹濕,以致但凡被列為第三級影片的Film我都好想參透,以致不惜冒著生命危險不停租借……而因為睇得多,做足功課,總算歸納到那年代港產鹹濕三級片的少少特點。

7.A:大部分粗製濫造,毫無誠意;B.Sex Scene拍得唔好,甚至稱得上差,以為拍住一男一女剝晒衫在狂郁猛郁勁郁便叫做Sex(《太太的情人》除外,即使其中一場明抄《九個半星期》);C.不少男女主角,都是演藝事業停滯不前……

8.真正憑三級片闖出一片天,由始至終只得葉玉卿,有一些,拍了一齣半齣,叫做掀起過少少話題,但更多的是,拍了好幾部都冇運行,從此銷聲匿跡……能夠領銜主演的也尚且如此,那些只能做第二或第三女配角的,連名都冇人記得——而這一班女演員,卻幾乎是當年三級片的鐵腳,每一次都在粗製濫造下重複做著相同的事,重複的被粗製濫造地對待……

9.幾年前的某一夜,我在銅鑼灣街頭遇上一位當年經常出演三級片的女演員。當晚劇凍,她包到成集糭,跟兩位女性朋友邊行街邊閒聊。我望著她,狂望著她,好想走上前跟她說:我看過你的大量演出,我記得你的名字;我以前覺得你唔靚,但原來你真人靚過上鏡——我當然冇咁做,只目送著她漸漸遠去。

10.那是道德淪亡的年代嗎?在這個高舉道德旗幟的敗德年代回看那個鹹濕時代,竟然感到一種政治不正確的真誠和可愛。
############
撇除那些鹹濕,《三度誘惑》其實OK好笑。尤其難忘李中寧的「三級Man」。
撇除那些鹹濕,《太太的情人》的故事其實值得細味。尤其難忘植敬雯的演出。
撇除那些鹹濕,《賊王》其實極度剝削,最後嗰十幾分鐘極度離譜(請注意,成套戲其實不含露點鏡頭)。
撇除那些鹹濕,《我來自北京》最後的劇情轉向其實好……難以形容。
撇除那些鹹濕,《女機械人》其實……好Crazy吖!
(原文刊於am730)

人生競爭劇場:只聽老人言,吃蕉在眼前~


























塵世間有好多人生格言,其中相當著名的一條肯定是:不聽老人言,吃虧在眼前——同你講得出呢一句的,巧合地,都是老人。

月巴K小時候就被灌輸過這句格言。他不明所以,向他灌輸呢句格言的老人咁答:「因為我哋食鹽多過你食米!」那一刻的月巴K很震驚——他本人已經自命飯桶,每一餐都要食上兩大碗飯,折開計算,都唔知當中包含了幾多粒米……但實在估唔到竟然有人的食鹽量比他的食米量還要多!
一直謹記這句格言的月巴K,好快地長大成人,好快地搵到份工(有老人曾經同佢講:唔返工的人正廢青!)。在連商品都講究競爭的時代,月巴K明白自己不過是件(冇乜競爭力的)商品,他不想在競爭中敗陣,他想找尋幫到他的職場導師……
好好彩地,月巴K在公司遇上一個位列管理階層的老人A,感覺OK易相處的,因為這位老人A無時無刻都愛將「好正!」、「好靚」、「真係好正!」等等感情色彩強烈的話語掛在口邊,問老人A噚晚餐放題點?「好正!」點正法?「啲嘢食好靚!」靚成點先?「靚到真係好正!」不像某些人懶有料咁,唔深唔講(但月巴K又好似從未聽過老人A評論一些較嚴肅課題)。
有一鑊,老人A拉埋月巴K列席管理層會議,作為全公司最低級員工的月巴K既淆底又興奮,淆底在要面對一眾高層,興奮在可以目睹老人A(及一眾高層)在會議桌上的卓越表現。可惜,月巴K注定欣賞不到老人A的表現——佢冇開會,佢去咗旅行。
散會,有個人走埋月巴K身邊講咗句:「唔好對人不對事,但老人A連會都唔開真係唔得掂。」說話的是老人B,非管理層,但又相當高層嗰隻,但凡由管理層作出的決定他都贊成,毫無疑問地贊成——在剛才會議月巴K便見識過老人B在贊成方面的爽快表現——問心,管理層的大部分決定實在贊成唔落,但老人B都能夠諗都唔諗就贊成,實在令月巴K肅然起敬。
但月巴K好奇:老人B究竟是用甚麼角度去審視一個決定?月巴K咁好奇,是因為他曾聽過老人B講「唔好對人不對事」——言下之意即係要對事不對人?但老人B又講過「唔好對事不對人」喎……而最強勁一次是幫某高層護航時,老人B竟然能夠將兩句結合:大家唔好對人不對事,或者對事不對人!——大鑊,月巴K完全聽唔明吖,但更大鑊是一眾管理層都狀甚明白吖!
月巴K沮喪。他發覺自己唔適合呢間公司(偏偏冇諗過可能係間公司唔啱佢,畢竟曾有老人同佢講:我食鹽多過你食米!永遠都係人去適應環境!)。就在這個極度沮喪的moment,月巴K在走廊遇到向以行蹤神秘見稱的老人C——他曾是公司CEO,後來以健康為理由辭職唔do(抑或係被迫走?謎),但事隔多年後依然生猛,更經常返公司以智囊身分提供意見……老人C對月巴K說:「我鼓勵你~返內地~唔理你進修定實習~總之就係返~內地。」原因呢?「只要~中國發展~一片光明~香港~前景同樣光明~」
離奇是每次遇上老人C,都是講呢兩句。月巴K疑惑:老人C明明沒有讓他的兒孫返內地,又憑乜鼓勵人哋咁做?而「只要~中國發展~一片光明~香港~前景同樣光明~」這一句更加未經過驗證,廢的程度猶如「只要火星發展一片光明,地球前景同樣光明」……
月巴K好多疑惑!最嚴重的一個是:競爭條例實施後人人鬥平,老人A、B、C呢三條老嘢還能夠在這個競爭社會裡生存,是否就因為他們太cheap,定太賤?
無論點,只聽呢班老人言,吃蕉在眼前——錯,係只有蕉皮,俾你踩的。
(原文刊於am730,20151216)

浪漫月巴睇90s(4):各有各的方向與目的~又唔早講~



























如果12月7日晚上家強在那個乜民聯晚宴上說:Beyond是一個我又愛又恨的名字……

1.……如果我不是這個名字的一員,我應該可以更幸福。所以,而家為大家獻唱一曲《驚恐症》~(Sorry,家強芸芸作品中我只識呢首。)

2.如果係咁,會點?我們當然永遠都不會知道(唯一知道的可能是譚志源會唱得冇咁亢奮啩),事情發生了就是發生了,再沒有如果的餘地。

3.如果命運能選擇。Beyond或許不會選擇去日本發展,那麼便不用錄那個唔知為乜的遊戲節目,那麼家駒便不會……

4.我不是Beyond fans。即使他們好多歌,我都能夠在唔睇歌詞情況下唱出來。

5.Beyond撼動我的第一首歌,已經是1992年夏天的《長城》。那個暑假我是個等待會考放榜的中五學生,期間去了火炭一間蠟燭廠返暑期工,每天屈在攝氏35度的「冷氣廠房」(勞工署的簡介是這樣形容的,但原來冷氣只存在於廠房裡的一間小Office),滴住汗,聽住收音機,每當聽到家駒在喊「矇著耳朵,那裡那天不再聽到在呼號的人」我便零舍激動,激動到跟住嗌。Why咁激動?我不知道。

6.或許這就是搖滾的力量。搖滾不像流行曲——流行曲當然也能令你感動,但流行曲所要展示的,通常跟負責演繹的歌手無關,於是一個歌手並不需要好似傳說中咁純真才有資格去唱《純真傳說》。而搖滾,卻是樂隊態度的延伸,貫徹著樂隊的意志,不然,就只是假惺惺的擺姿態,好難頂,會俾人藐。所以聽《光輝歲月》我們會感受到一個黑人在南非種族隔離時期的奮鬥;聽《俾面派對》會觀照到香港樂壇 / 娛樂圈的不知所謂;聽《Amani》,會不期然心生一種對和平的憧憬……而這些都是家駒踏入90年代後,對於他所置身處境的所思所想和所感。

7.當家駒一去不返、Beyond剩下三人後,我開始買Beyond的碟,直至1999年解散。滾石時期Beyond的六張專輯,問心,我都極度喜歡——即使有人總是說自家駒離開後Beyond已不再是Beyond,但由1994年的《二樓後座》到1999年的《Good Time》,每一次都讓你聽到三人在音樂上的嚴謹追求(但不得不承認創作上的確以黃貫中為主導),當中又以1995年《Sound》、1997年《驚喜》以及1998年《不見不散》表現最好,呈現了不同於家駒時代的音樂面貌外,尤其當置放在那個魚蛋K歌充斥市面的混沌時期,更加彌足珍貴。我是因為這時期的Beyond,才掉番轉,回溯家駒時期的Beyond。

8.然後Beyond的歌成為了我每次唱K必點的K歌,既然是K歌,誰都有權去唱,誰都有權把(未必有關的)意義無限添加,可以是K房裡讓你宣洩情緒的歌曲,可以是社會抗爭讓大家合唱的主題曲,也可以是乜民聯晚宴的娛賓助慶工具……歌曲的原始意義已不復存在,寫下這些歌曲的樂隊也變成一個被過度使用、用到近乎無關痛癢的名字。而我點都估唔到,「Beyond」這名字原來也構成了家強本人生命中不能承受的輕。陰公。

9.各有各的方向與目的,只是一直秘而不宣。我邊聽著《灰色軌跡》邊打這篇文,我聽到一種從前聽不出的悲涼和空虛。

10.是的,音樂從不在社會運動中缺席,但請不要再唱《海濶天空》了。Beyond的歷史任務晨早超額完成,剩餘價值已被扭曲用凸。
(《Sound》真係好正)
(原文刊於am730,20151211)

今天我……





















特首拉家強自拍那一夜,可能太凍令我產生幻覺,好似看見昨天的我飄過……

人非草木,也不是一嚿石,是會變的——其實草木和石都會變,只是它們沒有意志,那種變,純天然。
人的變,卻是一種選擇,一種由意志定斷的選擇。今天我心血來潮,想同大家分享我本人的一些微妙變化。

《閱讀篇》
昨天我搭10粒鐘飛機睇唔到10本書。
今天我搭10粒鐘飛機只能詳閱10個空姐。

昨天我一個月睇唔到30本書(但能夠食足30日buffet),失敗。
今天我一個月依然睇唔到30本書(兼已經不能夠食足30日buffet),更失敗。

《嗜好篇》
昨天我不介意(但不enjoy)阿姐高歌。
今天我很介意(兼不enjoy)阿姐高歌。

昨天我鍾意邊聽《傲骨》邊跟住唱,好認真地唱。又其實,昨天我一聽見《傲骨》就起雞皮。
今天我仲會唱,但唱得極其甩轆,營造滑稽,達致諷刺原唱的效果(務求不用負上刑事責任)。又其實,今天我一聽見《傲骨》就想——嘔。

昨天我好愛在K房唱K(昨天大家都只在K房唱K)。
今天我好怕在大庭廣眾唱K(今天大家都在大庭廣眾唱K)。

昨天我閒來無事就會like & share改圖。
今天我like & share前會先諮詢法律意見。

《名人篇》
昨天我覺得Treegun係時候升級。
今天我覺得Treegun不需要升級(因晨早已被封頂)。

昨天我覺得李克勤同陳克勤好唔同。
今天我不覺得李克勤同陳克勤好唔同。

昨天我以為網絡紅人好叻叻。
今天我方知網絡紅人原來叻唔過阿叻。

昨天我戥唯唯(輸俾G.E.M.)唔抵。
今天我戥G.E.M.的確實至名歸。

《政治篇》
昨天我一廂情願以為食水理應不含鉛。
今天我才知道食水含不含鉛需有合約寫明(不排除第時食水含不含屎都要事先講明)。

昨天我整美食車只需整架木頭車。
今天我整美食車必先擺低60萬入場費啫(Why我唔直情買架私家車?)。

昨天我不明白成立創科局有乜用。
今天我不明白成立創科局有乜Q嘢用。

《基建篇》
昨天我只會問一條橋有幾難起先?
今天我至知一條橋原來真係咁難起喎。

昨天我冇要求興建 / 乘搭高鐵。
今天我冇要求興建 / 乘搭高鐵(唯獨這一點,冇變)。

《音樂篇》
昨天我仍是少年所以太年輕了,深信搖滾就是改變建制。
今天我已是中年所以挑通眼眉,看清建制可以反過來改變搖滾。

昨天我覺得特首歌藝明顯欠佳。
今天我覺得特首歌聲(在家強和音下)恍如天籟。

《結語》
沒有昨天的我,哪有今天的我?你說昨日已死舊夢不須記,而我只想問Why一定要變(得咁難睇)?變化是否就等於進化?
我不知道。我只知道,無論點變,唯獨一件事,不變:就快又要交稅了。
(原文刊於am730,20151209)

ROBOCAT 506


ROBOCAT 505


ROBOCAT 504




2015年12月4日星期五

ROBOCAT 503


浪漫月巴睇90s(3):同城城相愛原本總是這麼難,但……



























今周,簡直是城城周。

1.感情一直低調但而家思想成熟的城城首度公開戀情(兼且仲有新戲上畫)。

2.城城五十而知天命的大膽創舉,感動了我,我決定把已寫好的稿臨時抽掉(留待下周出),對最憎打字的我簡直是莫大懲罰!懲罰已足夠吧?懲罰已足夠吧……

3.雨中感嘆號。因為呢首歌,令我在中六某個放學後,連波都唔打,連女都唔溝,拎著死慳死抵的零用,仆去沙田好運中心搶購城城《沒有妳的愛》CD!

4.(梳著甩漏版城城頭的)我,望著精美紙盒封套上城城那一滴(用上特別印刷技巧精製而成的)淚,渾身起雞皮,但我叫自己鎮定,因為零用錢已完美地用晒,連搭Bus的車錢都冇,要行返屋企。那一段路很折磨。明明想行快兩步,但雙腳實在有點乏力——畢竟成日未食過任何固體嘢,只生吞掉大量飲水機的水充饑(為了買城城CD,寧願捱餓)……我同自己講:不要倒下!捱到返屋企就有得聽城城!

5.嗱嗱嗱,呢段(不堪回首的)往事,我從來冇向外界透露,因為實在唔好意思……但城城的一句話摑醒了我:「唔好睇番以前做過乜,每人都有過去。」我終於有勇氣把這段過去和盤托出。多謝城城!

6.作為四大天王,城城總是給人一種敬陪末席的感覺——A.三大天王好似爭咁啲嘢喎,咦城城好似OK喎,加埋佢入去填夠四個啦;B.問題是,城城影視表現及不上華仔(當時未叫劉華)、俊朗度及不上Leon、歌藝又肯定及不上學友……(但Why揀城城而唔揀李克勤?This is a question)

7.無奈是,當時冇人明白「生活唔係戰場,唔需要一較高下」呢個大道理,以致城城長期感覺掹車邊,但其實我們都睇漏了一點:城城至少有一點,改變 / 改造了其他三天王的營運模式——從來不以跳舞為己任的華仔Leon學友都要跳埋一份。

8.當城城由台灣紅返香港、1992年加盟華星推出首張粵語專輯展示他的第四晚心情,同一年,華仔高唱獨自去偷歡、Leon宣稱我來自北京,學友呢,則只想今晚擦著愛火花——過程中不再企棟棟,而是配合(你睇幾次便會記住的)舞步(和手勢)。

9.90年代的城城也有著一個變化歷程,變化是透過他的舞去呈現——《對你愛不完》靠的自然是那記右手擰四下的招式,然後經歷《第四晚心情》和《雨中感嘆號》,到《狂野之城》是一個轉變,再到《鐵幕誘惑》成就了一個高峰,一個香港歌手舞蹈表現上的高峰——基於我本人唔識跳舞(加上一個月睇唔到30本書或雜誌,唔夠醒),為免寫錯,我不能夠如實用一啲Term去闡述以上每一隻舞,但我有眼吖嘛,點都睇得出箇中轉變以及排舞所付出的心力。

10.由於本欄Set定只寫90年代,城城日後的事不寫了。只能說,他後來經歷過好一些低潮,講過一些好搞笑的說話(例如話自己流百事血……),演繹過一些深刻角色,兼且Well,揸過不少靚車……作為一個中年男人,其實OK羨慕城城。至於過去沒有被城城公告天下的戀情對象,只能送上一句:相愛~原本~總是~這~麼~難。
(補充一點:打這篇稿時冇人用左手拖實我右手。這樣打稿可以快一點。)
(原文刊於am730)

2015年12月2日星期三

月巴淋浴露親子劇場:《C9梟雄》


























陳太與李太,塵世間最尋常的C9。這天在街市菜檔不期而遇……

同學仔,請先細讀以下故事
陳太李太住在同一屋苑同一樓層,平日(盡量)不相往還,但人生在世,總有撞口撞面的時候。
每當撞口撞面,就像塵世間最尋常的C9,不外乎談論街市啲菜點賣、啲魚新唔新鮮;但更多時候是講自己個仔,嚴格來說是藉著講自己個仔來突出自己有幾掂 & 對方的不是。
陳太個仔,在一間normal學校就讀小三,很normal的一個小學生。正因為太normal,陳太很想個仔冇咁normal,但同時又懼怕一旦變得不太normal,就會同這個要求人人最好normal的現代社會脫軌。講到尾陳太最大心願是:個仔要乖,聽話。
李太個仔,在一間normal國際學校讀書,很normal的一個國際學校小學生——但在李太眼中,佢個仔絕不normal,全因為佢接受的不是normal香港細路硬食的normal教育……她最希望個仔叻——有冇智慧不重要,總之要叻,叻是一種做俾人睇的外在行為,一種在香港社會獲高度認可的外在行為。
陳太和李太其實也有共通點——都鍾意睇電視,嚴格來說是鍾意睇TBB,不同是,(成日自以為a little bit洋化的)李太會睇埋明豬台。畢竟大部分節目都附設麗音和中文字幕。
陳太就冇乜所謂,電視播乜佢睇乜。就像學校要佢個仔考乜,佢就會叫個仔溫乜。但求全力以赴,考到最好。
(補充一點:她們屋苑的食水被驗出含鉛量爆標。陳太在早排區議會選舉票投建制派。李太乜都冇投,她不是選民。)
尋常的一天,陳太李太在(由領展悉心管理並經過悉心裝潢的)街市菜檔遇上了。
陳太自問是個得體C9,若無其事(但又掩不住洋洋得意)說:「我個仔操TSA愈操愈好,連班主任都讚佢叻。」
李太自問是個得體兼幽默的C9,立即笑笑口(但又明顯皮笑肉不笑)說:「Great!叻唔叻得過阿叻先?哈哈哈!」
陳太應酬C9經驗值豐富,自然聽得出李太暗藏機鋒話中有話,但又不便發作,惟有說:「睇阿叻講贏嗰啲乜鬼網絡紅人真係笑死我~~妳個仔最近點吖?」李太將把聲鍊高八度:「Well,其實我都冇乜理佢,反正佢又唔使考TSA……唉講真,我都想佢學似你個仔咁成日有得操,所以我好贊成TSA!」
陳太好想中止這場對話,但就像高鐵及港珠澳大橋工程,找不到嗌停時機:「其實成績好唔好其次,望都係望佢乖。」李太(堅持皮笑肉不)笑說:「係咪好似嗰個鄭咩嘢弘咁吖?」陳太滴汗——點解眼前呢條死八婆會知道我是阿Fred fans(這個連老公都不知道的事實)?
滴汗的陳太強裝鎮定:「哈哈哈咁講真嗰個唯唯叻好多~~」輪到李太滴汗——Why眼前呢個bitch得悉我情迷唯唯?
雙方都在滴汗但又扮冇事,誰也贏不了誰,各自返歸煮飯。
夜深,陳生第二朝開早,瞓咗;陳太個仔第二朝都要返早,但還在努力做練習;陳太為免嘈親個仔,改用myTV重溫心愛節目。至於李太,正在迫李生就個仔的birthday party增加撥款。(完)

就上述故事,身為同學仔的你認為:
A.陳太好親切,好似我媽咪。
B.李太是個明白事理的家庭主婦。
C.陳太個仔做TSA做得好開心,開心到唔願瞓。
D.TBB是個滿布乖人叻人的好地方。
E.以上各項皆是。
(原文刊於am730)

ROBOCAT 502