2015年7月31日星期五

一年一度上開益,為你簽名唔怕迫~






















上周六,月巴上旺角開益。
好Nice的老闆娘問月巴曰:「今年也辦簽書會,如何?
好肥的月巴答曰:「Yeah!」

詳情如下:
地點:旺角開益書店(西洋菜南街61號1樓)
時間:8月7日(星期五)7:30pm
備註:新舊都簽~

浪漫月巴睇女星(37):尊敬肥菜,閱讀葉蘊儀的獨立時代


























有些女星,佢後生時完全吸引唔到我,點知當佢步入中年後……Oh No……

1.實不相瞞,偶像年代的葉蘊儀,我不為所動。

2.不就是一個被喬裝成日本Idol的偶像?咁我直接迷番日本本土出產的Idol咪得囉(所以對於時下那些被Cosplay成韓國女子組合的香港女子組合,同樣冇興趣)。

3.作為偶像,有太多身不由己。你的形象經由別人設計,而又通常同你本人的真實無關,只與現實潮流息息相關——因為製造一個偶像,不是要呈現你本人,而是借助你本人去呈現一個符合潮流的假象,一個能夠成功冧 / 呃到Fans的假象。

4.所以由青春期到成年期都沒有刻意follow任何葉蘊儀的新聞(我年紀同佢差唔多,佢大我少少),只知道佢嫁咗(仲嫁得幾好),生咗小朋友,獲得了一種被普遍社會認定為典型的幸福少奶奶生活……但然後,好.景.不.常(因為曾經被認定是幸福少奶奶嘛,才有得動用這組詞語),離婚收場,做了單親媽媽。

5.這麼一個經常出現的典型女星大起大跌遭遇,卻沒有按照典型的劇情發展下去:她沒有再嫁,期間除了偶然的幕前演出,主要從事的就是,專心攻讀藝術——不是返一兩個course懶係豐富一下涵養嗰種,而是真的由文憑到學士再到碩士,一步一步讀落去。我由好多年前對葉蘊儀不為所動,漸漸地演變成,尊敬她——不是因為她讀到碩士咁上進,而是從她身上,我看到很多女性都做不到的,自主。

6.而令我更估唔到的是,她敢於對看不過眼的社會不公不仁和不義開聲——不是好似某啲藝人又要帶光環但又要戴頭盔、講咗等於冇講嗰隻,而是真的指出問題核心,表明自己立場。我們都知道,在今日香港,表明立場唔緊要,最緊要是你表明的立場是甚麼立場——葉蘊儀因為她本人的立場,就曾被一些(好睇通時勢所以好識時務的)前輩同行指責、明寸。所以好多男星女星台前幕後都選擇保持緘默。

7.在過去,我從未買過葉蘊儀的任何寫真和CD,但早排竟然第一時間買了和讀了她的新書,《她們的二三事》。這不是一本女星扮才女或貪過癮去寫的偽生活態度品味指南,而是描述女性應該怎麼樣看待自己的生命——藉著23位不同年齡的知名女星真實故事,說明女性其實可以活得坦然、誠實,不用遷就和理會外界——尤其是男人的目光。

8.但這不是一本女性主義(或女權主義者)宣言,葉蘊儀也寫到明抗拒別人說她是女性主義,「因為這種說法總是從男性看女性的角度出發,人們總是認為女性主義就是要反抗男性……其實我的女性主義只是希望能讓世界各地的女性都能得到平等的對待,包括教育、婚姻、自主及尊重等。」所以當寫到單身主義者嘉芙蓮丹露時她說,結婚不是必然一定要發生的,唔好為結而結,「女性必須先學會認識自己及愛自己,才能清楚找到餘下的另一半。」

9.這本書也道出了我寫這個欄長期面對的一個困惑:冇錯,塵世間的確有好多好靚的女星,但除咗寫佢哋好靚好靚好靚,仲有乜好寫?而最弊是,任何好靚的女星隨著年齡增長,臉上都注定寫滿風霜,這時候,除咗痛心地憶述她們過去有幾靚,仲可以寫乜?——原來很多好靚的女星除咗靚,就似乎甚麼都沒有。不像被葉蘊儀描寫的那23位女星 / 女性,「她們的美之所以真實、恆久,是因為它們沒停留在眼慾上的驚艷,而是為人世間帶來啟發、帶來溫暖、帶來光明、帶來改變。」

10.我從葉蘊儀也看到這種美。當然,對比一般人,她的少女時代已經相當精彩,但我會諗,她真正的精彩,是在遭逢(對很多女性來說好大鑊、足以影響餘生的)婚姻厄運後,才開始發生——她拋開了(被裝扮到好靚的)Idol和(被認為好幸福的)少奶奶,終於找到一個女性的應有身分,一個不受限於社會目光的獨立女性身分。葉蘊儀,四十出頭,活得很美,因為忠誠地表達自己。
(原文刊於am730)

ROBOCAT 467










記得大學時有個(唔熟的)同學,無論你講乜,佢都會大笑勁笑喪笑皮笑肉不笑。
結果佢做咗博士,教大學。

2015年7月29日星期三

識時務者為蠢人,升官發財指引




















古語有云:咪做蠢人。

做一個叻的蠢人
所以在古代(即97前),兩間電視台都有製作節目以作配合:麗的(即後來的亞視),有為培育細路做醒目仔的《醒目仔時間》;TBB,也有為令大人叻啲的《叻人新世紀》。
但現在,曾努力培育醒目仔的亞視不獲續牌,而有份主持《叻人新世紀》的殿——堂級歌手李克勤,也似乎進入了另一個境界,選擇笠上(好難認佢唔出的)面具參加大陸歌唱比賽——Why一個出過咁多碟又叻震音的歌手仲要參加比賽?我諗唔通,我更諗唔通的是評判竟然認佢唔出……霎時間,我不知道參賽者叻啲定嗰班評判叻啲。
Anyway,作為家長,當然不希望自己子女蠢(過別人的子女),於是大家都迫子女參加呢樣報讀嗰樣,無非想佢哋醒啲叻啲……問題是,做叻人真的著數嗎?環顧今日香港蠢人遍布,當中不少蠢人更可以做高官、或甚麼發言人,月月如常獲取高(過你同我N倍的)人工——這難堪的事實叫我開始明白:醒目地做一個叻的蠢人,才是真正的才能。

月巴呈獻,子女智能測試指引
香港已進化至一個有規有矩的城市,而規矩,來自指引。沒有指引,好多人唔識生存。
為了讓關心子女發展的家長們自行評估子女智能,我參考了社會上的一些爭議性事件,再認真地做了一個測試指引;從指引中的選項,你大致可以預測子女智能水平,以及日後適合從事的行業。

1.語言題:試讓子女讀出「中國建築」,睇吓讀得流不流暢。
A.好流暢(冇錯,閣下子女語言能力係唔錯,但未來發展頂籠都只係唔錯);
B.OK甩咳,又驚讀錯(閣下子女非庸才,應加倍培育);
C.完全讀唔到(Yeah!閣下子女有望加入房署做高官!)

2.情景聯想題:圖中所見,有一個噴晒鼻血的女子以及一群警察,試讓子女想像究竟發生咗乜事。
A.天氣乾燥所以流鼻血(閣下子女完全欠缺想像力,建議俾佢睇多啲TBB劇);
B.有人向女子施襲(太理所當然,偏偏香港已經沒有理所當然這回事,閣下子女在人生路途注定吃虧閉翳);
C.女子以胸部襲警(WOW!閣下子女注定是司法界奇才!)

3.現實處理題(一):某女學生由高處墮下,郁都唔郁,試讓子女描述該女學生身體狀況。
A.佢暈咗啫(閣下子女適合做訓導);
B.佢行得嘅(閣下子女適合做副校長);
C.不作任何描述而只管冷靜地尋求指引,總之大前提係千祈唔好打999(唔做校長簡直浪費,恭喜!)

4.現實處理題(二):港大校委會會議進行期間有學生衝擊會場,假設閣下子女是與會者之一,會點做?
A.插水(有急智,但唔夠);
B.插水並(似乎)暈倒(仲未夠囉);
C.插水並(似乎)暈倒再高呼學生無法無天當然仲要call白車華麗轉身離場(完美!醫學界需要你!)

5.經濟題:高鐵估計(估咋)最終造價高達九百億,你的子女認為此項工程是:
A.黐線!(Sorry,閣下子女極有可能係黐線);
B.洗濕咗個頭,都要起埋落去啦(識時務,但未夠);
C.嘩有冇咁筍吖?(閣下子女對經濟發展睇法絕對宏觀!)

6.自由題(一):媽咪買餸時消費意欲降低,原因是?
A.阿爸失業(答案太正路);
B.百物騰貴(答咗等於冇答);
C.創科局未能成立(咁都答得出!絕對適合加入建制派!)

7.自由題(二):阿媽話你玩完啲玩具又試通處擺,你的解釋是?
A.懶囉(注定做廢青);
B.等工人執得啦(唔錯,有前途);
C.土地問題(以致居住空間不足,衍生冇地方擺玩具)——閣下子女不得不參選特首!

終極指引:但假如閣下子女在以上各題都揀C,你應該遠離佢多啲,因為佢喪過喪屍。

(交稿嗰刻尚未發生港大校委會插水事件,唉……惟有喺呢度加番。原文刊於am730)

ROBOCAT 466:那年夏天,寧靜的海。









最後嗰格,真心話。

2015年7月22日星期三

第三年再去書展後的情緒結集


























書展完了。我好想奔放地Yeah一聲,但……

1.為期七天的書展,我去了三天。

2.實不相瞞,由1997年(那一年我開始返工)至2012年,我都冇去書展——當中有一兩年有去,因為做嘢或捧出書的朋友場,但當做完嘢捧完場,即撇。

3.1997前我卻年年去。去足全日,由一開波到完場,完場嗰刻仲會好唔捨得……於是第二日又躝過去。最初是因為想買心愛的漫畫想見喜愛的漫畫家,後來除了買漫畫,也會行勻成個場,因為不時會找到一些出面買不到的,像我手頭上那一本時報版《生命中不能承受的輕》,便是在1996年書展買的(多年來我都是看這個版本,更認為是歷來最好的中譯本)。

4.不再去書展,原因可以有好多:A.大佬,要返工吖嘛;B.唔想人迫人;C.場內食嘢好鬼貴(以前我會買定光酥餅入去,貪夠飽肚,又可以分幾鑊進食);D.基本上書展期間出版的書,同一時間都可以在坊間書局買到……總之啦,我再找不到不得不去書展的理由——即使我明明極度鍾意買書睇書和儲書,但原來,書展竟然可以與我無關。

5.所以當輪到自己有得出書、並冀望讀者能夠入場支持吓我呢個月巴仔的時候,我口啞啞——我不知道怎樣說服別人去做一件連自己都再找不到理由去做的事。如果你在書展見到我成頭汗,除了因為熱,也因為我唔好意思。我終於在人到中年完美地體會「汗顏」的滋味和意思。

6.當角色、身分有變,看待事物的態度也會跟住變。例如紙媒式微。如果我是普通讀者,根本懶得理,反正總有渠道為我提供(真假不明立場更加不明的)新聞和資訊,多到任我揀嚟睇,我既可以選擇睇晒成篇報道,更可以專心做個標題黨……偏偏,我好(唔好)彩地從事傳(統紙)媒,當睇住呢本摺嗰份又話轉型所以cut人時,除了淆底,就只能淆住底同自己講:跟住時代去走吧!——但問題是:個「時代」俾唔俾機會月巴 + 中年的我跟住走。(題外話:垃圾桶不同。無論我是普通市民、富豪抑或清道夫,對我來說,垃圾桶都只會是垃圾桶,唯一功能就是,食垃圾。)

7.又例如書展。冇錯,這既是一個新書首賣場所但也擺明是一個散貨場——新書一出版便成為舊書,而舊書不是俾人買晒,就是被出版社收埋;收埋,不因為珍貴,而是因為太唔珍貴——不論文字好定壞,總之一被印製成書擺出來賣,就是商品;而商品,從來只有兩種:好賣 & 唔好賣。好賣的,咪再版囉;唔好賣的,就係唔好賣,冇書店肯入貨,然後退回發行再退回出版社,從此成為佔據空間又令人眼冤的一堆嘢。當我近三年入番書展,見到某些攤位竟然仲有得賣一些十幾廿年前的書時,我看見一種悲涼。

8.這悲涼我不止一次目睹。A.大學時在新亞圖書館。看見上世紀70年代出版的《存有與虛無》大陸中譯本,售價,5毫。當一個人窮盡精力去翻譯呢本出名艱深的書,原來在塵世的價值就只是,5毫。B.最近在看東野圭吾《歪笑小說》。東野以反話去寫去寸(持續萎縮的)日本出版業,一個點睇都算是文化行業的業界,竟然由一堆荒謬組成,而有份提供荒謬的包括作者、編輯和讀者,作者受編輯控制、編輯受讀者主導去控制作者,而讀者不明白自己原來一直在主導作者和編輯(去生產文字俾自己)。其中一個短篇《決選入圍作》,一個有家室的46歲中坑,被調配到一個可有可無的工作崗位,幻想自己能夠憑參加推理小說新人獎而順利出道逆轉人生,結果,當然係……明白寫嘢根本搵唔到食。評審對他作品的一個評語是:欠缺冒險意味,而這正好是纏繞主角本人(以及大部分平凡人)一生的死穴。

9.冒險。當我去番書展,才發現,原來不少出版社都在冒險,冒險去發掘新作者,冒險去開發新題材,而好彩地也有一些讀者願意冒險去買——是的,當書作為一件商品,當出版作為一個商業活動,「買」,才是支持整個行業的最重要行為(當你在fb為紙媒沒落而懶係哀嘆時,Hey,你究竟幾耐冇買過雜誌?)。當然,賣得好的未必好,賣得差的未必差,文字從不以銷量好壞作定斷,今天的清倉貨可能成為N年後的經典,但作者本人今天的匱乏肚餓,不能夠用一餐N年後的buffet來醫飽。

10.香港勁在曾經出產過金庸亦舒衛斯理,也弊在咁多年後都只能夠同人講曾經出產過金庸亦舒衛斯理。
(最後,感謝keep住冒險幫我出書的K先生,感謝願意keep住冒險買我書的你和妳,Yeah!)
(原文刊於am730)

ROBOCAT 464


2015年7月17日星期五

ROBOCAT 463


浪漫月巴睇女星(36):且讓我們記住Meg Ryan的曾經,直到永遠。


















上星期在公司開fb時瞥見一個po,Meg Ryan的近照——我不禁有爆哭的衝動。咁當然,我強忍住,畢竟大庭廣眾。

1.對於你曾經度過的90年代,你還記得甚麼?

2.我記得的是:1994年有好多支配自己一世的電影(《東邪西毒》、《Pulp Fiction》);Brit-pop的爆發(在Oasis與Blur之間我選擇了Oasis,偏偏Oasis兩度來港我都冇去睇,Blur反而兩次都捧場);Kurt Cobain的死(廿年過去我還是keep住聽《Nevermind》和《In Utero》)……還有《90男歡女愛》。

3.《90男歡女愛》,1989年的電影,但因在香港上映年份是1990年,才有了這戲名。有關這齣戲的感受我曾經寫過,仲要寫過兩次(可睇番《When佢Met Meg》及《原因不要理,浪漫地睇聖誕舊戲》)。

4.寫過兩次,睇就已經N次了(相信還會繼續睇下去,直至死的一天)。你不要問我睇N次的原因,塵世間太多嘢沒有原因(例如Why要設定人老咗就必然縐皮?);只知道,我鍾意睇片中的Billy Crystal,更鍾意睇當中的Meg Ryan——這個Meg Ryan / Sally,性格設定其實頗煩膠,但唔緊要,因為Billy Crystal / Harry仲煩膠,煩膠遇著煩膠,最後修成正果如膠似漆。

5.《90男歡女愛》在美國上映那一年,Meg Ryan 29歲,入行八年。電影太成功,立即把她事業推到另一層次。佢識唔識做戲不重要,最重要是世人都鍾意睇佢做戲——做有關愛情的戲。

6.然後整個90年代,Meg Ryan主要都在演繹塵世間的愛情事宜,有啲故事好啲,有啲差啲,但無論好啲定差啲,Meg Ryan的愛情電影都是輕輕的,沒有呼天搶地的生離死別,而只有生命日常的陣痛,但這陣痛,足以拮中好多浮世男女。可能是編劇為Meg Ryan度身訂造——也可能是基於她的外型以致不得不這樣度身訂造:Meg Ryan從來都不是風騷或性感的尤物,更不會是身材爆裂Femme Fatale,而只是一個你在日常會接觸得到,望落比常人靚啲,有點可愛的煩膠,但佢嗰種煩,卻足以構成令乏味生活變甜的糖。Yes,Meg Ryan被尊稱為90年代的(美國)甜心,就是她擁有一種貼近生活日常的屬性。即使佢明明是巨星。

7.她的這種特質,給予了那些在愛情路上跌跌撞撞患得患失角色無窮說服力。像(我只睇過一次、決定餘生絕不翻炒的)《緣份的天空》。試想像:如果最後同Tom Hanks遇上的是一位衣著疏爽風騷蝕骨性感尤物,你會諗佢哋跟住去邊度?但換轉 是Meg Ryan,這段緣,立即變得純粹,不夾雜任何鹹濕;但又因為這一種純粹,令我不敢再去觸碰,害怕影響了第一次(也是最後一次)看時的美。

8.原因不交代,總之在那個有點遙遠的90年代,我睇晒Meg Ryan的戲,每一次都是買飛入場,即使不是每一齣都好睇(問心,當中不少都好平庸),但Meg Ryan就是有一種力量,用她的特質支撐、挽救了一齣(平庸的)戲,叫一切愛她的,不致割凳,反而睇到心裡暖烘烘甜絲絲。

9.但時間一直在走。一個甜心只能屬於一個年代,一個靚樣也不能keep一世。90年代後Meg Ryan遇上的事,大概都不是甚麼好事:同(天殺的)羅素高爾搞埋一齊……離婚(但佢話老公其實一直有出去搞三搞四)……為尋求突破而在一齣(好唔掂的)《In The Cut》裸露……主演的電影因嚴重負評而直接出DVD冇眼屎乾淨盲……在有生之年榮獲金草莓提名……到而家,個樣仲……唉。

10.時間,對人殘酷,對女人尤其殘酷,對靚的女人尤其超級殘酷(這是我寫這個欄的最深感慨)——因為時間,才會有「曾經」,曾經靚曾經癲倒眾生曾經是一個年代的甜心。我自然不知道此時此刻的Meg Ryan點諗,但只想說:你的「曾經」,早已成為不少人記憶中的「永恆」。
(原文刊於am730)

2015年7月15日星期三

ROBOCAT 462:第二格中V仔的對白,真係有人同我咁講過~結果……


維根斯巴《鉛呀鉛,如何解釋鉛……》


























浪漫的我,正在邊飲緊一杯望落清澈無比的Water,邊睇緊維根斯坦《邏輯哲學論》。如果你睇過呢本好薄(但又好深的)書,應該知維根斯坦用了一種前無古人的點列方式對哲學進行了一場層層遞進的思辯。
我決定扮佢,用這麼一種方式去思考我飲落肚的,水。


1.1:水,就是一個氧原子 & 兩個氫原子的結合,That's All。
1.11:鉛,是人類第一種識得使用的重金屬,有毒,人類不宜以任何方式食用或飲用。
1.12:水 & 鉛,從.來.冇.緣。
1.13:在香港,再冇緣的事與物都可以被完美地撮合。

2.1:過去飲水,我採用的方式是,灌水。
2.11:現在的我恍如變身成一個食評人,逐滴飲,務求嗒真每一滴——我想嗒吓有冇淡淡Metal味。
2.2:正如佳餚能喚起記憶,一杯水,也可令人遙想塵封的往事——畢業後返工時遇上的事。
2.21:我醒在有自知之明,知道自己唔醒(而事實是從來都冇人充分肯定及十分滿意我的工作),但諗都冇諗過在某些人眼中,我原來稱得上蠢。好幾個我跟過的阿頭都試過背地裡、或兜頭兜面話我蠢、冇腥屎,諸如此類。
2.22:我只能硬食,我不懂為自己解釋。
2.23:原來只要我住在那些Water Supply中隨水附送了鉛的屋邨,我的蠢是情有可原。長期飲鉛,會慢慢令腦部玩完。
2.24:第日再遇上有阿頭鬧我蠢時我便可以大條道理為自己申辯:你估我想?鬼叫我由細到大飲鉛!
2.25:小朋友都可以用。下次考試再創新低而被雙親問責時即管大聲疾呼:鬼叫你哋上唔到車搞到我要住啟晴邨!嗚嗚……

3.1:以後不要再說甚麼「社會的錯」了(社會這詞語指涉太多,有點虛無囉),一於改說:統統都是「Water的錯」!

4.1:就快細味完嗰杯H2O了。咦,杯底好似有啲嘢浮吓浮吓……我不怕。做咗幾十年人難道會怕甚麼重金屬?
4.11:我充分肯定及十分滿意回歸後一眾香港高官的工作表現,所以信晒佢哋講嘢:鉛水,只要唔係長期飲用就冇大礙。
4.2:某些白癡電視劇裡的白癡奸角為證明杯酒冇毒,也會率先在主角面前豪氣地自隊一杯。
4.21:該高官也好應該即席乾一杯以釋除公眾疑慮。畢竟,你都係飲嗰一杯咁大把啫——拉勻一生的話。

5.1:據說,出事是因為那些預.製.組.件。
5.11:特首:冇證據顯示香港造的冇事,香港以外的有事。完美KO你我他對中國製組件的疑慮。
5.12:這一個句式的完美,完美到可以置換任何名字入去:「冇證據顯示中國造的冇事,中國以外的有事」、「冇證據顯示中國建築整的冇事,中國建築以外的有事」……反正都係冇證據,證據並不重要。
5.2:我發現自己竟然讀得出「中國建築」而又冇讀錯。在某高官把口中,呢四隻字不是難讀到驚讀錯的嗎?
5.21:不是高官的我讀得出呢四隻字,作為高官的佢驚讀錯呢四隻字——咁究竟,邊個醒啲?

6.1:水,是生命之源。鉛,是生命之完。
6.11:對於不可飲落肚的鉛,人們必須以濾水器隔走——可以隔的話,不會飲。


7.1:Well,終於飲完杯水,我當堂醒咗唔少,開始明白很多過去不明白的事,例如那個鼓勵大家生夠五個細路組織籃球隊的廣告——唔生多啲,邊夠人同你一齊落街搶水
(改咗啲又加咗啲,原文刊於am730)

2015年7月14日星期二

月巴的2015書展


























1.Bello!!!
2.今年書展我有兩本書出:《超人間失格》和《月巴事三》。
3.基於後期工序上有太多改動(因為我太嚴肅認真與麻煩),好遲先俾印廠,所以會先在書展首賣(如無意外,下星期才會在坊間書局有售,sorry)。
4.首賣地點是——「今日出版」攤位(綜合書刊館 1A A18)。在「今日出版」購買《超人間失格》,會即送海報乙張!極度正!
5.至於簽名會時間是:7月18日(星期六)晚上7至8時。地點是博覽道入口。
6.當然我知道大家未必想迫書展,但我也真的超級冀望屆時見到大家,分享一下我臨近40歲終於出到小說的喜與樂。
7.除了兩本新書,現場還有之前出版的《月巴事一》、《月巴事二》、《浪漫月巴睇舊戲》、《ROBOCAT》。極度歡迎大家補購。
8.至於《搣飛割凳》,就冇嘞。該出版社已消失,連我應得的版稅都消失埋。
9.除了書,還有製作精美的兩款ROBOCAT Tote Bag和ROBOCAT iPhone Case,製作數量極度唔多。

10.Tank Yu!!!

2015年7月10日星期五

ROBOCAT 461


浪漫月巴睇女星(35):智妍,要幸福啊!嗚嗚……


























智妍拍拖了,男友不是我。智妍拍拖了,但男友竟然不是我。

1.係朋友都知我情迷T-ara。6位成員我都情迷,其中又以對智妍所付出的情最多最深,最濃也最肥厚。

2.實不相瞞,我也有過一段藐K-pop的歲月,當時經常擺在口中的一句是:超!個個都一樣樣嘅!——當時覺得這一句評論背後,帶有一種看透一切的有型態度。

3.點知,少女時代一首《Mr.Taxi》,為我打開了K-pop大門。最迷的那段時間,我每一日唔聽 / 睇上十次都唔安落——冇錯,K-pop給我的感覺就是一種最重視表象的音樂體系,如果沒有了那些長腿那些舞,我未必會咁快泥足深陷……(題外:少女時代中我鍾意太妍、已離隊的Jessica,但最鍾意的肯定是Sunny)

4.而令我願意keep住留在K-pop間屋裡唔捨得走的則是T-ara的《Lovey-Dovey》。Why咁好聽仲能夠立即為我提供澎湃能量以應付每一天的繁忙工作?而最奇妙是,認識呢首歌,並非靠MV,而是齋聽——我這麼一個最重視視覺和表象的月巴仔,竟然不因為長腿與舞而迷上這首歌!我決定深入了解T-ara。

5.首先我分辨到她們每一個——原來並非好似我當日懶型咁講,個個一樣樣。孝敏,Sexy。寶藍,好Cute Cute(但其實隊中以佢最大個)。𤨒晶,唔錯啦。昭妍,愈來愈靚。居麗,超正呀!至於智妍……

6.我.找.不.到.適.當.形.容.詞。只能說,每次睇MV或她們的演出,我好自然地就會將我對「Terminator眼」Fo落佢度,周圍Blur晒——智妍於我,就是有著這一種超現實的絕對吸引力。嗱嗱嗱你不需要苦口婆心同我講這純粹是化妝或乜乜所致,我一早上網睇過晒她素顏和過去的相,總之,點都動搖不了我對她的愛,OK?

7.然後我集中火力進一步了解智妍份人。Well,我驚覺,自己原來同佢好夾!——A.智妍話佢間房好亂,咦乜咁啱吖我都係喎!B.智妍放假時最愛匿喺屋企,我又何嘗不是?C.智妍好愛食日本嘢,而我就酷愛日式放題。D.智妍愛到連納豆都鍾意食!我呢,接受唔到,不過咁,我咪可以將自己嗰份俾埋佢食囉嘻嘻……E.智妍愛武術,是跆拳道黑帶三段高手(她年少志願是成為跆拳道選手),而我,也算得上是一名武癡,曾修習蔡李佛兩個月有多……是的,智妍彷彿令我回到求學年代溝女時必備的想當然幻想,將自己同朝思暮想的她她她或她,自行找出諸種啱Key(畢竟我的求學年代已經好久遠,所以用番「啱Key」這一個較Old School的形容)的地方。

8.因為(對)智妍(的愛),T-ara成為芸芸韓國女子組合中我最喜愛的一個,喜愛的程度是,她們大部分歌我都能夠跟住唱(即使唔知自己唱緊乜,但這就是音樂最神奇的地方!);跟住唱,冇乜大不了,我甚至會在睇她們concert影碟時,跟埋一齊跳……跳得唔好及唔似,是應份的,但我想說的是:原來超級難跳!《Lovey-Dovey》有幾下打側身一路印印吓一路跳住行的,望落容易跳起來難!《Roly-Poly》開波時有幾下將隻右手扭嚟扭去,同樣望落容易,但要好似她們扭得咁柔順而有勁,超難!還有《Sexy Love》,那種模仿扯線公仔的舞,要跳得硬生生得來但又帶出Sexy感,仲難!而最最最最難是,在一場Concert中她們是Non-stop地Keep住跳的,箇中的體能要求,絕非你話捱得就能捱到……

9.因為T-ara,我順便留意埋其他韓國女子組合(鍾意的計有Kara、After School、f(x)、AOA、EXID等等,不贅了……)。驟眼看,表象上或許只是差唔多的跳舞組合,但表象背後,由訓練到終於出道,都付出了難以想像、無法量化的努力,而最殘忍是,努力不涵蘊成功,不排除終其一生都只在三線尾四線頭徘徊掙扎。

10.因為種種原因,T-ara聲勢似乎是有點滑落,但,我依然支持她們,依然深愛智妍——即使她剛剛宣布拍拖了。一定要幸福啊!嗚嗚……我只係開心到喊啫……
(原文刊於am730)

2015年7月8日星期三

每逢盛夏倍憎Hot(或每逢盛夏要捱得)






















對於夏天,我又愛又恨——錯,其實只有恨。

每逢盛夏,回想那間蠟燭廠……
每逢仲夏,每逢熱到瀕臨中暑邊緣,我就不禁遙想那年中五暑假,在等放榜前去了火炭一間蠟燭廠返暑期工的熱與怒。
有關我在那間蠟燭廠的奮鬥歷程,一早寫過,但不排除你有可能冇睇過,我決定簡述一下。份工,是在勞工署搵的。我呢世都記得工作簡介寫咗以下四隻字:「冷氣廠房」。於是飛奔去見工,而又順利見得成工(這次堪稱我成世人最順利的一次見工),第二日立即上工。
見工時已經想問:哈個冷氣廠房呢請問?——因為我完全感受唔到冷氣,但見工時已是傍晚,員工已經收晒工,熄冷氣好正常……翌日,返工,終於明白冷氣廠房的真諦和所在。蠟燭廠分成兩大part:熱到核爆的偌大廠房 & 長期有冷氣開放的寫字樓——而嗰個神秘冷氣廠房,原來是熱到核爆偌大廠房裡的一間room。而我和同學(當時有幸見得成呢份工的只有我同佢)的日常工作地方,自然是熱到核爆的偌大廠房,但不包括那間有冷氣的room,那間room是阿頭的辦公室暨個人休息室。
OK fine,青春就是要捱得吖嘛,於是每一天便在non-stop地流汗情況下完成諸種工作:整蠟燭、將整好的蠟燭入盒、將冇用的蠟廢料投進一個熱爆的蠟反應堆,另加每星期走唔甩的兩次上貨落貨——好記得有一鑊,突然有批貨偏偏揀在夜晚送嚟,阿頭的唯一手下(亦即我的頂頭上司)說:「嗱今晚我唔得閒,你哋搞掂佢嘞!」然後卸膊的他走了,不帶走一碌蠟燭。
這份暑期工對我的教訓是:1.世界從不公平。當時有兩個跟我同齡的後生仔也有來返暑期工,但我完全唔知佢哋日常工作做乜,只知道佢哋唔使乜都唔使做——他們是某高層的寶貝仔。2.中秋不再煲蠟。誰知盤中蠟,碌碌皆辛苦。3.不再輕信勞工署張貼出來的工作簡介……仲有4.——大個咗,一定要去有冷氣的地方返工。

每逢盛夏,Why要捱熱?
回想,是意志令我捱過那一份工,但我的body,每一個工作天都感到好酷熱。
所以我不明白Why有成年人竟然會將「捱得」同「捱得熱」等同,而同時又將「捱得」作為「青春」的代名詞——成條算式加埋即係:青春,就係要捱得;捱得,就係要捱埋熱。
捱得,是態度是精神是意志;捱熱,是物理狀況,當然你可以用精神意志說服自己能夠忍受酷熱,問題是,body啋你都有味——熱到某一個點,就會(令擁有澎湃抗熱意志的你)中暑,中暑到一個程度,就會死——即使你擁有不死意志。
如果我見到街上的你正在使用芭蕉扇(或任何令你感到有少少涼意的裝備),我絕對不會話你怕熱、鬧你唔捱得。捱熱,除了流到成身臭汗,我睇不到有任何得著。塵世間不是每一樣嘢都值得你去捱。

每逢盛夏選用公共交通工具……
今天的我,終於成功在有冷氣的地方返工了,但不代表唔使捱熱。
不計日常出外工作,就單計由屋企返到office的那段路程吧,一樣有大把熱到我流幾加侖汗的機會。
搭巴士:我搭的不是冷氣巴嗎?Why從風口吹出來的竟是暖風?
搭港鐵:不知由幾時開始,只要一進入港鐵範圍,立即恍如置身酷熱天氣警告下;上埋車,直情好似身處一個迫滿人的沙灘!偏偏貼住我企的那一位不是bikini女郎,而是流汗比我流得更猖狂的麻甩佬(當然不排除對方都會咁諗)。
所以有時我會飛的。一上車講咗想去邊後司機即說:「吓?過海?我就交更咯喎……唉是Q但啦,嗱我唔熟路你一陣提我點行呀費事行錯你話我兜路……開大啲冷氣?好熱咩?開咁大冷氣因住攝親吖!妖香港啲路真係難行xy#z@ax……」
香港之夏,除了熱,仲好慶。xy#z@ax……
(原文刊於am730)

ROBOCAT 460


2015年7月3日星期五

浪漫月巴睇女星(34):翁美玲,原來一直在心中。



























這一次的浪漫月巴睇女星,本來不是寫翁美玲。是一次突如其來的決定。

1.有些人有些事,我以為自己已經沒有了感覺,沒有感覺到一個近乎忘記了的地步。

2.像翁美玲。她離去的那一年,1985年,我讀緊小學。

3.她突如其來的離去,是足以為一所小學不同年級的學生帶來各種複雜情緒。我好記得,當我返到學校時,見到一個師姐,她立即喊住同我講「翁美玲自殺死咗呀……」——我當然也知道翁美玲的死訊,但還是忍唔住回應師姐「係呀……點解會咁……」然後遇上六、七個同學,對話大概都離不開以上模式——我們都忍唔住問「點解」,因為對一班小學生來說,是絕對難以明白事業如日中天又超有觀眾緣的翁美玲,竟然選擇這種方式了結自己生命。

4.Why翁美玲的死會令我們這班學生完全不能 / 想接受?我真的不知道,只知道在她自殺前,才不過出道了三年,但已經在極短時間內爆紅,紅到一個近乎沒有反對聲音的程度,她就是這樣有觀眾緣的一位女演員。

5.大人細路男女老幼都喜愛的翁美玲,或許是「黃蓉Mode」下的翁美玲。1983年播出的《射鵰英雄傳》,分成三輯播放(「鐵血丹心」、「東邪西毒」、「華山論劍」,按著小說故事發展去定名),足足59集(第一輯是19集),以致當年極度鍾意睇電視的我,足足有三個月時間不得不投入箇中的恩怨情仇裡去——先旨聲明,我當年的確鍾意睇電視劇,但(唔知點解地)最憎睇古裝劇,所以對《射鵰》我一直抱持觀望態度,睇又得唔睇又得嗰種,直至黃蓉 / 翁美玲在第九集現身,我同自己講:X!一定要睇呀呀呀!當時年紀小,對於故事中南宋政局、東邪西毒咁多位成年人的恩恩怨怨,我冇太深感覺,唯一有感覺是郭靖黃蓉這對年輕男女,看著他們闖蕩江湖,就像玩緊一隻RPG遊戲——嘩如果我係郭靖就正咯:練到降龍十八掌及九陰真經固然正,但更正是有黃蓉陪伴自己,沒有了黃蓉,練到神功又如何?

6.基於當年的我冇睇過《射鵰》原著,我是完全以翁美玲的演繹去想像黃蓉:靚(Yes,絕對天然的靚)、可愛(而不是賣萌或懶Cute)、率性(我最憎作狀)、有時野蠻(但野蠻sometimes也算是另一種可愛的呈現)、間中衰衰哋奸奸哋(但統統用在對付壞人的時候)——簡單講,就是完美地Perfect,是我在讀嗰間小學甚至塵世間都找不到的Perfect。

7.當我以為《射鵰》的黃蓉已經是翁美玲最經典演出,估唔到,仲有《天師執位》的林楚燕。呢齣劇的好睇程度,已經超出了我的文字形容能力,只能說——當我在Keyboard打到「天師執位」呢四隻字時,我已不禁全身起晒雞皮,並同時想起最後一集的最後一節——我記得當時我住在牛頭角上邨,成間屋十幾個人一齊望住電視,人人不發一言,絕對專心地在睇:究竟林楚燕同司徒文武能否再一次在塵世相聚?

8.翁美玲已成為我最最最最最最喜愛的女演員。無奈,我太細個,只懂得用她演的角色、她的熒幕形象去想像她,想像現實中的她也是這麼一個無憂無慮、能夠輕鬆處理塵世間所有問題與苦惱的可愛女仔……然後,她突然離開了,完完全全的離開了,以我完全冇諗過的方式真實地離開了……然後,很多年過去,我已經不再睇電視,因為劇集不好看,並加上充斥住大量靚得絕對不天然、持續地賣萌及懶Cute、經常作狀而又衰衰哋奸奸哋的所謂女演員。

9.2015年6月30日凌晨我在fb看見一個有關書展的po。原來今年場內會有一個金庸展覽,而個po在問:你認為以下哪一位才是把黃蓉演繹得最好的演員?並附有幾張相:林依晨、朱茵、翁美玲——看見翁美玲那一張裝扮成黃蓉的相,一種匿埋咗N年冇再發作的情緒和回憶,湧晒出來。

10.於是我突然決定寫她,希望讓不認識她的你和妳,知道香港80年代曾經有過 / 失去過這麼一位經典女演員。
(原文刊於am730)

ROBOCAT 459


ROBOCAT 458