2014年3月31日星期一

浪漫月巴睇舊戲(六十七):Peter朱的思考藝術















Peter朱是誰?一個超經典電影角色。如果你不認識Peter朱,原因可能是:你太高尚。咁當然啦,高尚是個人取向,從來不構成問題。

Peter朱是思考細密的騙徒!

按原定計劃,本周應該寫另一齣戲,但因為一單足以顛覆司法界生物學的法庭新聞,令我認為有需要寫《賭俠大戰拉斯維加斯》。
戲名咁叫,但根本就不是去大戰甚麼維加斯,純粹是賭俠要去對付的那個人,長居維加斯而已。
長居維加斯的人就是,Peter朱。一個在大陸專搞豆腐渣工程,成功掠了40億、潛逃去賭城的老千。
他的逃亡生活比起你和我的日常生活都要歎上十億倍——他身光頸靚,長住Caesars Palace,每天在一名好打得近身女友、若干件西人保鑣,以及數名低胸鬼妹簇擁下,賭吓啤,睇吓騷,食吓嘢——簡單來說,唔使Do囉。
如果有關Peter朱的描寫只得以上咁多,是不足以讓他在香港電影名留青史的;他與凡人真正的不同,作於他專走偏鋒的出類拔萃智慧,以及那份張揚的狂。以下便舉兩個例說明。
米奇老鼠X!——那個「X」,我故意唔寫,因為想顧及仲未睇的你的感受。只能說,Peter朱巧妙地用上來自人體內的一種身外物,整了一隻你在迪迪尼樂園絕對買不到的米奇老鼠出來,餽贈遠道而來(捉拿自己)的阿叻。Walt Disney泉下有知的話,都唔知好嬲定好笑。而我,是笑到癲咗。
How to Become an FBI agent?——前事不贅,總之Peter朱同賭俠需要佯裝FBI探員;在僅有資源下,Peter朱犧牲了身上那件名貴恤衫,剪了「FBI」的字樣出來再貼喺自己同賭俠背脊度……這份智慧,賭俠也自嘆不如。

Peter朱是一錘定音金句王!
Peter朱的思考細密和賤格幽默,除了反映在行為上,也透過精湛的語言運用呈現出來。而作為一個超多嘢噏的人,他的說話每每有著一錘定音的效果。
1.當賭俠等人成功捉拿Peter朱後,發生了意外,以致眾人不得不在美國荒漠怒行,期間Peter朱悲從中來仰天長嘯:「天地有正氣,咁行法仲慘過西遊記……」
我們都知道玄奘為取西經,隻馬和悟空八戒沙僧等的確是行咗鑊甘,Peter朱這一句話借用了取西經之艱險,烘托佢本人的嗰份行鑊甘;至於「天地有正氣」的應用,其實呼應著Peter朱另一句話:「天地有正氣,你呢班人衰到痺!」——「你呢班人」是指賭俠等人。
正邪的界線當堂被模糊了。我認,睇到中途,我已不再認為Peter朱是奸角,甚至情不自禁迷上了他……
2.當Peter朱正準備享受面前美女時,一名不識趣的西人保鑣闖入並問埋晒啲廢問題,Peter朱當堂火起,怒道:「阻住人哋X嘢,死咗會俾人燒X袋o架!」話罷,Peter朱醒起對方是西人,於是佢作出即時傳譯:You disturb me fxxking, your SPRING POCKET will be barbecued!!!!!!!!!!!!!
這絕對是電影史上最有power的一句對白。以後再冇人能夠超越。
大多數的人想必都知道SPRING POCKET是甚麼來的,但原來也有一個人,一直將膀胱當成SPRING POCKET。
如果根據這「哥白尼式革命」的嶄新認知,Peter朱這句話應該說成為:「阻住人哋X嘢,死咗會俾人燒膀胱o架!」(嘩,成件事立即變成一門嚴肅的外科手術)啱唔啱?法官大人?
最後講番,扮演Peter朱的正是萬梓良。繼《專釣大鱷》後,他交出了另一次名留青史的經典演出。
好彩我份人不夠高尚,否則便白白喪失兩次笑到核爆的觀影經驗。
(原文刊於am730)

11 則留言:

  1. 萬子良既狂放式搞笑真係無人能及
    夠狂既呂良偉(丁力@上海灘賭聖)唔夠佢搞笑
    搞笑既張家輝(哥頓哥@金雞3)又冇佢咁狂
    真係衰衰格格之餘又不失霸氣
    就算俾人打緊都可以理直氣壯咁叫人唔好打佢整過容既鼻

    回覆刪除
    回覆
    1. 萬子實在太強!有冇睇過80年代的《專釣大鱷》?又是一次狂放演出~~

      刪除
    2. 專釣大鱷當然睇過
      收費電視電影台成日都會播
      月巴兄你都推介過好多次啦

      仲有賭城大亨系列嘅南哥其實都幾有趣
      正如你所講佢嘅狂放式演出係好睇

      刪除
  2. 萬子的確係正! 拍戲可以令人笑到核爆,但我細個時佢做tbb台慶劇男主角既演出係老正類,大家唔好忘記佢既金句:if u think u can, u can!

    令我震撼既重有近年先有機會睇既!

    回覆刪除
    回覆
    1. 睇番胭脂扣,萬子做一個報館編輯,斯文內斂,演技能放能收!

      刪除
  3. 此留言已被作者移除。

    回覆刪除
  4. 奇怪的是,本片令我難忘的是哪個大陸官員. 現實中的中國官僚哪有如此幽默? 此角色有一種超現實感. 我嘆服創作人如何從現實中絕無參照的基礎上搞出這一個角色來. 也許一百年後, 中國終於出現這樣的官僚, 那時, 這個國家將不是目前這個......

    回覆刪除
  5. 萬梓良演Peter朱也很好,作為喜劇反派,他在片子裡真的很搶鏡。

    不過,我最喜歡萬梓良在電影的反派角色,則是《英雄好漢》及前傳《江湖情》的鄧家勇,夠狠夠辣夠毒,他也把角色發揮得淋漓盡致,當年麥當雄設計反派角色真的有一手。

    回覆刪除
    回覆
    1. 我一直未睇《江湖情》和《英雄好漢》…

      刪除