2014年5月9日星期五

浪漫月巴睇舊戲(七十):我一世都記得1999年那半支煙




















我永遠記得,我是在(已不存在的)大華戲院睇《半支煙》。
看的時間是下午,趁訪問與訪問之間的空檔蛇去睇。點解偏偏睇《半支煙》而不睇其他?15年前的心理狀況,sorry,實在不記得了。畢竟是1999年的事。

以下,適合未睇過《半支煙》人士觀看

但我記得,個半鐘後,完場,播著謝霆鋒的《愛後餘生》——從來不是霆鋒fans的我,竟然強烈地愛上這首歌,愛到想即刻飛奔去K狂唱。
《半支煙》裡的霆鋒,絕對MK打扮,有情有義蠱惑仔,名叫煙仔,老母是廟街企街,半生遺憾是不知道老竇是誰。有一天,他遇上從巴西回流的曾志偉;曾志偉在戲裡有一個好威的名字,下山豹。
這隻下山豹,三十年前叱吒江湖。命運安排既打得又型仔的他,有一名宿敵,綽號九紋龍。
二人都是嗰期最具人氣江湖人士,二人一直知道對方存在,只是未遇上交手的契機。
直至一夜,MK的麗霞舞廳。下山豹與九紋龍不約而同上去跳舞尋歡,再不約而同看中了一名美艷不可方物的舞女,舒淇。舒淇當前,雙方終於拔出蓄勢待發的老牛,激戰起來!
刀鋒冷熱情未冷。九紋龍輸了,軟攤地上;下山豹轉身,走向舞女身前,九紋龍突然一下冷槍射向下山豹……待下山豹醒來,發現自己已身處在贏過五屆世界盃的,巴西。
一留就是三十年。過去三十年以殺人為固定職業的下山豹,決定回港報仇。
對於仇人九紋龍,下山豹的結案陳辭是:篤大佬背脊,食兄弟夾棍,穿阿公櫃桶,勾義嫂!
上述的前塵往事恩怨情仇,統統來自下山豹的單.方.面.口.述。
如果你從未睇過《半支煙》而又一直諗住不日會睇,咁講明先,下面嗰截文你千祈千祈唔好睇。

以下,只適合睇過《半支煙》人士觀看
這是葉錦鴻第二齣編劇 + 導演作品。
當王家衛跟你說人有記憶所以痛苦,記憶是痛苦的根源時,葉錦源要說的是:被遞奪記憶,更痛苦。
如果你睇過《半支煙》,你會知道,上面嗰一大段提到的前塵往事,純屬下山豹杜撰,向九紋龍放冷槍的是他,所以才要著草到巴西。回港,更不是要報甚麼仇(掉番轉他被尋仇才對),而是一心找回那名舞女,再見一面——在他終將喪失所有記憶之前。
其實有關下山豹的病,到電影中段已經呼之欲出。他問煙仔:「如果聽日起身你會乜都唔記得,淨係俾你記得一樣嘢,你會唔會淨係記得你條女個樣?」煙仔hea答:「邊條先?」(他有很多女)
「我就會淨係記得佢個樣。」這一句,是下山豹給自己的叮嚀。
回到首作《飛一般愛情小說》,要處理是三對浮世男女的愛情小故事,好睇,但那種好睇未必fit到大部分人(更不排除有人會嫌作狀)。《半支煙》不同,簡單好多,有著一份親切。
1.大部分人睇戲求甚麼?求娛樂。《半支煙》由到到尾我找不到半個廁所位。娛樂性,來自精緻的對白和場面處理。多段對白均令我刻骨銘心,而且統統是「人話」(即人在日常會講出口的);但(以下山豹視角)交代下山豹 & 九紋龍身份和結怨經過的一大段,則勁在零對白——當單純用畫面已經把一切清楚交代了,仲需要講出來嗎?
2.很多香港電影都拍過MK,但《半支煙》中的那個MK,很特別,喧囂荒謬得來滲著一份暖暖的美,而你又不會覺得刻意經營,經營到一個突兀的虛假地步。
3.最重要當然是曾志偉和謝霆鋒。霆鋒是擺明chok的了,但你看著故事隨著時間開展,你同時看到他們那段(唔知點形容才適合的)情誼同時在發展,發展得來有說服力;有說服力,所以感動。
OK,曾志偉終於見番舒淇了,但三十年後的舒淇竟然仲keep住三十年前嗰個樣?有可能嗎?
當年有朋友問我,我當年答唔到,但而家答到:是絕對有可能的——因為當你真心愛一個人,你只會記住對方最.好.的.時.光。「呢個世界咁多嘢要記,搵啲好嘢記吖!」下山豹這樣說。
最後,我想跟葉錦鴻導演說:呢一世,我都會記住這部戲。
就算有一天可能老人癡呆,但至少,我寫過呢篇文。立此存照。
(原文刊於am730)

4 則留言:

  1. 月巴 見你冇寫SPIDERMAN 你會唔會寫X-MEN
    因為入面有我最鍾意既JANNIFER LAWRENCE
    你上次已經冇講CATCHING FIRE 搞到我幾鬼失望

    回覆刪除
    回覆
    1. 暫時未知啊……(我都好鍾意珍妮花~~)

      刪除
  2. 當年我都有睇, good ! 鄧麗君 我只在乎你 good song, very mach with the film

    回覆刪除
    回覆
    1. 一首好歌,絕對能夠為部戲add value~

      刪除