2014年5月23日星期五

浪漫月巴睇舊戲(七十二):香港製造了一班甚麼樣的大人?

















有一齣戲,由這個欄一開波時已經想寫,但又一直冇寫——要寫,我必先翻睇一次,但又實在不想翻睇。我不知道被重重脂肪保護下的弱小心靈是否能夠再負荷多一次。

中秋生命裡遇上的大人

《香港製造》上映時我出來做嘢冇耐,初涉足成人世界,啱啱捱過probation,決定睇場戲慶祝一下。
《香港製造》主角是中秋,一個屋邨青年,有一個所謂手下阿龍(但其實是智障人士)。中秋的自我介紹如下:「我讀唔到中三已經畢咗業,原因係,一半成績屎,點讀都讀唔嚟;而另一半係,香港教育制度仲屎,你想讀都冇得你讀。其實,好似我呢類人,通街都係,大家平時冇嘢做就興玩埋堆,一齊打吓波,打吓交;跟吓人,或者俾人跟。」這麼一個失敗青年,身邊圍繞著一班大人。
1.榮少:中秋大佬(非血緣上那一種)。這個大佬,回歸前已經北上做生意,但俾人過了一棟,懷恨在心。作為金句王的他,經常向中秋貫輸正確做人道理,例:A.「有仇恨就有感情,有感情自然有自信」;B.「你唔好再同我講咁多理由,以前我咪一樣好似你咁窮,一齊岳高頭望個天,同出面嘅色一樣……但係我奮鬥,我努力」(佢託中秋幫佢殺人,但中秋淆底);C.「世界已經到咗盡頭。有人出得起錢,就有人出到力」(中秋正式接了order,準備殺人)。
2.中秋阿媽:在7仔返工,賺得雞碎咁多。有次發現中秋偷佢錢,崩潰了,在社工面前哭著說:「次次叫佢讀番書,佢就攞成龍嚟躂我,人哋冇讀過大學都可以大學畢業係人哋嘅事……人哋做乜先?人哋做戲o架傻仔。」最後,頂唔順,離開了中秋,走咗佬。
3.中秋老竇:比中秋阿媽更早走佬。他在外面有另一頭家。
4.阿屏老母:中秋愛上患上腎病的少女阿屏,但一直被呢個中女阻撓。我們不知道她的正職,只知道她擁有豐富的打發「上門收數人士」經驗。她跟中秋說過最語重深長的一番話是:「我個女得16歲,佢而家死咗,佢永遠都咁年輕;你就慘嘞,有排捱。」(至於阿屏個老竇,由始至劇終都冇出現過。)
5.某名中坑:中秋在公廁遇上他,他正在屙尿,期間一名身穿純白校服的男學生施施然行入嚟,用刀狂劈呢名中坑。中坑是學生老竇,學生有個妹,妹在12歲那年開始一直被這一個中坑 / 老竇強姦。

成為曾經被自己討厭的那種大人
這麼一個成人世界,似乎注定了一個悲劇結局。有關中秋的下場,不贅了;只想說的是,這一個由頭到腳都是成人眼裡的標準不務正業青年,其實沒有做過甚麼壞事,反而做了很多你同我都不會做的事:悉心照顧他的智障手下阿龍——他因為見阿龍成日俾人恰,睇唔過眼,才讓對方跟住自己;他遇上阿屏後,簽了器官捐贈卡,盡捐嗰隻……
他似乎很明白這個(由大人操控的)世界,但又接受不了、或不懂得怎樣去接受這個(由大人操控的)世界。大人認為他廢柴、唔識諗、在浪費青春,他則認為:超,你哋班大人又好叻咩?「有時我覺得啲大人一有事就玩匿埋,玩走佬,真係冇叉用。我真係想攞把刀挖佢哋個心出嚟,睇吓係乜嘢色,話唔定連舊屎都不如。」其實中秋還遇上另一個大人,一個在女校教書的阿sir。中秋把一名自殺少女的遺書交給對方,對方拆都冇拆,便撕成碎片,非常灑脫。聰明的你不難估到這個阿sir跟自殺少女的關係吧。
2014年5月21日,首次翻睇《香港製造》的我,已經在成人世界成功打滾17年,千辛萬苦地成為大人了。我成為一個怎麼樣的大人?我不知道;我只知道,我不想成為那種曾經被自己討厭的大人(但事實係點?偏偏我又不知道)。結果,我只能是一條廢柴大人。
而世上擁有大量比我偉大的大人。既會話自己關愛青年,又會為維護一夫一妻家庭價值而勇敢地站出來(其實他們更應該勇敢地站埋去那些擺明有幾個老婆、女友的名流豪宅門外囉)——有一個,甚至放眼未來,親切地問學生們:30歲時想有自己的小天地嗎?那麼便要在今天開始規劃,清楚知道哪些土地可以用……
我最憎啲大人一面話嚟教你,一面又嚟害你。中秋說。
(原文刊於am730)

2 則留言:

  1. 真正成為咗(不知所謂的)大人0既人係唔會將「大人」呢兩個字掛在口邊,因為佢地唔識得從細路0既角度去睇0野,已經唔記得左自己曾擁有過的那顆赤子之心。

    回覆刪除
    回覆
    1. 認同!所以我尊敬林振強,佢keep到一顆赤子之心。

      刪除