Why塵世間會出現伊波拉呢種咁惡毒的病毒？
黃秋生在《伊波拉病毒》提供了以下解釋：「伊波拉呀，係個天製造出嚟對付你班冚家剷！」
當人肉叉燒包走過南非大地
先旨聲明：由當年知道有Ebola virus至今我一直都叫慣做「伊波拉病毒」。所以，本文一概使用伊波拉，而不是甚麼埃博拉。
睇戲可以增長知識，我正是透過兩部戲認識伊波拉：1995年德斯汀荷夫曼的《Outbreak》，1996年黃秋生的《伊波拉病毒》。
《Outbreak》，典型疫症片：大鑊了，世界爆發了致命疫症，主角們排除萬難尋覓病源以及解救方法。以上過程，便是電影的全部。
《伊波拉病毒》，非典型疫症片——叫疫症片其實不太貼切，疫症只是一個食timing的商業手段，真正落腳點是：肆虐全球的疫症如何令一個（本身已經喪盡天良的）人（更加）喪盡天良。
黃秋生的角色，阿雞，一開波便被安排勾二嫂；事敗後，起了殺性，先後隊冧大佬、大佬跟班，以及那位被勾的阿嫂。各人死法各異，死得最慘烈的是阿嫂，而因為這是一齣三級片，畫面完全冇手軟。那年頭的三級片，是真的三級，不像現在那些，爆句粗露吓ball就講到懶係衝擊道德底線咁。
又因為這是一齣三級片，加上（可能）想向你呈現伊波拉的恐怖，特登加入了醫生先解剖屍體再大方展示壞死内臟的特寫鏡頭——這類鏡頭尚算勉強基於「醫學需要」，黃秋生的殘忍，卻純粹基於經他本人合理化後的殘忍需要：在香港殺咗幾件後，著草到南非的一間餐館，一腳踢，終於頂唔順老闆老闆娘的剝削，大開殺戒，比起當初在香港殺死嗰幾件的手法離譜十萬倍。
問題來了：佢點樣處理屍體？就是整成漢堡扒，精心巧製成非洲叉燒包：「Ladies and gentlemen，細蚊仔and大人，處女登場，African叉燒包！」
謀財害命再把人肉煮成佳餚（我見片中食客都極like這款非洲叉燒包）——冇錯，正是《八仙飯店之人肉叉燒包》的南非版。而這只是《伊波拉病毒》前半部分。
伊波拉而家我發明咩？
後半，黃秋生回到香港。開始進入《伊波拉病毒》真正crazy部分。
當一般疫症電影只管渲染疫症的恐怖，《伊波拉病毒》竟然夠膽將這麼一個恐怖的疫症提升為一種：能力。當人人一瀨伊波拉就只有等死份兒時，黃秋生得天獨厚，免疫，並順利成為病源體。終日認為全世界都在恰鳩佢的黃秋生（「恰鳩我」是由頭到尾都不斷被他重複的自白），就像《阿基拉》裡唔覺意被喚起驚人超能力的鐵雄（咁啱地，鐵雄都堅信全人類都在恰佢），決定用這天賦能力，向全世界報復。
但黃秋生從不認為自己是衰人，他只是一直在這殘酷世界用自己方法掙扎求存，所以當全世界視佢為萬惡病源體時他只會更覺得自己才是受害者，而既然是不明不白地成為受害者，他更加可以理直氣壯大條道理地怒罵天地不仁：「伊波拉而家我發明咩？伊波拉呀，係個天製造出嚟對付你班冚家剷！」
最後，他在大街大巷向途人狂噴血散播病毒，這一刻的他，已恍如在替天行道，他是萬中無一、被安排執行這「神聖」任務的使者——《伊波拉病毒》經典，表面原因是下下挑戰官能的畫面，深層理由是這個癲喪的心/歪理轉換（而你未必反駁得來）。
但要進入這個既深邃又crazy的伊波拉Universe，你必先頂得順那無止盡的暴力色情和粗口。
1.暴力：戲裡冇一個人死得安樂，冇一個人的死狀是不慘烈的。
2.色情：那幾段sex scene，不是極度殘忍就是極度充滿剝削意味。不過，好多90年代三級片都係咁。
3.粗口：我不是那種在戲院一聽見粗口就會笑的人（有乜好笑？）。而當廣東粗口近年已可悲到成為電影本土味的一種夾硬嚟的憑證時，《伊波拉病毒》所有粗口，渾然天成。
最後，Why黃秋生會染上伊波拉？佢老闆羅莽嫌經由正常渠道買的豬肉太貴，經介紹後改向非正常渠道——去一個村民瘋狂感染伊波拉而死的土著村落買。1996年睇到這一段，我冇乜感覺；但而家，好有。
（原文刊於am730）
亮點：最後個句
回覆刪除