浪漫月巴睇舊戲（八十）：給鄺美寶和王小鳳的情書

七月十四。鬼節。最愛鬼片的我當然是寫我最愛的鬼片啦。

返本歸初，我是怎樣愛上鬼片呢？
多得小學時兩齣香港經典鬼片。第一齣，是嚇到我不得不在播映中途哀求大人帶我離場的《凶榜》，我前年曾經在這裡寫過。現在再看，自然嚇我唔到，畢竟我已經到了一個心智成熟的年紀，而今時今日現實中太把生勾勾的人比起《凶榜》那隻「猛鬼紅衫仔」更得人驚……但當年，在全院滿座（而且肯定係人）的戲院，的確嚇到我（在意識上）瀨屎。但驚還驚，我肯定自己鍾意那種驚。
只是1981年的我仲未曉得駕馭 / 享受那一種驚。
兩年後，1983年。另一齣影響我一生的鬼片，出……現……了……（省略號的使用純粹為了營造嗰種詭秘氣氛）某個周六午後，外公突然話不如睇場戲咯，在細路冇得拒絕大人的情況下，便跟住外公去牛頭角的帝國戲院（戲院現址已變成酒樓）。在戲院大堂，我望見我將要睇的那一齣戲的poster。
《猛鬼出籠》——當然不是指隻猛鬼長年被困喺籠而家終於得償所願破籠而出重獲自由，這純粹是個冇乜意思的比喻，故事不過是：上一代謀財害命，被害的人化成厲鬼，誓要向害死佢的人報仇。
但以上統統都不重要，最重要是厲鬼的報仇手法：殘忍、核突、鹹濕。
殘忍：厲鬼生前俾人害，報仇時自然絕不留手，動用手法都是令人產生莫大痛楚的。
核突：既然會令人產生莫大痛楚，畫面上自然需要如實交代給觀眾知道……不詳述了，自己睇吧。
鹹濕：厲鬼的性別是男，well，so……不過，《猛鬼出籠》裡也加插了一段人類vs人類的sex scene。當年沒有三級制，點，在兒童不宜的戲裡是可以露的。
要一個小學生同一時間接收殘忍核突和鹹濕，那種衝擊和震撼，真的是相當衝擊和震撼。但比起兩年前睇《凶榜》，我開始明白到睇（這類既殘忍又核突而且鹹濕的）鬼片時，那種唔敢睇又忍唔住睇的離奇快感（所以我當時真的覺得《驅魔人》好懨悶）。我成長了。

人生交叉，鄺美寶還是王小鳳？
1984年某天放學後，我經過帝國戲院瞥見一張電影poster：《猛鬼出籠II 艷鬼發狂》。海報附有一個宣傳語句：「王小鳳 鄺美寶 豪放演出...」
「王小鳳 鄺美寶」——想必就是海報中那兩位姐姐吧，「Wow，她們好美啊。」我同自己講。
「豪放演出」——當年小學肯定冇教「豪放」，但我又似乎大概估到是甚麼意思……
「...」——估到，全靠呢三點。言有盡，意無窮。
於是我朝思暮想外公會再失驚無神話不如睇場戲咯。但世間事，你愈想得到你就愈得唔到。由中英簽署聯合聲明的1984年，等到沙士後，等到我差不多忘記了《艷鬼發狂》，才因為出咗DVD，終於睇到。
1.《艷鬼發狂》秉承了《猛鬼出籠》的殘忍核突和鹹濕，只是在核突方面收手了一點。
2.故事有少少亂嚟，但依然比起後來大部分（所謂好睇的）香港鬼片好睇，好睇在明刀明槍。
3.有兩場戲極正：a.鄺美寶被女鬼上身後四出勾引麻甩佬，中招的是一名超月巴豬肉佬，二人更被安排在布滿豬隻的豬車裡……殘忍核突鹹濕共冶一爐，睇的時候我甚至不得不向演員作出崇高致敬。b.男主角帶茅山師父回家布陣驅鬼，撞正不時被女鬼上身的鄺美寶，先搞笑後玩人鬼鬥，劇情氣氛急劇逆轉。
4.首集驅魔，還是依靠茅山，今集最後出場的驅魔達人，是鬼佬，擁有一架捉鬼貨車的鬼佬！當同年上映的《捉鬼敢死隊》架捉鬼車充其量只是一個載具時，《艷鬼發狂》嗰部是真的for捉鬼而design的。
5.但我由始至終想睇的都是鄺美寶和王小鳳。故事起圍是：男主角在家有美艷嬌妻鄺美寶的同時，仲搞三搞四搞埋王小鳳（並間接害了兩個女人），行為令人髮指。而我因睇到太投入而不禁問自己：如果我是男主角，揀鄺美寶還是王小鳳？
又真係好難揀。她們大抵永遠都不會被認為是甚麼殿堂級演員，但在我心中，她們的美，不朽。
（原文刊於am730）