浪漫月巴睇舊戲（八十六）：唯一幫到你的人就是你自己

毫無疑問，這絕對是最最最最難寫的一次「浪漫月巴睇舊戲」。不是難在怎麼寫，而是難在寫甚麼。

由9月30日至10月2日的思想掙扎
9月30日，一個氣氛絕對緊張的晚上，向同文阿鼻提及我的隱憂。
他提議：就寫一些同遮 / 雨傘 / Umbrella有關的戲吧。咦OK喎。
第一齣即時被我chok出來的是《開心鬼》。冇錯，就是由開心之鬼黃百鳴主演的那一齣《開心鬼》。但當我翻查資料才發現，康森貴前世朱錦春寄生的應該是吊頸繩而不是油紙傘（但我明明記得有部戲所描述的鬼是依附在油紙傘裡的）……
第二齣被我chok出來的是《黃飛鴻》。由李連杰做黃飛鴻的第一集《黃飛鴻》。有一場，在茶樓，黃飛鴻就是用手上的遮擊退敵人，真真正正示範了怎樣把用來擋雨的遮變成神兵（而大抵只有黃飛鴻才做得到）……不過，我唔想寫古裝片囉。
既然諗唔到，不如唔諗。10月2日凌晨，疲累到核爆的我再一次把自己「釀」坐在梳化，決定隨意揀一齣我目光所及的戲來寫——我望見那隻被我擺埋一二邊好耐的《操行0分》。
我從未睇過。半年前寫一篇有關電影中的單車名場面短文時，有朋友提到這齣戲，咁我咪買囉，但一見演員陣容我卻步，因為冇一個識——其中一個算是認得的，何啟南，一位近年主力拍電視劇的資深演員；在《操行0分》上映的1986年佢只得廿歲，而演的，是一名未夠秤青年阿力。
阿力有兩個friend，一月巴一排骨，月巴的叫肉佬，排骨的叫神友。他們仨，冇返工亦唔見有返學（至少電影未有交代），最叻就是踩單車，所以終日踩單車，在街上見到合眼緣靚車便撻走車內音響變賣。直至有一次，咁唔好彩睇中警校教官架跑車（先旨聲明，警校教官駕駛態度本身極度乞人憎，當初是因為他的乞人憎駕駛態度才激發起三人的報復心理），結果，衰咗。故事由這裡開始。

（被大人標籤的）爛泥V.S（被大人洗腦的）精英
這其實是一個交代「YP仔」（少年犯）怎樣改過自新、走回人生正軌的故事。這類故事，要寫 / 拍到好老土，不難，再加上我本人是出了名憎睇勵志片的，我有預感，自己完美地揀錯戲。
估唔到在這個接近30年後的凌晨，我竟然因為這齣戲，內心泛起了一股暖意，同時又起了一點雞皮。
阿力、肉佬、神友三個YP仔，被感化官安排去一間由一名老伯經營的石油氣舖返工，工作，就是充分利用他們的單車技能，送石油氣。一如所料，他們工作表現絕對差劣。在他們仨堅信爛泥扶唔上壁的前提下，感化官偏偏相信，任何人都有能力改過自新，並決定訓練他們踩車，參加真正的單車比賽。
比賽，自然需要對手。在戲裡擔任三名YP仔對手的是四名警校精英——Why叫他們做精英？因為他們的教官一直咁講：「你哋係警校嘅精英，同其他人唔同！」這個教官，就是之前提到、駕駛態度極度乞人憎的那一個。多得佢，四名警校精英在耳濡目染下都當正自己高人七等，對於作為少年犯的阿力等人，更多次作出挑釁性侮辱，或侮辱性挑釁，總之就是既侮辱又挑釁啦。
這不是甚麼偉大傑作，但在永恆缺乏青春片的香港，《操行0分》稱得上奇芭，奇在沒有單純（或天真）地歌頌青春的浪漫，反而用上兩種身份對峙來描述青春的分野和選擇：當有些青年是（被大人洗腦成）得天獨厚的精英時，也有一些，則是（被大人標籤為）爛泥扶唔上壁。你可以話太過一刀切，但我認為呈現了某種真實感——（被大人洗腦成）得天獨厚的，真的以為自己大晒，賤視大部分（地位比自己低的）人；（被大人標籤為）爛泥扶唔上壁的，漸漸相信了自己真的爛泥扶唔上壁，而表現得更扶唔上壁。
但塵世間根本不存在絕對的得天獨厚，自然也沒有絕對的爛泥扶唔上壁——爛泥，一樣能夠戰勝所謂精英，關鍵是信念，感化官由頭到尾都相信他們：「你哋要記住，唯一幫得到你哋嘅人，就係你哋自己。」結果這三個YP仔，真的在過程中靠自己，幫了自己，改變了自己（至於那個石油氣舖的阿伯老闆，他由一開始超級頂唔順呢三個後生仔，到後來竟然出錢出力支持他們參加比賽）。
有理由相信，這齣戲當年上映時應該冇可能收得（冇打鬥也冇乜笑料，有的只是青春和單車及一班不知名新人演員），此時此刻的我卻因為這齣戲，唔知點解地泛起了一股熱情的暖意，起了一點感動的雞皮。這是一齣30年前的戲，但裡頭所說的，永恆啱用。

補1：女主角，劉芊蒂。她當年被星探發掘，80年代拍了不少戲。
補2：最後一場戲，單車公路賽。應該是香港電影史上唯一一齣這麼認真地拍下一場單車比賽的戲。
（原文刊於am730）