好憎上街的我，寫在7.1上街前

7月1日早上10點我打緊稿，望出窗，正在落大雨，不期然在心裡爆了一句粗——我回想起去年遊行時在中央圖書館前企定定擔住遮足足45分鐘的景況。

我討厭每年這一天都要上街
平日，我絕對冇咁神心咁早打稿。這篇每逢星期三刊登的文，我總是在臨近死線才交稿（收稿的編輯最清楚），但今天這一篇，不得不提早寫。
一陣要上街。實不相瞞，我是絕對討厭每年這一天都要上街，而上街，目的不是去食buffet、放題，又或去我的心靈滋潤場所旺角信和；上街，就是上街，夾在人群裡，任由頭上的烈日猛曬，或被雨水兜頭淋（又或兩者有預謀地交替進攻），沿途又要聞住自己和別人的臭汗，聽住自己和別人的自言自語（通常是粗口），行吓停吓行吓停吓行吓停吓……
我承認，近幾年都沒有入維園默默等待出發，而一直是插隊。我實在頂唔順在維園裡等等等等等等，等唔知邊個發號施令，等唔知邊個放行，等到仲未中暑的自己終於可以起行……有人說在維園集合的才會計落實際遊行人數，插隊的不算數（遊行人數多唔多少唔少其實有眼睇），但反正到最後，警方都只會用甚麼「最高峰時遊行人數」來交代一切。但甚麼是「最高峰時」？唔知。這個難以明白的形容，其實一様可以換成「天氣最熱時」、「太陽最猛烈時」、「狗屎落得最勁時」、「警方做到最躁時」……
而最無奈是，行完了，就只是行完了，連一句「Yeah」都喊不出來，因為心知肚明，行完了，不代表會得到甚麼，頂籠只換來高官例牌的一句「政府會聆聽民意」（有時會加埋「虛心」二字，但所謂虛心，不是來自心虛）；然後，一切照舊，又或變本加厲，市民以用血與汗組成的聲音，只是一陣唔覺意掠過高官的耳邊風。
而更無奈是，汗流了鑊甘後，還要享受由冇上街的人豪俾你、分有不同等級的冷水：
第1級：超都唔知行嚟做乜攞嚟辛苦。
第2級：就係你哋呢啲人嘈生晒乜都反對阻住地球轉。
第3級：唔好話我話係啲冇嘢做同冇運行嘅人先會去遊行集會。
而我偏偏就是個「冇運行」而又參與過遊行集會的人。
所以每一年我都同自己講：下年咪搞我。但到了下一年，又行。

選擇題：A.《雞蛋與羔羊》；B.《北京北角》
這是一個最能夠表現自己條氣唔順的機會。
平日，你條氣再唔順，你只能：A.一啖吞咗佢當冇事發生過；B.透過言語發洩出來。
選擇A，傷身；選擇B，一個人的聲音太薄弱冇人會理你，又或當你黐線。
但這一天，不同。出得嚟行的人，即使想法點都會存在微妙的差異（這是絕對正常的），或所支持的陣營不同，但基本立場一樣，就是條．氣．唔．順。有這麼多條氣唔順的人同你一齊展示條氣有幾唔順，我覺得自己不再孤獨，而且條氣唔順得來理直氣壯。
當然，不排除遊行隊伍中有佯裝同路人的「鬼頭仔」潛伏（我終於明白點解香港電影裡的臥底角色，總是咁乞戲裡的人憎，原來當現實中出現誤導你中伏的「鬼頭仔」，真的極度乞人憎，而差遣別人去做「鬼頭仔」的，直情賤到天地不容）。
又當然，不排除有人會問你Why條氣唔順？如果對方不是詐瞓、扮懵、既得利益者（又或甚麼幫X出聲者），而只是不自覺日日接收由單一渠道（例如TBB）發放的資訊，不妨同佢詳細解釋條氣唔順的理由。
最後。不少人總是宣染遊行、公投、佔中等反抗行為所帶來的負面影響，有破壞冇建設。我想講：反抗的結果若是毀滅，那它就違反了自身邏輯……反抗者的邏輯是要追求正義，絕不在生存的狀況裡再增加不正義；畫量用清楚的語言，不使普世的謊言更擴張；正視人的苦難，為爭取幸福而努力——以上，見於卡繆的《反抗者》。得閒時睇這類書，有意義過參與甚麼齊做雞蛋仔創世界紀錄。
這一天，你可以上街，也可以安坐家中食花生；可以聽《雞蛋與羔羊》，也可以享受《北京北角》。
（原文刊於am730）

補：我只係齋行。向留守者致敬。