我們再平凡，還是擁有發夢的權利。
或許你在人生中，也曾發夢有朝一日成為奧斯卡最佳導演、康城影帝或影后、諾貝爾乜乜獎（乜獎都得，但千萬不要是和平獎，因為隨時攞唔到獎）得主……
媒體追訪狀元，家長向我施壓
你應該明白，上得台攞呢啲獎，總不能求其講句「Thank You」就落台，畢竟台下正注視著你的人，都在渴望聽你的一番感人至深說話或鼓動人心言辭（但應該不會想睇你唔知點解地keep住喊到豬頭，但又唔願返落 台喊——yes，就像香港樂壇頒獎禮那些得獎者），所以，你其實不只在發夢成為以上各類成功人士，而是在發夢自己正以成功人士姿態發表偉大的演說。
我心頭冇咁高（畢竟要成為甚麼奧斯卡導演康城影帝諾貝爾乜乜獎得主的背後，牽涉太多外交關係），過去一直令我魂牽夢縈的只有：狀元。
自小我就被（迫）訓練注視狀元。無論政治氣氛經濟情況如何，每年放榜，各媒體都必定追訪那一群狀元（即使說是一群，其實咪嗰十幾個），而偏偏屋企人總會在 新聞播放狀元訪問時冷冷地加一句：「你睇吓人哋～」——那個被故意拉長來講的「哋」字所涉及的複雜情緒和意味，相信連外國人甚或外星人都感受到。
狀元公式Q&A
於是我在距離考公開試仲有排的童年，已開展了「睇吓人哋」的艱苦生涯。結果，哦，原來咁咋。
Q1：有冇死讀書先？——狀元耍手擰頭。
（我果然擁有做狀元的潛質！對於死讀書我是直情憤恨到一個不．讀．書的地步！）
Q2：咁平日勤唔勤力溫書先？——狀元總是答：「都唔算好勤力。」說時仲有啲唔好意思。
（在這方面我認為自己比他們更勝一籌——在勤力方面我是完全不勤力的。）
Q3：讀書以外有甚麼嗜好？——狀元答案通常是：打波打機彈琴行山游水諸如此類。
（偏偏冇狀元會說自己熱衷追逐愛情。自小便在這方面投放大量時間心力的我，無疑比狀元優勝。）
Q4：大學打算讀邊科？——狀元的答案離不開一些悶爆的例牌專業學科。
（我的答案差唔多，誰也勝不了誰，但同時隱隱然證明，我同狀元人同此心心同此理。）
我開始相信，我極有可能成為狀元，在放榜日接受眾人祝福以及傳媒提問。結果，1992年暑假，我做不成狀元，而只是個考到十幾分兼有一科成功攞F的徬徨會考生，睇住別人接受眾人祝福的同時自己就忍受著親友質問。
我的狀元演說（2014仲夏版）
即使我同狀元無緣，但N年前我就未雨綢繆做好了一份他日高中狀元的記招講稿。反正冇機會發表，便在這裡公開吧。基於講稿完成多年實在有點過時，亦已經再冇傳媒會問上一段的那四條廢問題，一問就問些勁尖銳的，我惟有大幅修改，修改成一份切合2014年政治環境的。
「Firstly，主流意見認同，在香港讀書好痛苦，苦在要考那個甚麼DSE。以前，較多意見認為，你只要肯用功讀書，你總能夠憑藉用功而換來一定分數； 但現在，不少意見認為：已經冇呢回事。像今年那份中文科死亡之卷，我拎到好成績，只能說好彩，好彩在遇上認同我觀點的評核員，而不是『張』融的支持 者……Well，我諗你哋最想知的都不是呢啲吧，入正題吧：如果俾我做特首，我選擇做一個經由公民提名而最後當選的特首，我諗，咁點都比一個只由689人 選出來的馨香100萬倍吧；但睇個勢，應該到我有番咁上下年紀資歷時都依然沒有這回事，所以惟今之計，佔中吧。我說以上一番話，是基於良心——題外話：如 果有人竟然夠膽問良心究竟係乜？他不是無知，就是冇良知，又或既無知兼冇良知。其實，做到狀元又點？做唔到狀元又點？因為社會普遍認同，做富二/三代或高 官子女比起做甚麼狀元在人生路途更無往而不利囉，而且已得無數事實證明。你哋呢班大人俾我唞吓啦，好嗎？嘿。」
（原文刊於am730）
廣告時間：我本人三本新書《月巴事二：（從來未聽說）世間一切美好》、《浪漫月巴睇舊戲》、《Robocat》已經出版！本周日下午5點我更會迫入書展幫大家簽書，請支持我呢個非狀元的月巴系小作者
沒有留言:
發佈留言