魔鬼天使

魔鬼天使，跟我同年代的熱血男兒一定聽過呢個名，或睇過呢齣戲。
但現在不是要談論呢齣「經典名片」，而是借個名來講兩個美國人。


No.1

一直唔明，魔鬼天使指涉的是一個本質係魔鬼的天使，還是一隻我本善良如天使的魔鬼？又抑或是天使mix埋魔鬼的混合體？這些無聊問題，從來只會困擾著我呢類無聊人。
最近也有一個問題深深困擾著我。究竟當初是邊位仁兄，提議、推介或引薦Katy Perry參與《芝麻街》的演出？只要留意一點樂壇或娛圈，自然肯定知道Katy走的是邊種路線，以及是邊種路線令佢走紅——咪性感囉。而Katy的性感還要是最本格的那一種，即衣著疏爽，並不像某類偽/藝人般同你講的甚麼性感是一種感覺之類的形而上式大話……
還有，哪一首Katy的歌才適合同Elmo合唱？《I Kissed a Girl》？《Ur So Gay》？最後總算選來一首好似冇乜敏感嘢的《Hot n Cold》，只是Katy Perry就是Katy Perry，始終忘不了她的原始武器，低胸上陣，終於惹來一班關心子女身心發展的家長抨擊，在人言可畏的情況下節目「完美地」被抽起。
我會諗，是否製作人或Katy一時間捉錯用神，以為美國好多爹哋都愛陪伴子女睇兒童節目，為免悶親爹哋，於是……所以……先至著成咁？
抽起還抽起，總之Katy已經把這段片放上YouTube任君觀賞。我睇過，可能冇養育子女的羈絆，完全唔覺有問題——尤其對照Katy在第二張專輯《Teenage Dream》裡的扮相時。
封套上那個全裸躺在雲海上的扮相，還叫做OK，但另一輯宣傳相（只要你在過去個多月有使用過某大型運輸工具的話便一定見過），Katy穿上一件不知道怎樣形容的「戰衣」，笠上一個完全唔襯佢的假髮，在奇詭的燈光下搔首弄姿，連最冇要求的我都覺得成輯相頗為——bad taste。
直至睇埋《California Gurls》的MV時才明白，或許bad taste真的是Katy是次的目標。MV裡的Katy穿上bra top，top上離奇地安置了兩個放滿cream的果撻，當歌曲到了高潮位時，Katy用力一夾，竟然唧出兩道新鮮的cream來！Wow！我以為自己睇緊90年代初的港產三級片啊！


No.2

真正的魔鬼天使是Amanda Seyfried才對。
有冇睇過那齣被喻為極級爛片的《Jennifer's Body》？或許，大部分（男）人去看呢齣片，都因為Megan Fox；但我想講，Megan Fox的型格實在太外露了，在A級成本製作下，尚可以展現那份過份外露的魅惑，但一換上B級片規模，當堂淪為一個活躍於B級片的冇腦女星stereotype（事實上戲裡的她的確被塑造成好冇腦的）。早前她擔正的那齣《Jonah Hex》票房慘淡，我可以預見，B級片的懷抱正在默默等待著她……
真正想講的其實是在《Jennifer's Body》裡扮演Megan Fox同學的Amanda Seyfried。
第一次看Amanda擔正的戲是《Mamma Mia!》，只是這齣戲由始至終的主菜都是梅姨和ABBA的歌，而Amanda演的是個渴望愛情渴望自由的希臘純情少女——她絕對稱職——天生擁有的一雙明眸的她，簡直就是現實裡的一個治癒系天使，的確……好吸引我呢類渴慕天真純愛的傻佬。
但估不到，一齣《色破孽緣》令我看到Amanda的魔鬼面向。一個明明可以拍得好爛兼好鹹濕的老婆懷疑老公有嘢的故事，在名導伊高揚處理下，竟成為一齣誘人的現代中產階級家庭畸情戲劇——誘人的部分，就由Amanda一力承擔。裸露自然是少不免的（但又不會淪為鹹濕），但Amanda真正厲害是用一雙眼去魅惑戲裡那一個表面美好實則蛀滿了蟲的家庭——爹哋、囝囝，甚至連媽咪都不能倖免。那一雙曾經讓我看見天使的眼，這一次影照出來的，是魔鬼。
奇在做完試圖訴散人哋全家的魔鬼後，Amanda又可以在《Dear John》和《Letters to Juliet》這些純愛片裡，做回一個為愛而生的天使，那份魔性，消失了。即使戲算不上好睇（《Dear John》直情稱得上難睇），但因為Amanda，我依然睇晒。
咁究竟我想Amanda在未來的日子裡多扮天使還是魔鬼呢？好難答啫。Mix埋得唔得呢？
（原文刊於am730，幾個月前的了）