等了又等，世界盃終於來臨，我好興奮！
假的。識我的人都知我不是球迷，講得出名的球員五隻手指數得晒——但至少，我知道美斯並非高大威猛。
原因不明，我就是唔鍾意睇波。
曾經有同事知道我唔睇波後表現得極度驚訝：「你唔睇波點算係男人？」說這句話的，是一個女人。
被一個女人大聲話自己唔算係男人，實在成何體統，情何以堪，所以我曾經迫自己學睇波，但睇來睇去，都只是睇到一班人喺度追住粒波，追到嘞，又唔知想點咁，想起腳又唔起想射又唔射——Well，或許這就是足球的本質，但這種本質明顯令我好懨悶。但人生在世的本質，往往就是要你去面對很多懨悶的事情（例如返工），有時仲要表現到好投入好亢奮（例如返工）。
唔知由幾時開始，流行成班同事約埋去睇世界盃揭幕戰或冠軍戰（甚或任何一場賽事），為了跟同事打成一片不被排擠，我通常會去睇埋一份。
但問題來了。我明明完全唔識睇波，偏偏足球是一門擁有大量專業術語的運動，而我又不想露底，俾同事知道我對睇波原來既不熱愛也不專業。
惟有惡補。就像以前臨考試前一晚先來死背爛背，我把一大堆足球場上的專業術語生吞活剝死讀：濕手巾、彈琵琶、單蹄馬、帽子戲法、打荷包、晒靴、炒芥蘭、白頭麼囉、波係圓嘅、一係入一係唔入……
我認為，我夠料去專業地鑑賞足球賽事了。
這才是真正常用的專業睇波術語
來到現場，我發現自己的挑燈夜讀是多餘的。現場所見，專業睇波人士所動用的真正足球術語，都不是我死讀的那一堆；而當我懶勁咁拋出一句「帽子戲法」時，同事們更寸我：「大佬你而家起題咩！」（我一直從事傳媒行業，「帽子戲法」是潮流版每當介紹帽時最愛起用的大題……）
綜合多次睇波經驗，真正獲專業睇波人士經常使用的足球術語，其實是以下10個：
1.「射啦！」——使用於球員帶波作勢進攻時。其實，只要個波出現在球員腳下，而佢又面向敵方龍門，就可以嗌。我曾經聽過有人在一開波時就嗌。
2.「頂！都話咗射啦……」——使用於睇波者狂嗌「射啦！」而場中球員未有趁機射的時候，以致個波被敵方剷走，又或球員本人帶失或交失。
3.「唉，咁都唔入……」——使用於球員終於肯射波而射不進龍門時。睇波者總相信只要球員肯射，就一定射得入。那個「唉」字，有時會用「X」代替。
4.「識唔識踢波㗎？」——使用於睇波者不滿球員臨場表現時。每個睇波者，心裡都有一個費格遜（其實我不知費格遜是誰，但聽曼聯迷朋友講得多，知道佢應該勁過甚麼莫椰絲）。
5.「交啦！」——使用於球員死帶波而唔肯交波時。
6.「靚波！」——使用於（你捧的那一隊）入波時。
7.「Yeah！」——使用情況不明，總之當你睇波睇到內心想Yeah時，便Yeah出來吧——Yeah，就好似那些TBB劇裡的藝員。
8.「趕佢出場啦……」——使用於乞你憎的球隊/球員疑似犯規、而球證對俾唔俾紅牌猶豫不決時。有理由相信，好多議事廳中的議員官員心裡面成日講。
9.「有冇搞錯？」——使用於睇波者感到球賽局勢有冇搞錯時。至於怎様才算有冇搞錯？好難講，畢竟每人心裡把ruler都不同，正如有人認為社會上一流的人不從商是有冇搞錯，有人則認為三流的人竟然去從政真的有冇搞錯。結果所謂一流的人和三流的人「合作」，成件事變成九流，才是最有冇搞錯。
10.「X！」——此「X」等同第3點所提及的那個「X」。使用情況極度廣/空泛，睇波睇得開心時可以用，睇得憤怒時可以用，睇到好鬼悶時一樣可以用。這個「X」，靈活到可以在球賽以外應用，我最近一次使用，便是睇見長毛變成短毛的時候。
趁仲有時間，學好以上10大足球術語，讓你更專業地投入世界盃熱潮。如果發現身邊人唔識，你不妨同佢講：「你都受過教育，應該識尊重球賽。」是的，加點專業的官腔會顯得你更專業。
（原文刊於am730）
沒有留言:
發佈留言