浪漫月巴睇舊戲（七十四）：一隻《五福星撞鬼》DVD，令我理解白皮書……

6月10日，星期二，發生了兩件事：1.突然爆了一份甚麼白皮書出來；2.突然俾我在一間你呢世都未必會去的影碟舖搵到《五福星撞鬼》DVD——以上兩件事，不存在任何關係。

剝削完遇殭屍賭番鋪然後打鑊甘
咁多年來我只是睇過一次《五福星撞鬼》，當時是租LD看的。睇完嗰一刻，我好驚訝。
《五福星》系列向來必然是大製作，但《五福星撞鬼》……嘩，嗰份低成本味和甩漏味湧晒出來。睇完嗰一刻我好驚訝，驚訝到咁多年來都冇意欲翻炒。
然後二十年過去，到了6月10日那一天，當我事隔多年重看，那份低成本味和甩漏味依然濃厚，但今時今日的我，已經不再受囿於呢啲表面嘢上。我真的長大了。
這一次二十年後的重溫，讓我找到了《五福星撞鬼》的奇妙——這個「奇妙」，是中性的，不含褒貶。
1.奇妙的結構。一開波便毫無先兆地俾你睇一場陳百祥邱月清街頭被襲戲，陰公的阿叻，被當場打死，死狀異常恐怖。然後，接回我們熟悉的五福星，而且一如所料，就是一連串他們自吹自擂但又媾女不遂的情節，搞足一大輪，突然好青春咁話去camp，跟住又搞足一大輪，突然遇上一隻女鬼以及已變成鬼的阿叻，但佢因乜事而要死呢？又要搞足好一大輪才捨得交代（邱月清亦終於再出場）；到了最後，自然是以一場大戰埋尾，洪金寶的鷓鴣菜終於有機會大展手身手了。
2.奇妙的結構，引致成齣戲夾雜了好幾種類型風格：A.剝削片。媾女與揩油，五福星的存在意義。一如以往，繼續對女性大肆剝削。B.殭屍片。當你睇到22分鐘左右，劇情突然一嘢便轉了去撞鬼，而咁啱那是一隻女鬼，有尖牙兼夾性上癮的。C.賭片。Yes，突然穿插了兩場其實cut咗都不影響大局的賭戲。D.警匪片！劇情終於接回開波那一場了！究竟邱月清身份是？每次出場都例必同邱月清濕吻的奸角又是經營著甚麼邪惡勾當？E.打鬥片。既然一切謎底已經解開，自然要打番場，如果唔係，使鬼搵洪金寶。
3.經歷了以上一輪奇妙旅程，一切所謂謎團都有了答案，但唯獨一樣沒有——Why那隻女鬼會長住在那棟梅窩豪宅？大概連佢自己都不知道。

劇情簡介，非事實之全部。
實不相瞞，這一次我睇得好開心。反正成套戲由始至終都充滿了突如其來的不求甚解，咁咪陪佢癲囉，點都好過那些煞有介事把一堆社會事件擺上枱，但最後只能以一場碰碰車來埋周的嚴肅電影。
開心，也因為馮淬帆。他演繹了多個真的令你笑得出的gag，但最好笑，是以下一段對白：「如果我當初唔係喉嚨發炎，冇同細佬一齊參加歌唱比賽，咁今日就有黎緊冇黎明o架嘞。到而家嗰隻《對不起我愛你》都係我幕後代唱，但係個細佬又成日出嚟秘撈，出嚟唱嘢唱到走晒音，咁你話啦，做大佬嘅見到佢咁，傷唔傷心？」他當時正在冒充黎明細佬媾女，名字是「黎緊」（然後秦祥林和吳耀漢有樣學樣，一個扮劉華阿哥「劉德住」，一個扮周星馳孿生兄弟「周時遲」）……
但我發現到更勁的一個（隱藏）gag，是來自嗰隻DVD盒背的劇情簡介：「這是一部典型的香港喜劇鬼片。影片講述了外號叫『鷓鴣菜』、『羅漢果』、『犀牛皮』、『花旗參』和『大山地』的五個香港青年整日想入非非，即（懷疑寫錯字，應該是想寫「既」）想輕鬆賺錢，又想有漂亮的女友相伴，但又不想踏實工作，結果一事無成，只能得過且過，混日子，打發時光。一日，他們五人一同到離島遊玩，卻不料晚上在一棟陰森恐怖的大屋內傳來陣陣淒厲叫聲，在好奇心驅使下，他們五人也展開了這次撞鬼之旅。」
OK，假設塵世間有一個人，本身對「五福星」零概念，咁啱睇見呢段劇情簡介，覺得幾正喎而買咗嚟睇，佢會冇乜感受？A.興奮——嘩原來劇情咁跌宕咁起伏不定，正呀喂！B.憤怒——WTF佢哋五條友都算青年？C.有冇搞錯——嗰段劇情簡介實在太過不盡不實了，寫嗰條友也太hea了。
而原來，所謂基本法隨時只是一齣戲的簡陋劇情簡介，幾十年後突然爆出來的白皮書，才是劇情簡介所指涉的那一齣傳說中的戲（而且不排除日後會狂出director's cut）。除咗撞鬼，我諗唔到另一個形容。
（原文刊於am730）