2014年4月30日星期三

友誼不是脂肪,不會永固……




























2014年4月26日中午12時一瞓醒,我便開始忐忑。7粒鐘後,我會見番27年冇見的小學同學。

27年前的紀念冊金句示範

中五那一年,很多同學都搵人寫紀念冊,我冇。但小學畢業前,我有。
中五時寫紀念冊,同學都偏向寫一篇動輒幾千字的抒/濫情論文;小學雞年代,反而言簡意賅,一句起兩句止,而且一係唔寫,一寫便會寫啲(自己根本冇可能做到的)大道理,例如最勁的一句:「萬丈高樓從地起,學問也是同道理!」但更勁的是,喺你本紀念冊寫下呢句豪邁語句嗰位,隨時是考第尾的。
另一組深受同學愛用的語句,則涉及友誼的本質:
1.不受地理影響——「流水不因石而阻,友誼不因遠而疏」
2.不受物理影響——「人如流水處處飄,我倆友誼永不離」
3.可用比喻理解——「萬里長城長又長,我倆友誼比它長」(升中學後認識了一名生性不羈的男同學,佢話佢曾經將當中「友誼」二字改成另外兩隻字,結果臨畢業,先俾搣時罰鑊甘……改咗做邊兩隻字呢?由於有點不雅,不方便在這裡公開。)
我那本紀念冊,大概有廿幾句「萬里長城長又長,我倆友誼比它長」。結果呢……升上中學後已經斷晒聯絡。或者咁,到了中五我冇再搞呢啲門面嘢。我已經不相信友誼會長得過萬里長城。
友誼不會永固,反而我身上的脂肪更頑固。

摷我請留言
去年仲夏,我個blog突然收到以下留言:你係咪XXXX學校(我就讀的小學名字)個YYY(我個真名)?
小學同學竟然可以摷到我。事情是這樣的:收到留言的前一個晚上,小學同學們剛剛搞了第一次聚會,席間還有以前的班主任。期間班主任提起我,說在這裡曾經見過我個名(當時仲未用「月巴氏」這麼一個咁勁的筆名);他們便憑著這一點小線索,摷摷摷摷摷,終於在茫茫Google海裡摷到我,再留言給我(如果不是在這裡寫嘢,還會有跟小學同學重逢的機會嗎?)。
大半年過去,卒之約實4月26日見面。對於這個聚會,我是極度亢奮的——在4月前。一踏入4月,我便開始忐忑,而愈臨近4月26日我就愈忐忑——當晚我也有把這感受講俾同學知,他們問我點解,我都唔知點解——當時只解釋:可能是自己近年變得自閉,不擅交際(呢樣係事實嚟)……
事後,細想:我已經到了一個坐擁大堆(對我來說重要的)回憶的年歲,之後仲有幾多年命仲有幾多路要走?我真係唔Q知,但就是害怕一些突如其來的外來衝擊,衝擊自己那顆被層層脂肪妥善保護著的纖細心靈。我驚27年後的我令同學失望,我驚重聚的感覺不似預期——而最驚是:難得地失而復得後,然後某一天,再一次失去……我承認我份人其實好煩。
有關當晚的真實感受,如下:
1.愉快。愉快是因為,當年的友誼依然存在,無需花時間重新認識,已經進入狀態。
2.更愉快。更愉快是因為,同學們都想好好keep住這段失而復得的友誼。
友誼,其實不需要長過萬里長城。Keep到,已經很好。

最後,勉勵同我哋懶friend的港鐵。
有感而發,好想送上小學雞紀念冊金句,給近年經常向我們訴諸感性販賣感情的港鐵。
萬里長城長又長,等車時間比它長——這是蘇局長永遠都不會明的數學問題。
萬丈高樓從地起,高鐵也是同道理——係咯,點解唔勘察清楚塊地?唔挖到底呢?
一串光陰一串金,串金難買串光陰——我由始至終都唔恨搭高鐵。最慘啲金,我有份。
(原文刊於am730)

4 則留言:

  1. 想當年,我是真的很喜歡寫紀念冊,中七那年直情俾同學仔當面指出我掛住寫而唔溫書。想寫,不是因為相信友誼永固。剛剛相反,是因為深明日後大家的路不同,所以很想很想寫下當時當刻對對方的想法,再用膠紙重重密封,作為重視對方的一點憑證。

    PS. 小學時我係寫「玉不啄不成器,人不學不知理」的。

    PSS. 最近執屋,發現左一份遠古AM730,有WORKSUPERGUY的,先醒起當年你係用真名,後來先改做月巴(還是寫樂評已用月巴??)

    回覆刪除
    回覆
    1. 我中五時冇寫紀念冊,而家有啲後悔……
      我是在2008年開始轉用「月巴氏」,因當時工作問題不能再用真名(但月巴氏呢個名其實是2004年,在另一本雜誌開始用的)。

      刪除
  2. 畢業後很久看回中學的紀念冊,竟發現有位平時不是一起玩的同學,說她其實和她的朋友們並不夾,很羨慕我和我的best friend的友誼。當時不察覺,看回這段字才想起她當年可能很寂寞。至於最friend那幾位,寫了十多廿頁,且用膠紙封起了(每個人都這樣做)。至於小學紀念冊,與你的一樣,也有很多「萬里長城長又長」,或my pen is blue, my friend is you的句子。(講多句,印象最深反而是某小學老師贈我的話:驕兵必敗。我到現在仍不知道她是否覺得我很驕傲。

    回覆刪除
    回覆
    1. 中學時有同學找我替他寫紀念冊,我見其他人都寫好多字,結果入鄉隨俗也寫了好多字(尤其幫女同學寫時寫得尤其澎湃)……
      但其中一個女同學,因為一些事,我死都唔肯幫佢寫。當時我覺得自己好型,現在,只覺得這舉動很小器和低能……

      刪除