友誼不是脂肪，不會永固……

2014年4月26日中午12時一瞓醒，我便開始忐忑。7粒鐘後，我會見番27年冇見的小學同學。

27年前的紀念冊金句示範
中五那一年，很多同學都搵人寫紀念冊，我冇。但小學畢業前，我有。
中五時寫紀念冊，同學都偏向寫一篇動輒幾千字的抒/濫情論文；小學雞年代，反而言簡意賅，一句起兩句止，而且一係唔寫，一寫便會寫啲（自己根本冇可能做到的）大道理，例如最勁的一句：「萬丈高樓從地起，學問也是同道理！」但更勁的是，喺你本紀念冊寫下呢句豪邁語句嗰位，隨時是考第尾的。
另一組深受同學愛用的語句，則涉及友誼的本質：
1.不受地理影響——「流水不因石而阻，友誼不因遠而疏」
2.不受物理影響——「人如流水處處飄，我倆友誼永不離」
3.可用比喻理解——「萬里長城長又長，我倆友誼比它長」（升中學後認識了一名生性不羈的男同學，佢話佢曾經將當中「友誼」二字改成另外兩隻字，結果臨畢業，先俾搣時罰鑊甘……改咗做邊兩隻字呢？由於有點不雅，不方便在這裡公開。）
我那本紀念冊，大概有廿幾句「萬里長城長又長，我倆友誼比它長」。結果呢……升上中學後已經斷晒聯絡。或者咁，到了中五我冇再搞呢啲門面嘢。我已經不相信友誼會長得過萬里長城。
友誼不會永固，反而我身上的脂肪更頑固。

摷我請留言
去年仲夏，我個blog突然收到以下留言：你係咪XXXX學校（我就讀的小學名字）個YYY（我個真名）？
小學同學竟然可以摷到我。事情是這樣的：收到留言的前一個晚上，小學同學們剛剛搞了第一次聚會，席間還有以前的班主任。期間班主任提起我，說在這裡曾經見過我個名（當時仲未用「月巴氏」這麼一個咁勁的筆名）；他們便憑著這一點小線索，摷摷摷摷摷，終於在茫茫Google海裡摷到我，再留言給我（如果不是在這裡寫嘢，還會有跟小學同學重逢的機會嗎？）。
大半年過去，卒之約實4月26日見面。對於這個聚會，我是極度亢奮的——在4月前。一踏入4月，我便開始忐忑，而愈臨近4月26日我就愈忐忑——當晚我也有把這感受講俾同學知，他們問我點解，我都唔知點解——當時只解釋：可能是自己近年變得自閉，不擅交際（呢樣係事實嚟）……
事後，細想：我已經到了一個坐擁大堆（對我來說重要的）回憶的年歲，之後仲有幾多年命仲有幾多路要走？我真係唔Q知，但就是害怕一些突如其來的外來衝擊，衝擊自己那顆被層層脂肪妥善保護著的纖細心靈。我驚27年後的我令同學失望，我驚重聚的感覺不似預期——而最驚是：難得地失而復得後，然後某一天，再一次失去……我承認我份人其實好煩。
有關當晚的真實感受，如下：
1.愉快。愉快是因為，當年的友誼依然存在，無需花時間重新認識，已經進入狀態。
2.更愉快。更愉快是因為，同學們都想好好keep住這段失而復得的友誼。
友誼，其實不需要長過萬里長城。Keep到，已經很好。

最後，勉勵同我哋懶friend的港鐵。
有感而發，好想送上小學雞紀念冊金句，給近年經常向我們訴諸感性販賣感情的港鐵。
萬里長城長又長，等車時間比它長——這是蘇局長永遠都不會明的數學問題。
萬丈高樓從地起，高鐵也是同道理——係咯，點解唔勘察清楚塊地？唔挖到底呢？
一串光陰一串金，串金難買串光陰——我由始至終都唔恨搭高鐵。最慘啲金，我有份。
（原文刊於am730）