浪漫月巴睇舊戲（六十八）：原來冇嘢敵得過劉青雲對眼

N年前的我，曾經是一個有志成為電影編劇的進取月巴仔，於是某年仲夏好進取地，跟某位同學報讀了一個由某協會搞的編劇班。

《龍虎風雲》的公寓不只是公寓
 在那為期十幾堂的課程裡我究竟學咗啲乜？講真我已經唔太記得，只記得有一堂請來開心之鬼黃百鳴來分享——新藝城創業初期諸種事宜以及各巨頭的趣聞軼事，統統同編劇技巧冇乜關係……嗱嗱嗱不排除只是我上堂唔專心所致，其他同學可能學到好多嘢都唔奇。
但其中一堂的內容我銘記於心。某位講者提及「死物」在電影中的作用，不只是填爆個screen、單純地存在喺度咁簡單——細到一支筆，又或大到成間屋，都能夠被賦予意義。他舉了一個例子，《龍虎風雲》的公寓，除了暫且作為周潤發李修賢（以及一眾劫匪）做世界前的住所，更有個象徵意義：過客——周潤發李修賢在公寓裡是過客，同時是對方人生中的一名過客，而命運促使他們注定找不到一個永久地安身立命的落腳點。
我承認，有一段時間我格外留神，試圖望實戲裡所出現過的杯杯碟碟和車車。但乜意義都望唔出囉。

一間半星級酒店裡的一個九流住客
直至這一個翻炒《再見阿郎》的尋常晚上，我不尋常地睇到好多以前唔覺眼的物件（和意義）。
澳門，一個黑雨晚上，剛出冊的過氣江湖大佬張東郎，為何偏偏要同的士佬初則口角繼而動武，以致被迫入住一間花灑冇水出的半星級酒店？這間半星級酒店持有人，是個帶住孤兒仔的寡婦，由廚房到執房都一腳踢；酒店明明難以經營下去，但依然放唔低。
放唔低的還有張東郎本人。他放唔低過去的江湖大佬身份，放唔低俾前妻（留意，飾演者是曾小燕！）當年夾帶私逃的一筆鉅款。呢次放番出嚟，誓要攞番失去咗嘅嘢。
「我哋第一日出嚟行，就預咗當監獄係屋企。」這是張東郎的人生態度。
「生光榮，死痛快！」這是張東郎的人生格言。
這名住客絕對是離譜的。如果酒店行有一個私下流通的blacklist，他不排第一，也一定不排最後。每一日都keep住將間房搞到恍如打完仗，他用來抹走因被扑爆缸而流的血的廁紙，又隨處掉，每一次都要勞煩老闆娘執拾；煙食晒，又要老闆娘冒住200年一遇的雨走過對面便利店買。
而離奇地，感情竟然在二人間日漸滋長。

一碗麵、一隻蛋以及一條菜芯
回到入住酒店的第一晚。張東郎嗌肚餓，老闆娘求其煮了碗公仔麵俾佢。從湯的色澤觀察，似乎連味精和麻油都冇落。另一晚。住熟咗的張東郎自行在廚房煮麵，老闆娘竟然自動地為佢煎咗隻太陽蛋，這隻蛋，是她對這個人初步敞開心扉的一個證明——但留心睇，蛋邊是煎燶晒的。
最後一晚。老闆娘為張東郎煮的，除了是一碗麵，還付有一隻冇燶邊的perfect太陽蛋，再搭多條淥得啱啱好的嫩綠菜芯。這絕對是我見過最美麗的一碗麵。她終於接受了這個本來只不過是過客乙名的江湖大佬——但故事未完，他們還要面臨一個更大的生命轉折。不劇透了。
《再見阿郎》故事極度簡單，一個過氣大佬出冊後，遇上一個落寞寡婦，同時偶然地跟一個以為自己大晒的司警結怨；在澳門小城的三個人，各自有各自的放唔低，以致悲劇的誕生。
最後一場。再度入獄的張東郎再出冊，截了一部的士，司機竟然就是當日那個憎死自己的司警——然後，我睇到一場自我睇戲以來最強勁的男性情義處理。杜琪峯，好嘢。
還有，我看到張東郎的一雙眼，由故事前半段滿布戻氣到後半段漸見平和。眼神，如實交代了他的轉變。
講到尾，冇嘢敵得過劉青雲對眼。
（原文刊於am730）