我與我的喵的恩怨情仇（二）

點解會有（二）？
因為2012年11月寫過（一）。
一年半後，我的喵還是keep住上一篇文所描述的模樣。

季節變，我的喵也變
我的喵，有時可愛，有時跋扈；有時令我好happy，有時激到我好angry。
而隨著季節轉變，他的生活習慣也跟住改變。
1.每逢三、四月，我的喵都會企喺大門前（就像面壁那樣），嗌，一味嗌。我不知道他在嗌甚麼，而我又懶郁，只會離遠叫叫佢，佢就唔再嗌，擰轉身，定睛望實攤在梳化的我（本來我是冇梳化攤的，下文會解釋），然後再次望實度門，嗌……我惟有過去打開門，但門外除了空氣，乜都冇。閂門後，我回到梳化，他又企在門前，嗌，一味嗌。嗌到夠皮嘞，我的喵便會施施然返入房。
2.三月前，我的喵一直喺梳化瞓，但你一定要先把被鋪放好在梳化上，他才會瞓得安落。當一般BB只需要面積跟他size差不多的被鋪時，我的喵卻需要大量被鋪，面積更差唔多佔去成張梳化，而他的size明明只得一篤嘢咁大。整個隆冬，我不是坐在硬堀堀的地下，就是用單邊pat坐在梳化柄上。
3.三月，我的喵會好自然地轉移陣地，入房瞓。他瞓的位置，咁啱每逢夏天都會有陽光照射到。這習慣維持了好多年，每當看見我的喵開始入房瞓，我就知道，就快轉季了。
4.大部分時間我的喵都會自動入房，但更大部分時間，他堅持要我掃住佢先肯入房——大抵塵世間任何喵都鍾意被人用手掃勻全身，我的喵一樣鍾意，但他慣咗一路行一路被掃（請參看「我與我的喵的恩怨情仇（一）」）；於是，每次他想入房就寢，都會站在走廊，勁嗌，嗌到我掃佢為止，才會懶駕勢地慢慢向房間前進。
5.但入到房，當我以為任務完成了，可以出番去廳攤梳化了，他又會一個轉身，行番出廳……這過程，通常都會至少loop三或四次——最多試過六次。

我與我的喵溝通上永遠存在問題
2014年4月14日的尋常早上，病緊的我正在忙於工作，急到瀨屎嗰隻。
我的喵，完全漠視我當時的嚴竣，只管進行著上一段的第4點——勁嗌，嗌我掃佢返入房。問題是我當時真的極需要專注工作，於是便跟他說（語氣唔多好嗰種）：「大佬呀你唔好嘈啦！」但他應該聽唔明我講乜，繼續勁嗌；OK，我投降，起身掃佢，終於肯入房了，點知一如所料他立即做上一段的第5點……我忍唔到了，怒道：「妖唔理你吖！」離奇地，他靜默了，自行返入房。
下午，正在公司忙呢樣忙嗰樣之際，突然收到朋友WhatsApp，是一條link，link去一單news——荃灣的流浪喵慘死。還附有一張相片。看了那張相，我只識得呆望住個芒，有一篇文正等住我去改，但我完全反應不來。過去，或許我會tune去用獵奇視角看待那張相，但現在，不能——我突然想起我的喵。我想起幾個鐘前我才剛鬧過佢，我後悔，想立即飛返屋企同佢say sorry，但又不得不留在公司。
凌晨一點四，返到屋企，藥力使我好想即刻躂落梳化即瞓。一開門，我的喵在不遠處企定定，望著我。我想喊出嚟（但強忍著）。
然後，我的喵重複進行上一段的第4和第5點。至於佢記唔記十幾個鐘頭前曾經被一個月巴的人鬧過？我不知道。我想，跟喵（或任何一種動物）相處的最大問題，永恆地是我聽唔明佢嗌乜，以致我唔知佢諗乜。同樣，喵（或任何一種動物）永遠不會知道面前的人，打．算．對．佢．做．乜。
喵返入房瞓了。我攤在梳化，那張相不停在腦裡迴盪——自己究竟可以做甚麼？在fb怒爆一段粗？發洩完了但改變不了甚麼。信嗰條施虐的X街會有報應？環顧世上大把衰人壞人都可安享晚年囉。我只信罪與罰，但我無權。
我的喵正在房裡熟睡，靜待明天的陽光。而流浪的喵，不知道有甚麼正等著去面對。
（原文刊於am730）