仲有冇人鍾意睇黃百鳴做搞笑戲？又或者簡單一點：仲有冇人鍾意睇黃百鳴搞笑？我諗，答案可能是會好一面倒（至於是一面倒鍾意定係一面倒唔鍾意？不贅了）。
當黃百鳴為人師表，好唔好笑？
上一次在這裡發表了篇「當張家輝為人師表」後，我好似想搵番逝去咗九世的青春咁，狂搵一些香港製造青春校園片來看，結果發現，真係唔多，而其中一部是《開心鬼放暑假》。
咦，開心鬼（= 黃百鳴）喎……
於是我有點戒慎恐懼地，去挑戰呢一部《開心鬼放暑假》，睇咗開頭十分鐘便發現——Shit，原來以前睇過（應該是租帶睇的）。但更驚人的發現是在睇完晒之後。我竟然，仲笑得出。
唔卑鄙嘅嘢唔做，愈卑鄙嘅嘢愈做
《開心鬼放暑假》是《開心鬼》系列第二作，上映年份是有點久遠的1985年。1985年，我仲讀緊小學。
1.這擺明是一部青春校園片，主角由始至終都（應該）是袁潔瑩、羅美薇、陳加玲以及孫慧（其實即是傅明憲），其中袁羅陳三人更組成「開心少女組」包辦片中主題曲插曲，這是效法當年在香港大行其道的日本idol方程式。
2.袁潔瑩、羅美薇、陳加玲的角色設定，其實都跟外型好匹配吓。袁潔瑩：擺到明反叛嗰隻；羅美薇：反叛得來其實幾得意又乖乖哋（所以戴了眼鏡）；仲帶點baby fat的陳加玲，則是一個重度沉迷愛情小說、對愛情充滿幻想、連講句嘢都好鬼死文藝的少女。三位之中，唔知點解地，我當年最鍾意睇羅美薇（80年代羅美薇有份做的戲，我真的大部分都有睇）。而每當對照她們仨日後的人生路途，我就不無欷歔。
3.主角（應該）是「開心少女組」，但因為有黃百鳴存在，所以真正搶戲的（自然）是他。即使我咁多年都冇睇他的賀歲片（而且好公平地，連曾志偉陣營嗰邊拍的都冇睇），但我不討厭他過去的演出，只是有時候覺得，佢總係會在唔適當時候做咗啲唔適當嘅嘢……例如，佢一出場教PE堂嗰一身PE老師的衣著，便立即令我——有啲戥佢唔好意思，但諗一諗，佢應該係覺得咁著冇問題才會充滿自信地穿上吧。
4.自信。每次有黃百鳴出現的場口，幾乎都是他個人演技晒冷的完美時刻，但他的存在，跟整個時空又硬係好似不太融和，即係有點突兀咁解囉。
5.但我仲笑得出。令我笑得出的統統是對白。例：A.袁潔瑩交代過去先後有七個老師（俾佢哋激爆而）辭職原因，佢話：「係佢哋意志力薄弱，受唔住潮流嘅衝擊，抵擋唔住時代嘅壓力。」（呢一句，正好對應著後來的《開心鬼》續作……）B.都係袁潔瑩，為凸顯她的反叛她會著住roller鞋上堂：「現代工商業社會講效率講速度，咁樣派簿法有咩唔妥？」C.浪漫女王陳加玲對浪漫的描述：「浪漫係金黃色嘅夏日黃昏，揸架車喺海邊，聽下海浪嘅呼叫，睇下浪花嘅美態，喺海灘上面留下一行行嘅腳印……」（這大抵是80年代最典型的浪漫幻想）——好笑，是因為以上對白都隱含了懶成熟的思維，但偏偏由當時仲好細個的她們講出來，立即產生了一種錯置感（就像我同你，成長過程中都必定試過為咗表現思想成熟而講啲懶係深奧的說話）。仲有一句，是出自黃百鳴的：「叫我Darling，我英文名叫Darling Hong嘛。」我有笑，不過係苦笑。
6.講到尾，《開心鬼放暑假》令我覺得最勁的設定是：「卑鄙會」。這是由袁潔瑩、羅美薇、孫慧以及陳加玲（她是被迫加入的）共同組成、神秘而又公開的組織，宗旨是：「唔卑鄙嘅嘢唔做，愈卑鄙嘅嘢愈做。」但（自以為）好卑鄙的她們，最後因為黃百鳴式春風化雨，決定把「卑鄙會」改成「奮鬥會」（當年新藝城真的有個「奮鬥房」，就是供各創作主腦度橋的房）。本來就不壞的她們，如實地經歷了一次個人生命情調的轉變。這一點頗觸動我（如果袁潔瑩羅美薇她們組成的都叫得做「卑鄙會」，那麼今天由高官權貴組成的應該叫乜？「無恥會」？）。
7.即使我不會也不敢強硬推介大家去睇《開心鬼放暑假》，但還是希望未睇過的……睇一睇啦，睇一睇那一個年代的純真。
沒有留言:
發佈留言