我OK怕鬼，但更怕人

如無意外，當你睇到呢篇嘢時我應該準備去睇《詭屋驚凶實錄》。但由於未睇，所以呢篇嘢不是影評。《詭屋》只是一個楔子。

鬼屋 & 凶宅，我細細個已經知道
嗱嗱嗱，知道不代表住過吖。
都是多得一本叫做《超自然探奇》的書所賜。這本書，硬皮包裝，堅厚，扑得死人嗰隻。
我是在親戚屋企看到這本《超自然探奇》。親戚住在坪洲，一個寧靜的離島，每年總有幾鑊入去BBQ，當大人在享用BBQ後的衛生麻雀時，我就在狂煲呢本勁書——說它勁，是因為裡頭內容統統都是外國怪力亂神嘢——UFO！怪物！吸血殭屍！尼斯湖水怪！超自然力量！——仲有鬼屋！
鬼屋那一章尤其強勁。相對其他篇章附圖多是概念性插圖，鬼屋一章輯錄了大量歷史中著名的真實靈異照片（「真實」二字僅指涉相片本身，而不一定是相片中嗰隻嘢）。我知我知，這些相片你現在只需google一下便可大量搵到，睇到你嘔都得，但我睇這本書是80年代的事，而我本人當時還是個天真無邪月巴小學生，除了這本《超自然探奇》，實在找不到另一個有效渠道睇到咁多堅揪鬼相。
現在應該沒有家長會容許自己的寶貝子女去睇呢類書。我慶幸，身邊大人們當年並沒有制止我，以一句「兒童不宜」，就剝奪我對怪力亂神嘢的知情權。
咁當然啦，細細個就對怪力亂神如數家珍，是不會贏在起跑線上的。所以我一定不會組織家庭生兒育女，因為我的仔女應該會一開始就贏在（被標籤為）錯誤的起跑線上。

每隔一段時間社會就進入一個神怪時刻
例如小學時我在八卦周刊睇到一個都市傳說：有女子在油麻地月台望見「另一個她」，冇幾耐佢就離奇地死咗……
例如鍾保羅。應該是中三那年吧，突然有人話見到佢在某電視台節目裡蒲頭，成為其中一名觀眾——咁啱有同學錄低咗，放學後我們一行十幾人便衝上同學屋企研究，但可能同學餅帶用咗N次引致太多雪花，加上當年未有高清，乜鬼都睇唔到（最後竟然變成睇鹹帶收場）……
又例如一個描述一班細路在玩扮火車的廣告。不知道甚麼原因，排在唔知第二定第三的細路，嘴角突然好似在流血……這廣告當年引起軒然大波，電視台更隆而重之請來當年一位頗具名氣的「師傅」拆解謎團，好記得佢咁樣講：「根本裡頭全．部．都．係．鬼！」
有冇咁猛吖。那一刻我忍唔住對住電視爆咗人生中第二句粗（換了是現在，這行為隨時構成刑事）。

連有頭鬼我都唔淆底，更何況只係無頭鬼？
因為《超自然探奇》，我過去對於鬼的認知長期停留在一個「頗鬼佬」的層面。鬼叫中國的古人們沒有影低任何靈異照片。
但冇相就必然地冇真相？事實是不少文人都有寫過鬼。
紀曉嵐便寫過部《閱微草堂筆記》，短篇志怪小說，開宗明義寫鬼故——但表面寫的是鬼，實際在側寫和暗串腐敗的人世。當中有這麼一個故事：姓曹男子到揚州出trip，偶然間入住一所相傳好猛的凶宅；半夜，女鬼現身，用盡方法嚇曹生，曹生全程keep住定過抬油——女鬼見狀惟有使出超必：將自己個頭拎落嚟！但這不過是感官刺激而己，曹生只說：「連有頭鬼我都唔淆底，更何況只係無頭鬼？」女鬼洩晒氣，走鬼咗。
人只要不怕鬼，鬼反而掉番轉淆底。講到尾，「鬼」只是由「人」變成。
近排嚇親我的「人」便有：走到小學門口舉晒中指並立此存照的人、同一啲明明跟你政見理念對立的人應邀免費出國嬉戲仲要笑晒影合照的人、突然標出來話要幫沉默大多數發聲的人……仲有，噚日集結在政總說自己是亞視粉絲的人。能夠公然話亞視好睇，真係超自然探奇。
只有人，先識玩批鬥重挫人的是非觀念和精神意志。