2014年7月18日星期五

浪漫月巴睇舊戲(七十七):怒從心上起,惡向膽中生,凶由目中露




















當年回應金融風暴(或借金融風暴過橋)的香港電影,我認為,足以搞一個回顧展——既回顧這個影響/摧毀了不知幾多香港人的金融慘事,同時回顧那個世紀末香港電影有幾慘情。
而個list中,《目露凶光》必定是重點電影。

贏了口碑卻輸了票房

我終於翻炒了《目露凶光》。這是自1999年上畫至今首次翻炒。
上世紀90年代,沒有中港合作的合拍片,只有香港導演帶著在香港磨練得來的獨特思維手法硬闖荷里活——其中一位是林嶺東。他在荷里活無功而還後(但他那齣夥拍尚格雲頓的《硬闖100%危險》曾經長駐「月巴氏翻炒list」頭10位),回到香港,先拍《高度戒備》,贏了口碑和票房(其實相對港片黃金盛世,《高度戒備》的票房數字只屬普通級數),再拍《目露凶光》,贏了口碑卻輸了票房。
《高度戒備》,典型警匪格局,林嶺東繼續拍出了一份其他導演拍不來的壓迫和躁動——他總是能夠把一種被殘酷現實迫至無路可逃的繃緊情緒,貫注電影裡,成為成齣戲的命脈。
《目露凶光》,表面看也是警匪對疊,卻多加了一層驚慄包裝,這層驚慄包裝,竟然完美扣緊那份林嶺東式無路可逃的繃緊情緒。
你問我《目露凶光》Why只贏了口碑卻輸了票房?我只能答在那個世紀末,大把香港電影都是(在多年後才)贏了口碑卻(在當時先)輸了票房。

是轉性還是撞邪?
對於《目露凶光》,不能寫太多。電影先在前半段拋出大量問題:
1.劉青雲明明仙都唔仙吓,Why依然被綁架?
2.劉青雲被發現的空屋,Why在日後成為著名鬼屋?
3.綁架劉青雲的人有甚麼目的?Why綁完佢又放走佢?
4.劉青雲獲救後舉動超異常,Why?轉性還是撞邪?(請記住,他被發現的地點是一間著名鬼~屋~)
5.劉青雲其中一個不尋常舉動是把屋企花園那種滿花的花圃密封,Why?
6.劉青雲架Jeep,Why殘留血漬?是邊位咁冇手尾留低的?
7.OK,造成劉青雲諸種變異的核心事件是?
頭六個問題,不便回答,要靠你自行觀看;但第七條,可以。
金融風暴。當年這一場冇人諗過會發生的風暴,捲走了不少人一輩子的努力,把不少人成世人所付出的血汗化為空氣。當廣告跟你說「你而家冇但將來會有」,金融風暴就話你知:你曾經有?但永遠冇晒。這場風暴最毒是:即使你成世人不沾手金融市場不炒炒賣賣,一樣受到波及。
這場突然的風暴、突如其來的巨變,令劉青雲終於歇斯底里地爆了以下兩段說話。
A.佢同老婆咁講:「我已經乜嘢都冇晒。呢個世界變得好快,但係你唔可變,我哋唔可以變。」
B.佢同差人咁講:「努力有乜嘢用?日日睇咁多書咪又係追唔上。十年嘞做咗,公司話炒你就炒你。絕路啦!點解所有嘢要變得咁快?仲有冇嘢可以留得住?仲有冇嘢係屬於我㗎?」
當美好的時刻一去不回,他的歇斯底里不止表現在說話上,更具體化成他的連場變異。一念之地獄。冇得返轉頭。就像金融風暴所帶來的傷害,並不會因歲月而流逝。永恆的,冇得返轉頭。
《目露凶光》的凶,涉及一個人「怒從心上起,惡向膽中生」的細緻過程。真正目露凶光,由心而發。劉青雲對眼,真的呈現了這一種凶。
這齣戲設有兩個結局版本。現時市面流通的,是「絕對有鬼版」,而我當年入場睇的是「完全冇鬼版」。「絕對有鬼版」,似乎想用撞邪去解釋人心變異後的所有暴行。
但我討厭這個用撞邪去解釋一切的做法。就像97後有咁多人形生物集體變異(到近年就更多),唔通真係咁啱地集體撞邪咩?根本,是這群人形生物的心自己在變。
(原文刊於am730)

2 則留言:

  1. 梁家輝係戲入面都做得好, 尤其佢以為老婆勾佬個場, 由谷底升返上黎個下, 正! (個場戲其實幾好笑)

    回覆刪除
    回覆
    1. 嗰場戲以及嗰個處理,一個不慎,足以拖垮影響成部戲……

      刪除