2015年9月11日星期五

浪漫月巴睇女星(43): Imagine!如果你是Brad Pitt……





















注意:不是當下的這一個Brad Pitt,而是同Jennifer Aniston結了婚、拍緊《Mr. and Mrs. Smith》的嗰一個Brad Pitt……

1.當時處境:明明已經同好靚的Jennifer Aniston一齊,但每天開工,跟集火辣與性感於一身的Angelina Jolie朝見口晚見面,點好?

2.抉擇時刻:A.當冇事發生過。返到屋企擁著好靚的Jennifer入睡,但午夜夢迴紮醒時,腦海裡又Keep住浮現另一個她……;B.做一次見異思遷的衰人!但至少,叫做對自己誠實,忠於自己嗰一顆驛動的心……

3.原來真係好難揀。好彩唔使我揀,畢竟(好唔好彩地)我不是Brad Pitt。

4.回到現實回到月巴身分。講真,Jennifer和Angelina我都鍾意,而當中又以Jennifer的戲睇得較多,感覺上,她就是一個甜心,人畜無害,係男人見到都應該會鍾意嗰隻。Angelina呢,完全不同,對她,我想到的形容只能是:強。

5.一種連男人都隨時冇的強。我冇睇晒佢所有戲,但記憶中,從未見過她弱質纖纖,而總是單一匹馬面對一整個由臭男人組成的世界(像《Tomb Raider》),又或是同男人平起平坐(像那齣被狂踩但我又覺得OK好睇吖的《Original Sin》);尤其看《Wanted》時,甚至認為她是現世揸槍揸得最最最型的女星。

6.但望落再強、揸槍揸得再型,都只是形象,形象只是幻象。Angelina可不是天生就是強者,即使對比一般人她有著較不平凡的出生背景——天生就有一個明星老竇Jon Voight,但這個老竇在Angelina一歲時,便離棄了她離棄了家庭(直到拍《Tomb Raider》時兩父女關係才好轉,但冇幾耐又擘面)。小小的Angelina同細佬跟母親生活;返學,感到自己同其他同學格格不入;試過做Model,但不成功;叛逆過,首先在外表,繼而吸毒,再自殘,𠝹傷自己為自己喚起活著的輕微感覺……最後,兩度考慮自殺,第二次的方式甚至是打算自己出錢請Hitman隊冧自己……在那個足以影響一生的成長期,Angelina一直在嘗試了解自己,但一直用錯誤方式了解以致了解錯誤。

7.除了一樣。自小,母親便經常帶Angelina睇戲,讓她萌生了做演員的興趣。人生中首次演出(如果不計5歲那一次客串老竇的戲),是1993年一齣(如無意外你肯定未睇過的)B級科幻片,《Cyborg 2》(冇上畫,直接出碟的)。我有幸睇過,嘩,唔識形容,而大概連Angelina都唔識形容呢一次演出,灰心到匿埋足足一年。之後,開始接到好電影好角色,當中最重要自然是讓她攀上一線的《Girl, Interrupted》,但我想特別一提一齣HBO電視電影《Gia》,傳記片,拍下美國名模Gia Marie Carangi匆匆的一生(她患了AIDS,死時26歲)——Angelina成長期的迷惘,似乎為她提供了演繹Gia的心理材料,看著,就像在看Angelina本人的沉淪過程……

8.她沒有沉淪,還成為荷里活一線女星。當然,做了紅星也可以是另一種沉淪的開展,但她沒有,反而由過去的了解自己,發展到了解自己與世界的關係——她沒有單純享受一線女星的快樂(即使咁,也不構成問題),而是用這個身分,參與世界。

9.2001年,Angelina成為了聯合國難民署特使。她不是間唔中去吓外訪咇幾滴眼淚影幾張相交差,攞咗光環就算,而是出樣出力之餘又出錢,而且仲出埋聲,像她最近就為敘利亞難民問題出聲——對於難民的困苦,是她當年在柬浦寨拍戲時的第一身感受,她親眼看見塵世間原來有難民這一類人,天生就在受苦的人,而這種被注定的困苦,苦過她在成長期所面對的N倍。有些苦是自己睇唔開造成,有些苦是由世界共同造成。

10.從了解自己到了解自己與世界的關係,再參與世界而不是單純作為冷眼旁觀者,這才是Angelina真正的強——強在擔起了人的道德責任,展示了人的應然價值。即使眼前世界愈來愈衰。
(原文刊於am730)

2 則留言:

  1. 一路睇你寫AJ,就諗緊你話未睇晒佢d片,好彩,Gia你有睇,well,我雖然都無睇過晒佢既戲(老實我十幾年前已好少睇hollywood movie),但如果喜歡AJ,Gia就一定要睇,唔知算唔算係佢既代表作呢?可惜係Girl, Interrupted我仲未睇

    回覆刪除