我絕少失眠，2014年9月1日深夜卻偏偏遇上了。惟有搵嘢來數，讓自己數到想瞓。
我講唔到一齣2014 TBB劇名
極度疲累的我本來諗住一躂落床就瞓著，點知轉了無數次睡姿無數個圈，依然眼光光。
我從來不會數綿羊（一隻隻白雪雪的綿羊有甚麼好數？），要數，也寧願數一些我感興趣的，例如——被黑客外洩裸照的荷里活女星名單吧，Jennifer Lawrence、Kate Upton、Kirsten Dunst……Stop！我明明希望數出濃濃睡意，但現在竟然數出絲絲鹹意，愈來愈精神！
惟有改數另一啲。就數數2014年截至9月1日為止的TBB精彩劇集吧。
一．齣．都．諗．唔．起。OK，你可以話我根本都冇睇電視的良好習慣，自然諗唔起也數不出TBB的精彩劇集啦，問題是，我絕對不是近一年才開始冇睇電視，17年前我畢業出來社會做事已經開始冇睇，但至少過去咁多年來依然講得出幾齣話題劇集的名字（因為成為了話題，身邊的人猛講，被迫聽埋一份的我，就算明明冇睇都好似晚晚追睇）——是我的記憶力嚴重衰退？還是2014年截至目前為止都沒有一兩齣劇在坊間成為話題？
但，塵世間一個渺小月巴數不出半齣TBB精彩劇集名字，決不影響年尾的視帝視后誕生。可喜可賀。
離奇是，keep住播的TBB劇集我記唔到，反而好記得ATV（keep住冇劇播冇節目），啋。
我講唔到第二首2014廣東歌名
我依然好精神，眼光光，very大鑊。
數唔出電視劇，唔緊要。香港娛圈包含歌影視，電視只是排最尾，一於數排最頭的廣東歌。
一．首．都．諗．唔．起——其實諗到一首的，林奕匡《高山低谷》。知道這一首歌，因為曾經有同事多次向我作出熱烈推介。所以講得出歌名之餘，更加可以哼到副歌。
但《高山低谷》以外，就真的想chok多一首歌名、哼多一首歌的副歌都不能。
OK，你可以話香港樂壇向來是「詞大過曲」嘛，哼唔出旋律，好正常，但點都背得出歌詞吧——黐Q線，背唐詩吖？就算我背得出很多林振強寫下的歌詞，原因絕對是我必先記得歌曲旋律，歌詞才自然地跟旋律同氣連枝，成為連體。但當我連歌的旋律都記唔到，仲要我（先驗地）背得出歌詞？
但，塵世間一個渺小月巴唱唔出幾首2014年廣東歌，同樣不影響年尾各大小樂壇頒獎禮的（不）正常運作，各台前幕後繼續上台攞獎喊苦喊忽感謝全世界。可歌可泣。
今年令我真正深刻的歌其實只有一首，《光輝歲月》。風雨中抱緊自由。生勾勾的人唱的歌我記唔到，反而咁記得一首廿年前的歌（而寫和唱的那一位亦已作古），啋。
但我背到好多官員名句
2014年截至9月1日止，真正入到我心的只有以下幾句。
1.袋住先。
2.希望大家就如珍惜食物一樣，珍惜普選特首的機會。就算2017俾你一人一票選的特首只屬廚餘級數，也要珍惜——因為既要珍惜食物，也要珍惜廚餘。
3.李飛。我向來唔太記得中共官員，一來實在有太多出類拔萃的官員，二來再出類拔萃的官員往往好快就消失，換上更加出類拔萃的官員……呢期最出類拔萃的首選李飛，如果不是，都唔會有咁多人親臨他下榻酒店一睹其風采啦；而且他讓我知道，香港只需17年就能夠實行（英國人花上成百五年才擁有的）民主，令我猶如置身《龍珠》「精神時間房」般咁surreal。
4.「中央是香港最大的民主派。」呢句台辭，強過TBB開台以來所有生安白造的劇集對白，感動過所有歌手上台領獎時的假惺惺冗長致謝辭。
家駒說過，香港沒有樂壇只有娛樂圈；來到2014，娛樂圈都冇埋——最出色的藝人都走晒去做官了。
（原文刊於am730）
沒有留言:
發佈留言