2014年2月5日星期三

請用純正廣東話講:我喺新年差啲喊出嚟!





















 離開利寶的我不禁影低呢一張有點sad的相。







這一個農曆新年假,一如以往,好正常地(兼好似陣風咁)完咗。

司華力腸腸時光機

其實有少少分別的。例如:吞噬的年糕蘿蔔糕數量減少了,逗的利是更加明顯減少了。這自然跟我冇乜去拜年有關。Why唔去拜年?請參看上一篇《每當拜年時,我面對的問題總是……》,Thx。
但還是有躝街。躝咗兩次。這兩次躝街都彌足珍貴,珍貴得我要在馬年第一炮便寫下來同大家分享。
大年初一,點都要拜年吧。拜年地點是觀塘。冇錯,由屋企搭車是可以直接去到,但我選擇在(已不存在的)牛頭角下邨落車,轉搭1A。
一落車便聞到一朕臭味。一朕令我很懷緬的臭味(世上只有臭豆腐的臭,才會令我產生鄉愁)。但單是臭豆腐的臭,是不足以引到我埋去的,真正吸引我的是,一架手推BBQ車仔檔。這架BBQ車仔中間通空,上面架著一個鐵絲網,網上擺著墨魚丸、chicken wing、芝士丸、牛丸……以及腸之王者:司華力腸腸(N年前幫襯過一個賣小食的阿姐,她總是愛把司華力腸叫做司華力腸腸,唔知點解我就跟咗佢咁嗌,可能是懷念她吧)。
那些乜丸物丸以及司華力腸腸便在炭燒情況下,被燒到表皮微焦,散發迷死人的香氣——最大鑊是「車主」似乎嫌未夠香,再把一些極神秘的沙嗲醬搽落那些丸丸和腸腸身上——香到核爆!
不幫襯,實在對不住燧人氏吧。等待期間左望右望,周遭都是琳瑯滿目小食車,一些我已經N年冇見過和冇食過的街頭好味嘢紛紛蒲晒頭,而每架車仔前都企滿等食的人,像我。
當我把剛燒好的司華力腸腸放入口,在舌尖掂到熱辣腸身的一剎,司華力腸腸就像一架時光機,用微焦的香味作燃料,把我帶回到一個曾經很熟悉、但已經不存在的香港。
妖,新年流流,我差點喊出嚟。司華力腸腸,你好衰。

有些變幻我接受唔到囉
大年初三,赤口。百無禁忌年照拜。
拜年地點是天水圍。因利成便,我決定到傳說中的屯間利寶商場走一趟。
先在友愛邨落車,行過對面,穿越安定邨(那個裝修到好似市區任何一個商場的零個性)商場,行行行行咗十五分鐘,到了。
望見利寶的牆身地面和燈光的亮度,已經足以叫我百感交集;拾級而上,望埋那一間間game舖、figure舖,以及聚集在卡game舖面口交流的青少年,我好似回到每天蒲沙田好運中心的90年代初——每天放學後我都要到那裡的game舖漫畫舖櫥窗望兩眼,唔望唔安樂。
但我同時感受到場內人向我投射的目光——他們應該感到我不是這個場的人。是的,當你持之以恆在一個場所留連,是真的會沾到那場所的氣,作為獨立個體的你會漸漸融合在那場所之內,合成一體。而我這個第一次踏足利寶的月巴人,明顯仲未沾到嗰股氣,以致蒲慣的人好快便辨認出來——但不理了,我實在忍唔住在利寶1樓兜了好幾個圈。真的很懷念這種商場。我看到我的過去和青春。
再一次,新年流流,我想喊出嚟。
我不是那種堅持「乜都係以前好」論調的人。OK,變幻或許真的原是永恆,但在變幻過程中,我只不過想保存一點點已消逝過去的記憶啫。
但有一些變幻我絕對不能接受,例於由出世至今每一天都在keep住使用的廣.東.話。
如果廣東話變成了只得一小撮人使用的(可有可無)方言,咁日後係咪要等到每年初一至初三,才能夠(或被允許)藉著那一句「恭喜發財利是逗來」講吓廣東話?就像參與期間限定的掃街活動般過吓癮?冇嘢吖?
「司華力腸腸」——只有用廣東話,先至講得出嗰朕風味。
(原文刊於am730)







 利寶1樓。

沒有留言:

發佈留言