2014年1月29日星期三

每當拜年時,我面對的問題總是……






























不知是幸或不幸,我依然是屬於合法逗利是的族群。
也不知是幸或不幸,每次利是逗來前都必需面對不同形式的親戚詰問。
如果你跟我一樣,大概會明白那種難堪。


.不是每個人都容許行使提問的權力
是誰發明了拜年這種節慶社交活動?其實冇所謂,問題是,拜年期間總不能全程靜俏俏,總會有親戚講嘢,而講親的,都無可倖免地是你最不願意聽到或掂到的話題。
細路仔時期,總有(你認都認唔到樣的)姨媽姑姐或表舅父問你:今年考試考第幾吖?
如果你好叻仔考第一,而又懶醒咁大聲答「考第一!」,姨媽姑姐或表舅父可能會先笑兩嘢,然後話:「但小朋友唔做得咁驕傲喎。」兜盆泠水照頭淋。
如果你考的不是十名以內,而又開誠布公地講出來,姨媽姑姐或表舅父便會先鼓勵一下,然後懶係唔為意咁(同你阿爸阿媽)講:「哎呀我個仔(或女)今年考第X吖。」——那個X是甚麼?不重要,最重要是它所代表的數值,必定小於你考獲的名次。冇錯,你比佢個仔或女渣,而你的渣,你的老竇老母是要承受的。
而「問」這個動作,不是那個拜年結界裡的每一個人都有權去做,你絕不可能懶cute咁反問姨媽「姨丈有冇去滾呀?」,更不可能問(住公屋的)表舅父「點解咁耐都未上車呀?」。這代表冇家教。
問,從來都是權力的展現。我討厭屈服於(父母老師以外的)權力下,所以我好憎拜年。



.無奈有些說話你只能硬食
千辛萬苦長大成人了。但拜年依然令我enjoy不來。
而到了我這一個「冇家室 + 冇成就」的人生階段,拜年時面對的親戚提問離不開兩條。

1.而家做盛行吖?
2.點解仲未結婚嘅?(有些親戚或會順勢問埋「唔帶埋女朋友出嚟見吓人?」)


答問題1,不難,反正你不是從事非法行業便可問心無愧地答,真正的難,是難在回應他們總是以食鹽多過你食老麥的老Seafood姿態,對你做緊嗰行所作出的種種非專業意見。像我,答做記者,他們總以為世上記者都只是跑時事的;答做電影音樂版記者,他們只會以為就是做狗仔(八卦的會追問咁有冇藝人秘聞爆先);答做A報及B雜誌,佢會話佢只睇C報同D雜誌……沒完沒了。結案陣辭:你哋呢行好難撈囉,不是自我審查就是隨時被抽廣告……點解唔搵份政府工?
對於問題1,我今年打算咁樣處理:

親戚:而家做盛行吖?
月巴:要納稅的行業。
親戚:嘩好多行都要納稅喎。
月巴:撈偏和行蠱惑是不需要納稅的吧。換言之,我做的是正行。
(親戚默然)

OK,問題2。「點解仲未結婚嘅?唔帶埋女朋友出嚟見吓人?」隱藏了一個信息:問者有理冇理都先suppose咗你本身是有拍拖的,而既然拍得拖,就好應該快快趣結埋婚。面對這種陰濕問題我已經諗定好幾種回應方式。決絕地。
A.結咗婚咪逗唔到你封大利是?(適用於每年都只派10蚊利是的親戚)
B.如果結咗,下年你就會問我點解唔生B?我不想去撲奶粉更不想做怪獸家長囉。(適用於怪獸家長親戚)
C.因為香港不會承認我同佢的婚姻。(適用於衛道親戚)
D.咁你又唔帶埋小三出嚟見吓人哈哈哈哈!(適用於傳聞中有拈花惹草或紅杏出牆的親戚)
Yeah,我已經裝備好自己,迎接各路親戚。
嗱嗱嗱,對比拜年時八卦詰問,我其實更怕那些裝溫馨到打冷震的特首新年賀詞短片,因為過程中你只能硬食,而那句「恭喜發財」,聽在耳裡我只會覺得俾人寸緊。
所以新春佳節,年照拜,電視一定長熄。
(原刊於am730)



補充:其實我真人好nice㗎~

沒有留言:

發佈留言