2014年3月10日星期一

浪漫月巴睇舊戲(六十四):周潤發在《辣手神探》究竟開了幾多槍?





















這問題,唔係冇得答,而係難答——難答在你不得不付出無比的精神和意志,才能夠一一數清楚。自問冇咁得閒。
 

我把《辣手神探》視為勵志片
 相比起來,我本人觀看《辣手神探》的次數便易計得多。
37次。第37次,才不過是大前晚的事。那一晚,疲累到成個人好似被掏空咁,慣常解決方法是一條友去食cheap cheap放題或宵夜buffet,但那一晚更需要的,是燃點意志的憑藉。於是我翻炒了《辣手神探》。在我眼中這是一齣勵志片——不勵志嗎?兩個警察以身犯險,挑戰一個由黃秋生執掌、殺人絕對唔貶眼的龐大軍火集團,面對如此impossible的mission,知其不可而為之。勵志到痺喎。
現實中,這是吳宇森遠征荷里活前執導的最後一部港產片,一次槍戰片的完美示範——是的,對比《英雄本色》、《喋血雙雄》、《喋血街頭》,《辣手神探》似乎沒有甚麼道理要探討,過往作品中被高度彰顯的男性情義,唔係冇,但肯定唔多。《辣手神探》從不被認為是吳宇森的重要作品。
我當然明。但《英雄本色》太無奈,《喋血雙雄》太欷歔,《喋血街頭》仲欷歔。生命已夠無奈的我,實在不想再加添欷歔。於是,我選擇在身心困乏時只翻炒《辣手神探》。
 

三場永留青史的槍戰
 《辣手神探》是槍戰片,每一場槍戰都好睇。
序幕:雲來槍戰——雲來是甚麼?一間不再存在的舊式茶樓。在這裡,一盅兩件未必是重點,真正重點是茶客帶來的雀,yes,他們都是來撚雀。今時今日酒樓不會再有雀,有的大概只是讓新娘成為焦點的水晶catwalk天橋和飛天南瓜馬車。我好大膽咁講,就算再揀茶樓拍槍戰,也拍不到這場雲來槍戰的震撼——當然,如果有導演安排演員亂槍掃射那條水晶catwalk天橋,又或用shotgun一嘢轟爆飛天南瓜馬車,我應該會OK興奮。
中段:發哥無雙——先不要理會合唔合理,睇住周潤發單挑黃秋生成team嘍囉就是亢奮!而當發哥手上把槍明明足以射出千萬發子彈而不需reload,但當對準梁朝偉這名臥底的額頭時,偏偏射唔出……這場槍戰還有兩點要留意:1.梁朝偉射死大佬關海山後,交出了生命中其中一次最精湛的演出;2.當年睇《辣手神探》時不知黃秋生手下那名猛將是誰,只覺得型到核爆,原來他正是郭追,張徹晚期提攜的功夫演員,《五毒》主角。甚麼是盜亦有道?他演了出來。
壓軸:醫院喪戰——有人嫌這一場拖得太長,但我OK。這一戰基本上用盡各種技巧,有動有靜有張有弛,而其中一個long take必需留意:鏡頭影住周潤發梁朝偉穿越醫院各樓層,期間嘍囉keep住從不同地方走出來(送死),又開槍又爆炸,而且仲嫌未夠複雜攝多一場文戲,十萬樣嘢同時發生,只要任何一個台前幕後出了小小的錯,就唔該由頭拍過。諗到要咁拍,自然喪;最後竟然拍得成,更喪。
 

最後一場槍戰發生在醫院的原因是?
 不得不劇透。黃秋生的軍火庫正是在醫院裡。
對於這安排,廿年前的我沒太大感受,但現在會諗:揼錢出來起醫院的是否黃秋生?即使不是,醫院老闆應該也認識黃秋生,否則黃秋生點能夠將大量軍火收埋在醫院內?
這是個很警世的強勁暗喻:一些表面正氣到不得了的人和場所,原來就是收容、滋生最邪惡的事與物。只是世人都被表象蒙蔽,察覺唔到。
一個shot我永世難忘。周潤發孤身抱住一個被救漏的Baby殺出血路,不慎中槍,血濺在Baby臉上。Baby自然不知道正在發生甚麼事,而依舊眼仔碌碌。這個shot,你可以話可有可無,但似乎在預早告之Baby一個事實:你眼前的世界就是如此殘酷。現實中這個Baby已經長大了吧。他眼前的世界,只有更殘酷,更多邪惡在大條道理扮正氣。
發哥開咗幾多槍,你仲勉強數得到;而這類邪惡,肉眼未必即時辨別得到。
(原文刊於am730)

6 則留言:

  1. 知你好忙,但真心鍾意係BLOG睇文多過係FB睇。如果得閒的話下次PO文可否盡量同步?。。。感謝。

    回覆刪除
    回覆
    1. 其實之前都會同步,但過去幾日實在俗務纏身,用電話又update唔到blog,所以先遲足幾日…但既然還有你鍾意睇blog,一於以後力保同步! :D

      刪除
  2. 那場一入電梯即時出面換景清場扮第二層, 今時今日都無人重製到
    可能話技術上唔需要咁做, 但拍出黎睇到真係好爽

    回覆刪除
    回覆
    1. 以前唔知道原來係演員入電梯後,出面即時換景清場扮第二層……知道後,真的五體投地!

      刪除
  3. 《辣手神探》後段的醫院大鎗戰中,其中一幕是周潤發和梁朝偉跟一班匪徒鎗戰、梁朝偉錯手殺死警員歐陽震華,跟住他倆從上層坐電梯到下一層再射鎗,整個三分幾鐘一take長鏡頭真的好正。縱使如此,但我仍認為此片的鎗戰場面實在過多。

    回覆刪除
    回覆
    1. 其實是過多的…有點失控,但我又好鍾意睇~~

      刪除