2010年12月2日星期四

少年食神不是神,黎耀祥還是人

















亞視錄得零收視的那個周日晚上,我竟然躝咗街,參與唔到這一個慘烈的歷史時刻。

無視亞視
是哪一位高層獨具慧眼,決定用《恩雨之聲》對撼《義海豪情》最高潮的一刻?
若跟據過往來推斷,向來孤高的亞視,是不會特登製作一些(好似)好勁的節目去撼人家的,反而會離奇地播一些明明已經播了九萬幾次的……《007》電影,而且還是配埋音的。
OK,就算你繼續播甚麼中文版《鐵金剛勇破海龍幫》或《鐵金剛大戰金槍客》,我可能依然會睇(相信某一小撮人也會睇),起碼,感覺到有關方面都算有諗過點樣對撼,叫做做番啲嘢(只是力有不逮而已),但,而家竟然是……
OK,我叫自己去相信,亞視這一著其實是特登的,是要去走偏鋒,叫大家估佢唔到。但現在何止估佢唔到,直情是:無視。
基於《恩雨之聲》擺明是一個宗教節目,偏偏竟然完全冇人去睇,即使我沒有信仰,也不禁懷疑背後可能有「人」做緊嘢。是撒旦。

大結局晚咪幫襯茶餐廳
如果擺到明放棄是一種態度,那麼投棄權票也是一種表態。
我自然知道那一晚是《義海》大結局,但又竟然選擇了躝街——冇錯,我是真的在躝街,期間沒有去過任何茶餐廳打躉。
真人真事。《公主嫁到》大結局當晚,我光顧了某大型茶餐廳,餐廳裡放了一部比我家那部還要巨的LCD,舉目所見,全間茶餐廳的員工都很上下一心,望實那部LCD,情況就像集體撞了邪。瑟縮一角的我,不過想叫碟西炒飯和凍奶茶,但全程冇人認我。那一刻,我就像11月28日晚上的亞視,感受到「無視」的滋味。
卒之,有人認我了,因為啱啱剛進入了廣告時段,茶餐廳也回復了正常的生氣和喧囂,只是10分鐘過後,又變番之前那一個集體撞邪場面……我突然想做一個實驗,如果趁這個集體撞邪時間像一縷煙般溜走,即走單,會唔會被當場逮著?
最後,我冇咁做,反而是三扒兩撥搞掂了桌面的西炒飯和凍奶茶(題外話,當晚那碟西炒飯炒得好正常,或許是廚房裡冇電視吧),便拎著單去櫃面找數。或者,自己向來好怕跟群眾集體去進行一些離奇的事吧。
我錯了。我揀錯時間找數了。至今,仲清楚記得那個收銀阿姐的眼神是幾咁怨恨,恨我打斷了她專注睇劇的心情。
所以,每逢甚麼話題劇播放震撼兩小時大結局的晚上,千萬不要光顧茶餐廳。

我冒犯了少年食神……
每次當題材涉及電視劇,我總表現得好憤恨,好似好睇唔起咁。
錯晒。我是真的不介意再做電視迷的,像後生時,沒有甚麼娛樂,只是單純地一返屋企就打開電視,津津有味咁睇。現在叫我最怕的是:當大部分人都在講某齣劇好勁好勁,但我又完全不覺得勁時,這總令我反問自己:自己係咪精神有問題。
同類情況,身邊很多人叫我去睇那個甚麼少年食神的節目,話好好笑云云——結果,我睇咗,仲睇咗幾集添,但我連半聲乾笑都冇發出。直至一集講拉麵的,少年食神唔知在食咗啖乜鬼嘢後,他呆了,筷子從手中跌下來,目的是為了表現舊嘢好味到佢呆咗吧。我笑了,但只是冷笑,因為戥他難過——大鑊!人家是「少年食神」,而人對神的應有態度是敬畏,但我竟然發出這麼一下冷笑,太冒犯了!噢,請赦免我的罪。

黎耀祥
最後,想用少少位來撐黎耀祥。即使我只看過1.5集《義海》,但不代表我不是黎耀祥的fans,在他還未入屋時,已經看了他很多電影,甚至連很多祥迷應該未睇過的《殺手再培訓》都有睇,那集VCD還放在家裡某個當眼處。
對比大部分小生,黎耀祥的優勝處是:由未紅到做視帝,他演出來的角色還是一個人,而不是一個扮神的人。
(原文刊於am730)

9 則留言:

  1. 《義海》,最後故事是捉到鹿唔敢脫角,浪費了

    回覆刪除
  2. 可能要顧及普羅大眾口味吧。

    回覆刪除
  3. 黎耀祥由離開至回歸TVB期間所拍攝VCD movie大部份可在BBTV的電影台重温.

    回覆刪除
  4. 話說真係吸引唔到我去追, 大家講到咁好睇, 到底有乜好睇?
    FACEBOOK上廣泛流傳的片段「食屎啦!梁非凡!」都唔知有乜好笑?

    回覆刪除
  5. '當大部分人都在講某齣劇好勁好勁,但我又完全不覺得勁時,這總令我反問自己:自己係咪精神有問題' 你絕對沒有精神問題. 只是大部份人都被TVB洗了腦.

    回覆刪除
  6. To莓:反而偶爾間看到最後幾集《天天天晴》,感覺又唔差喎。
    To June:可能大家真係驚唔睇冇話題。當大部分人都在做同一個行為時,你唔做,就會少咗份安全感。

    回覆刪除
  7. 我都無追義海,反而追《天天天晴》。
    《同事》《畢打》《天晴》三部曲攪到我要追劇!

    回覆刪除
  8. 少年x神 我都做得啦,全部都是人所皆知的食店
    反而攪笑是佢好似想溝"南京北姑"

    回覆刪除