少年食神不是神，黎耀祥還是人

亞視錄得零收視的那個周日晚上，我竟然躝咗街，參與唔到這一個慘烈的歷史時刻。

無視亞視
是哪一位高層獨具慧眼，決定用《恩雨之聲》對撼《義海豪情》最高潮的一刻？
若跟據過往來推斷，向來孤高的亞視，是不會特登製作一些（好似）好勁的節目去撼人家的，反而會離奇地播一些明明已經播了九萬幾次的……《007》電影，而且還是配埋音的。
OK，就算你繼續播甚麼中文版《鐵金剛勇破海龍幫》或《鐵金剛大戰金槍客》，我可能依然會睇（相信某一小撮人也會睇），起碼，感覺到有關方面都算有諗過點樣對撼，叫做做番啲嘢（只是力有不逮而已），但，而家竟然是……
OK，我叫自己去相信，亞視這一著其實是特登的，是要去走偏鋒，叫大家估佢唔到。但現在何止估佢唔到，直情是：無視。
基於《恩雨之聲》擺明是一個宗教節目，偏偏竟然完全冇人去睇，即使我沒有信仰，也不禁懷疑背後可能有「人」做緊嘢。是撒旦。

大結局晚咪幫襯茶餐廳
如果擺到明放棄是一種態度，那麼投棄權票也是一種表態。
我自然知道那一晚是《義海》大結局，但又竟然選擇了躝街——冇錯，我是真的在躝街，期間沒有去過任何茶餐廳打躉。
真人真事。《公主嫁到》大結局當晚，我光顧了某大型茶餐廳，餐廳裡放了一部比我家那部還要巨的LCD，舉目所見，全間茶餐廳的員工都很上下一心，望實那部LCD，情況就像集體撞了邪。瑟縮一角的我，不過想叫碟西炒飯和凍奶茶，但全程冇人認我。那一刻，我就像11月28日晚上的亞視，感受到「無視」的滋味。
卒之，有人認我了，因為啱啱剛進入了廣告時段，茶餐廳也回復了正常的生氣和喧囂，只是10分鐘過後，又變番之前那一個集體撞邪場面……我突然想做一個實驗，如果趁這個集體撞邪時間像一縷煙般溜走，即走單，會唔會被當場逮著？
最後，我冇咁做，反而是三扒兩撥搞掂了桌面的西炒飯和凍奶茶（題外話，當晚那碟西炒飯炒得好正常，或許是廚房裡冇電視吧），便拎著單去櫃面找數。或者，自己向來好怕跟群眾集體去進行一些離奇的事吧。
我錯了。我揀錯時間找數了。至今，仲清楚記得那個收銀阿姐的眼神是幾咁怨恨，恨我打斷了她專注睇劇的心情。
所以，每逢甚麼話題劇播放震撼兩小時大結局的晚上，千萬不要光顧茶餐廳。

我冒犯了少年食神……
每次當題材涉及電視劇，我總表現得好憤恨，好似好睇唔起咁。
錯晒。我是真的不介意再做電視迷的，像後生時，沒有甚麼娛樂，只是單純地一返屋企就打開電視，津津有味咁睇。現在叫我最怕的是：當大部分人都在講某齣劇好勁好勁，但我又完全不覺得勁時，這總令我反問自己：自己係咪精神有問題。
同類情況，身邊很多人叫我去睇那個甚麼少年食神的節目，話好好笑云云——結果，我睇咗，仲睇咗幾集添，但我連半聲乾笑都冇發出。直至一集講拉麵的，少年食神唔知在食咗啖乜鬼嘢後，他呆了，筷子從手中跌下來，目的是為了表現舊嘢好味到佢呆咗吧。我笑了，但只是冷笑，因為戥他難過——大鑊！人家是「少年食神」，而人對神的應有態度是敬畏，但我竟然發出這麼一下冷笑，太冒犯了！噢，請赦免我的罪。

黎耀祥
最後，想用少少位來撐黎耀祥。即使我只看過1.5集《義海》，但不代表我不是黎耀祥的fans，在他還未入屋時，已經看了他很多電影，甚至連很多祥迷應該未睇過的《殺手再培訓》都有睇，那集VCD還放在家裡某個當眼處。
對比大部分小生，黎耀祥的優勝處是：由未紅到做視帝，他演出來的角色還是一個人，而不是一個扮神的人。
（原文刊於am730）