2014年3月26日星期三

月巴愛的教育(1):因為愛不合時,我得到了Bonus


























當知道有band 1中學校長公布校內拍拖名單時,我極其憤怒——點解佢唔係我讀中學時個校長?

因為追到,才有幸出現在名單中

 這單新聞出街當日,有朋友在我fb留言:「如果你當年讀呢間咪日日俾人叫名?」
我咁答:「No,我都媾唔到。」
留意,出現在這名單的,只包括「拍緊拖」的同學,而「想拍拖」以及「積極媾女中」的,無奈地是冇份入選的。作為長年追唔到女同學的我,最最最最最乞我憎的,自然是那班成功追到的——對手。
點解會有對手?只怪我太好勝。好勝,令我只識得去追那些風頭躉女同學。我不知道這是基於甚麼心態,只知道一點:「追一個好多人追的女同學」和「追一個冇(乜)人追的女同學」所得來的成就感,是完全不同的。我認,對於那些冇(乜)人追的女同學,我的確睇唔上眼。我認,我被好勝蒙蔽。
但好勝的我從來都沒有搞清楚另一點:不論是「好多人追」抑或「冇(乜)人追」的女同學,其實都不願身邊男友是個月巴仔囉。Yes,不論有沒有被我睇得上眼的她們,一律睇我唔上眼。
結果我的中學生涯咪長年累月地,形單隻影囉。所以,如果當年母校校長能夠在早會時公布嗰班拍拖同學,再「的」佢哋出嚟示眾,我諗,我會好開心,開心到有種乜仇都報晒的快感……
但問心,我真的咁開心咁有快感嗎?絕對不是。我深深明白到,我其實好恨自己的名字也能出現在那份list中,成為「追到女的極少數」;而不是呆站人群裡,作為「媾唔到女的大多數」。嗚嗚。

為了愛,我跑長跑發奮寫宋詞
讀書時我的確在媾女上屢敗屢戰再敗再戰forever。
而為了媾女,甚至做過很多從來冇諗過會做的事。
1.跑長跑!——其中一位(冇幸)被我愛過的女同學是長跑好手,於是每逢周六我都去城門河畔練跑,一來為咗撞佢,二來也是為咗撞佢,結果撞唔到,卻反而令我長氣咗兼瘦咗(一段短時間)。
2.發奮讀書!——另一位(冇幸)被我愛過的女同學,學科成績優秀,為高攀對方,不讀書的我竟然努力讀起書來。即使同告失敗收場,但那段時間的用功苦讀,令我得以在中五會考大步檻過。
3.學寫宋詞……如果你有買《月巴事》兼有睇個序,應該知道中六時的我為了追師妹,竟然拿了一個詞牌,查了一晚字典,只求寫一首情深兼平仄正確的詞。一如以往,對方拒絕了我那文學味濃的愛意(我甚至懷疑佢究竟睇唔睇得明我首詞),但這次低能經歷,令我對文學產生(動機不純粹)的濃厚興趣。實不相瞞,我考A-level時中國文學是攞A的。
是否「愛不合時」?我不知道,或許關鍵一直都只是「追不合時」。即使每一次失敗經驗都令我痛過失落過,但過程裡,又的確俾我搵到啲嘢。OK,你可以話我的經歷對解釋「媾女無害」過於片面,那麼,該位以一個同學經歷便將「愛不合時,抱恨終身」一錘定音的校長,一樣咁片面啫。

最後,感激一位好nice的美術科搣時
畢業時曾經有好心人問我:有冇興趣教中學?
當.然.有.啦.咁.高.人.工——不過最後推咗。
推的原因有二:
1.我怕成日困喺學校好悶(點知原來做記者咪又係困喺office);
2.我唔識點去教學生。
中三某天放學後,我跟一位好nice的美術科搣時說「我失戀了」(實情是被拒愛),結果好nice的美術科搣時盡心盡力開解我,開解過程中更完全沒有講過一句「中學生不應談戀愛」。
假設當年真的做了阿sir,而又有學生跟我說他失戀了,我應該好nice地聽他的失戀絮語,還是好唔nice地一句KO佢:「愛不合時,抱恨終身!You know?」但我本人當年求學時明明以長年媾女失敗而聞名於世……要我做這麼一個口不對心的阿sir,我做不來。就像我當年也討厭嗰啲專為我set定諸多規條的大人,到我大個了,自然不希望成/淪為嗰啲曾經被自己討厭的大人。
其實我最想知道,那位band 1中學校長的同學現在生活過得怎麼樣?如果冇穿冇爛,則證明了:愛不合時又點啫?又唔使死嘅。而活在塵世間,不見得一定要做到校長才叫做有成就不抱恨。
(原文刊於am730)

5 則留言:

  1. 你好,請問類似的長篇文 , 是否有固定時間刊登於AM730 ?

    回覆刪除
  2. 小弟讀某小專時﹝當時冇人承認佢係大專﹞都曾經有寫詩追女仔既經驗。寫既係七言律詩兼藏頭詩﹝即係台灣網友寫俾蔡正元果種﹞,而且係揀正女仔生日送俾佢。不過事後回想,佢只係見到我用顏色筆 highlight 咗每句第一個字,先知道我搞緊咩,實際上都係對牛彈琴,俏眉眼做給瞎子看,搵黎搞。
    宋詞太深太難寫,我試過攞鵲橋仙既詞牌諗住寫番首,結果第一、二句秦少游寫「纖雲弄巧,飛星傳恨」好似好簡單,但我諗咗半日都寫唔到,終於就放棄咗,繼續寫我既七言詩。

    回覆刪除
    回覆
    1. 記得當晚我真係通宵查字典查平庂…但我好肯定對方根本睇唔明我寫乜…
      其實古代詩詞歌賦對我來講都係好深,所以後來簡單啲,寫新詩媾女算了——不過都係失敗。

      刪除