2012年12月27日星期四

記憶像隻Game一樣長




























因為睇咗《無敵破壞王》,很想分享一點打機回憶。就由「上上下下左右左右BA」開始吧。

上上下下左右左右BA

當《無敵破壞王》出現這一幕時,現場只聽到零星笑聲。畢竟要如實經歷過8bit和紅白機年代的機迷,才會知道這個小秘技。這秘技是由Konami「發明」,可以使用的game有《魂斗羅》,成功輸入便立即有30條命!對於我這類打動作game渣的人,這秘技是必需的,但記憶中有同學竟然能夠不用秘技,而且單單用一條命便打爆了《魂斗羅》!

《快打旋風》的神秘鎖匙
小秘技其實是遊戲的一些程式漏洞。那時沒有網上forum,這些秘技主要靠口耳相傳,但正因為口耳相傳,便產生過不少遊戲秘技的都市傳說:最經典的像《快打旋風》。傳說喺尾二嗰排,在某一特定位置用昇龍便可以攞到一條神秘鎖匙,開啟神秘的一關……當年眼見身邊不少朋友為了這個傳說而傾家蕩產。但最重要是:有冇人話你知秘技,某程度說明了你的交遊廣不廣闊。

富貴人家專用的PC Engine
打機也凸顯了貧富。
當年打《快打旋風》的唯一途徑,是街機——直至PC Engine的出現。曾經何時PC Engine是級數最強勁的家用遊戲機。順理成章,因為有著強勁的級數,價錢也一樣強勁,我呢類窮學生是唔使旨意買到的,偏偏有一位同學坐擁了一部。
我有幸獲邀到其府邸玩過PC Engine版《快打旋風》,感覺是,好慢——啲波出得好慢,阿Ken又郁得好慢,這始終涉及硬件規格上的限制。但無論快或慢,對我影響都不大,有得玩已經好鬼滿足。

打機也需要參考書
我在格鬥game的表現是極渣的,不瞞大家,時至今日我仲係唔多曉出昇龍。
基於但凡涉及動作的遊戲我都表現欠佳,我最喜愛的是RPG。RPG,角色扮演遊戲,你想做的一切統統透過按下指令去進行,對動作白癡的我簡直是救贖。問題是,所有指令都是日文(遊戲容量有限,只可顯示五十音),要玩,就要有攻略本。當年我最迷的是《勇者鬥惡龍》第三集,如果你當年有玩過自然記得,台灣那邊出了一本超勁厚攻略,鮮紅包裝,封面/底只有字而沒有公仔,設計典雅,典雅得尤如一本學術參考書;每天返學,可能會帶漏課本,但呢本攻略一定會帶。邊個話打機和睇書不能同時進行?有些朋友甚至為了打機而去學日文,結果識多咗一種語言,非常長進。

人肉online
到現在,我依然沒有online打,只是孤獨地打。你可以話我古老,但我真的仲未接受在虛無空間同三唔識七的陌生人打機(至於點解唔搵相熟的朋友online打?我一時間又答唔到)。
而歷史是曾經有過一段沒有online打機這回事的時間。要同朋友一齊打機,一係佢去你屋企,一係你去佢屋企,又或一齊去第三者屋企。當年家住屋邨,每逢周六夜便到隔籬屋打機,世伯伯母即使冇得睇電視都無所謂,有時仲會煲埋湯水等我哋邊打機邊享用。
打機如打麻雀,有些人的機品零舍差,因為打機而引發的爭執也不少,有時甚至搞到世伯伯母都要出面調停,或雙方家長斡旋……但記憶中,大部分時間都是愉快的。
聖誕夜宅在家裡lonely地打機的我,想到以上這些。

4 則留言:

  1. dq3本攻略 我係幾年前先爛到留唔返...

    回覆刪除
    回覆
    1. 我嗰本晨早俾我到爛…但後半part嗰個小說式攻略堅好睇!DQ3的故事也的確精彩!

      刪除
  2. 當年星矢打12宮嘅密碼又係日文片仮名,冇本攻略根本攞唔到999去打。

    回覆刪除
    回覆
    1. 呢隻堅好玩!記得在一開始設定能力值的畫面時,不斷將方向鍵按向右上,不斷按,成功便可以chok到全部分能力值爆燈!

      刪除