2013年5月20日星期一

浪漫月巴睇舊戲(廿七):淺述最佳損友的教育意義


















《最佳損友》,我呢世人最最最最最喜愛的笑片。
除了事隔25年依然能夠令我笑到爆肺,原來,仲教曉咗我好多好多。

教曉我男人之道

1.「做英雄鑊鑊要隻揪吖?你做埋我份啦!」
1988年,香港電影還置身一個所謂「後英雄本色」年代裡,我們(呢班天真的男仔和男人),看慣了單槍匹馬英雄的浪漫,卻沒有了解這類英雄的本質性戇居,是牛精帆這句反英雄的話,摑醒咗我。
2.「以後啲朋友剩係勸我努力向上、愛護家庭,咁咪好悶?唔該你哋吖,留喺度同我媾女打交窒人吖」
真正的朋友是甚麼?以上一段已經講晒。看看你身邊的朋友,係咪只會叫你應該做呢樣應該做嗰樣,成個道德使者咁款?(當然也要睇番你本人係咪嚴重缺乏道德感)。
3.「雖然我嘅肉體俾呢個女奸賊玷污咗,但係我嘅靈魂仍然係純潔嘅……」
阿叻的角色譚室超(這絕對是電影史上最優秀的一個名字!),為幫朋友而慘被片裡第二奸角(?算是吧)Dorlina(吳君如)狠狠地「污辱」(反正畫面呈現出來和我接收的感覺就是這樣),這時候,默默忍受著的譚室超淌著淚,說出這段VO,令我明白,人是由body同埋soul組成,body再dirty,soul依然可以keep住好pure。(題外話:我認為這一幕,見證了阿叻演藝事業/演技的一個高峰,一個永遠都攀越不了的高峰——簡單講,佢做完呢場戲就應該光榮引退,唔使再拍甚麼叻哥遊世界。)
4.「我話你聽吖你而家好靚吖成日都唔睬我哋全世界得你一個女人吖!?」
牛精帆、譚室超(重申,這絕對是電影史上最優秀的一個名字!)、臭口奇三大損友,齊齊冧唐麗球飾演的Happy,但冇人成功追到;直至某一個劇情轉折位,牛精帆決定爆出以上一番屈喺心裡的真心話——尤其在這個港女亂咁收兵的亂世,更能凸顯牛精帆這番話的意義。連脫胎換骨的阿源都講:「做男仔梗係要cool,唔可以做兵!」
你還甘心做一個默默的兵?醒覺吧!

教番80年代流行史(Suppose你真係好後生)
1.「先慢慢舉高你隻右腳,伸隻右手出來,摸下自己腳趾公,睇下摸唔摸唔到;嗱你而家伸條脷出嚟,盡量舐自己隻左眼……」
這是劉華等人為整蠱譚室超患上愛滋,而創作出來的自我測試法。愛滋病,80年代才廣為人知的一種病,基於病實在太新,大家都只是一知半解知啲唔知啲,很多港產笑片都會拎嚟開玩笑(畢竟令人笑的其中一種方法就是玩弄禁忌)。而家睇番,好多都帶有歧視性質,冇人再敢玩的了。
2.「咁都好啲有多一個人陪,入去見到大咪都唔使驚。」
大咪,林嶺東《監獄風雲》Boss級人馬。這部1987年電影勁在令人普遍相信,每個監獄,都存在了大咪乙隻。從而戒慎恐懼,唔敢犯法。
3.「40342 40342 434243 43420 024 43420 333424024 334 024 334 024 3433 3433 3324 3430 044022 43243」
王晶鍾意拎其他港產片玩二次創作,1987年的《胭脂扣》便被改為戲中戲《胭脂拉鏈》,因為「扣成日都解唔開,鏈方便啲吖嘛」;以上一段數字,是由牛精帆粉墨的十二少,留給譚室超反串的如花的陰間相認密碼。我當年有同學背得晒。黐線。

這原來是一部預言書……
1.「香港改咗法例,冇身份證嘅唔使拉,有身份證嘅先要拉」
曹查理在夜總會同一個省港旗兵講的。嗱嗱嗱,係咪覺得好有真實感先?
2.「我哋一定要了解伙記嘅需要,唔好以為係我哋帶挈伙記搵兩餐,其實伙記帶挈我哋發達就真。」
遺憾是,在25年後,只有這段話的「反面」被實現,被大條道理化。
真係……蜜瓜你個椰子吖!!!

沒有留言:

發佈留言