2015年10月30日星期五

ROBOCAT 493


浪漫月巴睇女星(50):第50位女星,不死子珊。



















如題所示,這一篇已經是第50篇。心裡不期然有種好想隆重其事的感覺。

1.就是因為這種隆重其事感,以致人選上,經過一輪痛苦掙扎。

2.結果痛苦掙扎後,依然冇結果。只知道想寫番一個香港女星。

3.大佬咁究竟寫邊個好吖?——我問自己個心,然後確認了一點:我心中從來沒有黃翠如(我實在不明白Why有人咁大膽話每人心中都有一個黃翠如),但肯定有一個徐子珊——一個近年被叫 / 笑做「不死」的人。

4.Why我心中會有徐子珊?我不知道,只知道她選港姐那一年,我咁啱轉工,做娛樂編輯,不得不對娛樂加倍留意,而相當好彩地,當年香港仲有娛樂圈。

5.記憶中,徐子珊這名港姐冠軍,認受性OK高,不像近年的,選完翌日已忘了她們的樣貌名字——而事實是,我根本就冇睇,亦唔Care。

6.於是,有同事找了她做六版人訪,而咁啱,是由我編的(當時全部稿根本都係我編),唔知點解地我編得特別用心。事後,有人話Why要訪問佢?又唔係紅,個人本身又冇乜故仔云云……但唔使好耐,娛樂版便出現了大量徐子珊新聞。是甚麼新聞?我不一一詳述了,反正你知的自然會知,就算唔知,一切已消散成雲煙。娛樂新聞的本質由始至終都是:肯寫(好或衰)你,便證明你有新聞價值,有觀眾鍾意睇你。

7.因為一些(被認為不符合港姐身份的)言論,徐子珊險被雪藏;被高層照過肺,又冇事,繼續被力捧,拍劇,由最初不被睇好,到後來漸被睇好,2007年拍電影《跟蹤》做埋女主角——即使有人認為真正主角其實是梁家輝任達華,但沒有了「豬女」這角色,我可以好大膽咁講,齣戲可能依然好睇,但肯定冇咁好睇。對比徐子珊在TBB劇所需要的「放」——喜怒哀樂需要用力地如實地表達晒出來,「豬女」的特質,是「收」——她的工作需要她把自己在日常中完美地收埋,以免行跡敗露。事實證明,入行只有三年拍戲經驗尚淺的履歷,正好符合「豬女」這個刑事情報科跟蹤隊新人的角色,她真的演繹到那種缺乏經驗值的戰戰兢兢,而同時又把港姐應有的艷光收埋(冇理由搵一個好紅唇烈焰極待撫慰的人去跟蹤罪犯吧)。

8.是幸也是不幸。冇錯,徐子珊好快便擁有一個大家噏得出名的角色,擁有一次讓人難忘的好演出,問題是,咁多年來,好多人都似乎只記得她這一次演出……OK,我知我知,好多人都好記得她在《潛行狙擊》的姚可可以及《神鎗狙擊》的上官明珠,但你之所以咁記得,不是因為她在演繹角色上的呈現,而是因為她(被編劇巧妙安排再加上導演精心處理)的不死表現。

9.是劇集連累演員?抑或演員拖垮劇集?好難定斷。但事實是,徐子珊由一個曾經被睇好兼有大量機會的新人,漸漸變成了一個笑話,由演出到言行到舉止——偏偏當這個明明令人笑的笑話去演出喜劇《My盛Lady》,又被認為懶好笑,甚或唔好笑,成件事當堂變成了一場最沉重的玩笑(我有睇《My盛Lady》,我看得出徐子珊好努力地去搞笑,只是偏偏遇上蝦頭這個太強橫的對手;最後安排蝦頭去扮徐子珊,這一個戲謔更加深了「徐子珊笑話」本身的可笑)……

10.工作關係,有時我(會擺明為集郵)而去參與訪問。徐子珊,是我見得最多的女演員。有次送書俾佢,我咁寫:希望她能再次交出叫人難忘的角色,並強調是——電影角色。有人話我好串,但我真正想說的是:在現今電視製作環境思維及氣氛下,電視劇未免太局限了她。如果想再交出令人難忘的演繹,一定要搣甩現今電視劇所要求的「放」。我不知道徐子珊當日睇到後會點諗?會唔會覺得我呢條月巴好Q串?但我想講的,無非係咁。我是真心希望你的「不死」,可成為你演藝事業的形容詞。

11.要交稿了,編輯J等緊。一年前,我估不到竟然可以寫夠50位女星,讓我用50個星期快速檢視了50個女星 / 女性的生命。Yes,這是最後一篇「浪漫月巴睇女星」,Thx!(完)
(原文刊於am730)

我們沒有奇蹟補習社,只有奇蹟教育局




















《奇蹟補習社》,Movie of the Year!——如果你問我有沒有詳盡或專業一點的影評?我都係嗰句:Movie of the Year!

以下人士,一定要睇!
其實我會加多一句:唔睇唔得。
如果你在現實中keep住俾人話係垃圾,你一定要睇!(如果掉番轉,你在現實中keep住話人係垃圾,你一定一定要睇!)
如果你正在千辛萬苦地追尋夢想,你一定要睇!(如果你千辛萬苦地都諗唔到有乜夢想,你一定一定要睇!)
如果你是學生,你一定要睇!(如果你是阿sir或搣時,你一定一定要睇!)
如果你現正為人父母,你一定要睇!(如果你準備為人父母,你一定一定要睇!)
如果你覺得生命無非是食一餐屎宴,你一定要睇!(如果你深感生命是一場食極唔完的屎buffet,你一定一定要睇!)
因為齣戲話俾你知,你一日未死,一日還留在這塵世,你面前就依然存在可能性——冇錯,「可能」預設「不可能」,如果你晨早認命認輸,即是自願把所有「可能」變換成「不可能」。
最重要是,電影劇情並非純屬虛構,而是真人真事。

就算有村架純同我一齊上堂……
實不相瞞,我做過補習社阿sir。
但當然不是那些被人登報露骨招攬的補習天王。而只是開設在屋邨商場角落,似幫人湊仔多過教仔的補習阿sir。
又當然,我沒有遇過有村架純這類學生。遇到的,是八個分別讀緊中一至中三的學生,連埋月巴的我,屈在一個唔夠二百呎的空間,每星期兩堂,每堂粒半鐘。我需要做的事,如下。
1.維持秩序:最主要是嚴禁某個中一生大聲唱鹹濕歌,即梁栢堅《甜詞》中記載的那些——OK,我自己都有聽有唱,但間補習社唔係我開嘛……咁做,為勢所迫。
2.教做功課:呢樣好正常,也是很多家長目的。學生辛苦,我亦痛苦。
3.落堂後請食Seven軟雪糕:這是由學生提出的課外活動。食緊軟雪糕的他們,每一次都表現亢奮。
4.睇《陰陽路》:也是課外活動,第一集《陰陽Road》是三個學生陪我在希爾頓中心睇的。他們表現得同樣亢奮。
5.講故仔、分享我(微不足道的)人生:學生未必鍾意做功課(換轉我都唔鍾意),但好鍾意聽一個非親非故的人講一些他們未經歷過的事——尤其對於大學生活,部分學生其實OK嚮往,嚮往,可能因為那種聽落好自由的校園感覺(有這份嚮往的,也是補習班中比較用心做功課的人)。
我明白到一點。他 / 她們願意聽我講故仔,是基於一份信任,而因為信任,他 / 她們也樂意地把自己的一些生活喜怒哀樂講我知——即使明知我根本幫唔到啲乜。
老實,我肯定不是《奇蹟補習社》那位把全盤生命貫注教學的補習老師,但我有跟幾個學生講:Come on,無論點,最緊要唔好俾人睇死囉(即使由我去講,說服力明顯冇乜)。
在補習社做了一個學年,然後,畢業,搵工(期間有人問我想唔想教中學,我推咗)。
我不知道那八個學生日後發展如何。只隱約記得其中幾個的樣貌,以及好記得佢哋幫我改咗個花名,大白菜。
我不知道塵世間是否真的存在「愉快學習」這回事,而回看多年返學經驗,的確未見過有同學笑住做練習;入到試場,也未見過考生笑住考……我諗,就算有村架純同我一齊備課上堂做功課,我也只能夠——學習得冇咁痛苦,因為當你明知學習就是為了應付考試,就注定痛苦。
偏偏夠膽高舉「愉快學習」的人,根本不明白考試本質,而呢個人,偏偏就是教育局局長。奇蹟啊。我們應該拍番齣《奇蹟教育局》囉。
(原文刊於am730,20151028)

ROBOCAT 492


2015年10月23日星期五

ROBOCAT 491


浪漫月巴睇女星(49):她的少女時代,永遠的七瀨美雪



























七瀨美雪是誰?就是每次都以爺爺名義揪出兇手的金田一一的青梅竹馬美少女同學。

1.讓我先帶大家回到我的少年時代,90年代初。

2.在一本當時新推出的漫畫雜誌中,睇到一個我從未睇過的漫畫類型。

3.《金田一少年之事件簿》,推理漫畫,嚴格來說是本格推理漫畫。每一個單元,都有人(在謎之情況下)Keep住被殺,作為名偵探金田一耕助個孫的金田一一,就以能人所不能的精密推理頭腦,推理出佢哋點死,推理出真兇是誰……當時連載中的,是系列第一部中的第二單Case「異人館村殺人事件」——嘩正吖!單案有分屍夠晒獵奇之餘,個謎題設定仲真係估佢唔到,所以當最後金田一一為我拆解成單Case之真相時,我不禁對住本書大叫Yeah!

4.好多年後才知道,「異人館村」的分屍設定原來是直接抄考自島田莊司《占星術殺人魔法》,原來我Yeah錯了對象,Sorry……但《金田一》的確在我的少年時代,引領了我進入日本推理大門。

5.但金田一雖勁,也要美少女扶持。肩負這重任的就是七瀨美雪。原作中的美雪,一個品學兼優女學生,但單是品學兼優,喺少年漫畫裡頭係唔夠嘅——(所以)她的身材亦(被設定得)相當強勁,強勁到連推理頭腦冠絕全日本因而不負爺爺之名的金田一一,也忍不住成日抽佢水……而當知道1995年電視版的美雪竟然是由友坂理惠飾演時,我就像面對奇案時的劍持Sir般搲頭,完全地搲頭,完全徹底地搲爆頭。

6.1995年的友坂理惠,16歲,急速冒起的美少女明日之星。有版你睇,當年的她正值青春還是有點Baby Fat,但Fat極,都Fat不到原著中美雪的豐滿地步……當我抱著質疑態度去審視《學園七不思議殺人事件》,卻不得不承認,她如實地演了美雪的可愛特質出來,而這種特質是內在的——我好難講出這種特質是怎樣被友坂理惠演出來,但看著,我真的被眼前這個少女吸引,完完全全地吸引。

7.因為友坂理惠版的美雪,也令我鍾意埋堂本剛版的金田一。我可以好大膽咁講,歷來咁多代人演繹過美雪和金田一,只有「友坂理惠 + 堂本剛」的版本,才是最完美的一對(日後的美雪人選,OK啦;至於金田一後繼人,我頂籠接受到松本潤,亀梨和也同山田涼介就……唉)。

8.但大概冇任何演員想一世都只演一個角色吧。友坂理惠演美雪,只演到1997。之後她令我較深刻的作品,都同電視或電影無關,當中包括:1998年的寫真集《Feel》、1999年1月推出的平價寫真集《月刊 ともさかりえ》,以及同月推出的單曲《Cappuccino》。擺明很瘦的她,努力地擺脫七瀨美雪的美少女形象,以她的獨有性感,告別青春——尤其《Cappuccino》MV的仿鋼管舞演出,我唔知你點睇,我其實覺得好誘人,配合椎名林檎的曲詞(她與友坂理惠好Friend),演繹了一種性感,一種帶點傷感的性感。

9.而世紀末已經襲來。告別90年代,友坂理惠成為了一個冇乜代表作但又依然有工開的存在。我承認,我冇乜留意佢,而媒體大概也只會聚焦她那一張臉(你應該知道聚焦的重點吧,我實在唔想寫出來)。直至早排,偶然看到《First Class 2》,我明明不忍看下去但為支持她又一直睇落去結果愈睇愈傷心……

10.當現實終於去到《回到未來2》的那一天,我們正在懷緬90年代,連象徵90s日本街牌潮流的雜誌《Boon》也復刊了。夏季號封底人物,是穿上Air Max 95的友坂理惠,Caption咁寫:當好多讀者談起該雜誌封面人物,都必定想起她(她是1996年8月號第100期的封面人物)——眼前這個友坂理惠,36歲,不再美雪不再性感,而是笑得清爽簡單,現在式的她,卻像把我拉番去20年前,那個感覺無憂無慮的過去。
(補一句,橫溝正史原作中的金田一耕助,終身未娶,膝下無兒無女,所以金田一一呢個孫應該係石頭爆出嚟…)
(原文刊於am730)

2015年10月16日星期五

浪漫月巴睇女星(48):很想跟有村架純說:君のことが好きだよ!



























且讓我把引言寫得簡簡單單:我愛有村架純。我愛她的一切。

1.即使愛這回事殊不簡單。

2.怎去開始解釋這段(單向的)情?因為《海女》。

3.N年冇追劇的我突然決定追《海女》。我OK想睇能年玲奈,我好想睇橋本愛,但我最想睇的其實是小泉今日子。實不相瞞,那一刻,我根本不知道北三隆還存在了有村架純這個人。

4.對於日本藝能界的認知,是我仲讀緊小學時的事。昭和年間,80年代的那些姐姐對年少的我有著一種唔知點形容的吸引力,最令我著迷的是中森明菜(可參看之前的「浪漫月巴睇女星」),而迷上小泉今日子,則因為某一集《今夜不設防》。在黃霑面前,小泉今日子可愛得來有著一份豪氣,嬌滴滴的同時面對黃霑攻勢游刃有餘;即使成集節目其實沒有傾過甚麼深入(或不深入)話題,卻讓我深深記著這一位(在黃霑面前不失霸氣的)揚眉女子。

5.《海女》好好睇。這不只是一個鄉下少女尋夢的故事。而是藉著少女阿秋對夢想的追尋(但對比結衣,其實她不太知道自己究竟在追尋甚麼),讓佢媽咪春子回溯一次自己的過去,她的過去正正發生在80年代,泡沫經濟爆破前、盛產Idol的繁盛日本,她決意孤身離開鄉下到東京尋夢……如果你也有睇《海女》,自然知道春子遭遇;她因為自己那段刺痛的過去,不得不嚴格審視正打算做同一件事的女兒;她決定放手讓女兒去試,偏偏卻令自己再一次面對過去。

6.飾演天野春子 / 小泉今日子少女時代的,就是有村架純——為重現那段過去,她的髮型打扮妝容自然需要復刻昭和80年代——唔係喎,睇睇吓,她甚至連笑容和嬌羞都是屬於那個時代——她根本不是在復刻,她根本就是昭和就是80年代!黐線!

7.尤其她的臉。你望真,每逢她笑,她的Baby Fat便會躍然於臉上,Kawaii呢!——她的臉竟然存在了一種已經不容於現世的Baby Fat!在這個講究斧鑿修飾的超級人工年代,女星只會容許自己叫Baby,而絕不容許臉上Fat啲啲。

8.這是有村架純的得天獨厚。所謂美,是一種Keep住伴隨潮流而變動的神秘概念,OK,咁當然,生得靚就係生得靚,但一旦落入(被潮流蒙蔽、玷污的)俗世眼光中,你的靚隨時只被看成是一般靚——當世人都在撞邪地追捧尖面時,有村架純的FatFat面,好大機會被認為是缺點,一個妨礙佢(被判斷成)更靚的缺點。但正因為擁有這缺點,在她參加《海女》女角甄選時即使落選,卻被睇中成為了演繹小泉今日子少女時代的不二人選——她被時代目光誤判而產生的缺點,反而成為了一種在現世好難再搵到見到的珍貴特質。

9.其實我冇追晒《海女》。心急好想知劇情發展的我,心急地上網搵晒劇情嚟睇,後段劇情藏著的那一份痛,絕對是我最承受不了的一種痛——一種由命運發展出來的無可奈何的日常之痛,而《海女》中由始至終真正被這種痛折磨的人是,結衣,她太清楚自己想得到甚麼,而偏偏又甚麼都得不到。現實中,有村架純在中學時睇電視劇,唔覺意問了自己一個問題:咦如果由我去演,會係點呢?為了解答這個她一時間答不來的問題,她立志成為演員,然後離開家鄉,到東京去——Yes,就像天野春子。分別是,虛構的天野春子失敗了,真實的有村架純成功了。22歲的她,2010年正式出道,至今才不過五年時間。我可以好大膽地推斷,未來五年,有村架純會更紅。

10.最後,要講一件事。想必大家都知道有村架純就快會來香港吧。上星期,放工後,同事C輕描淡寫跟我說:「喂月巴,月底訪問有村架純喎,你去唔去見佢吖?」我的答案是——唔使講都知啦。養兵千日用在一朝,我學日文苦練得來的嗰句「君のことが好きだよ!」終於有用嘞。哈哈哈哈哈!哈哈哈哈哈!
(原文刊於am730)

你的合理,我認為好唔合理!


























返學後,時間嚴重唔夠使。唔計日常返工和精心繪畫《Robocat》,還有備課 + 導修assigned reading + 寫paper的參考書目……Well,我近乎冇乜睇過。

重新檢視我們信奉的偽真理
但我還是同自己講:好彩有讀(畢竟現兜兜交咗學費嗚嗚)。
哲人留下的話語,令我重新檢視一些自小就被灌輸的道理,一些我曾經信到十足十的道理。
像「書中自有黃金屋」。你總讀過書吧,那麼,你買了樓未?OK,知你買咗樓嘞,但你買的只是單位乙個,而不是一間house(至於黃金不黃金呢啲門面嘢我就不同你斟酌了)。當然,總有些讀過書而又出類拔萃的人有能力買到一間house(而house裡又真的放有黃金若干兩),但亦只能說,有些讀書人做到有些讀書人做不到。
這句(好似真理的)古諺語一經日常經驗檢視,原來不是甚麼真理,只是一句可能真但更大可能落空的說話,或大話。

你永恆地摸不透的「報應兄」
這一句還算易搞,也有一些,根本無法檢視其真偽。
像「善有善報,惡有惡報;若然未報,時辰未到。」實不相瞞,知性如我在人生中也曾多次講過呢句嘢,即使今時今日冇講出口,心裡面一樣會諗。
塵世間太多離譜的惡人惡行了(惡行自然是由惡人做出來,所以不要再懶理性說甚麼對事不對人),問題是,對於這些(幹出惡行的)惡人,我們奈佢唔何——佢可能係富豪,佢可能係高官,佢可能係(冇紀律的)紀律部隊中人……
在這個極度無可奈何而又咬牙切齒恨不得煎其肉拆其bone的情況下我們所能說的就是:善有善報,惡有惡報;若然未報,時辰未到。吼!(個「吼」字唔講都得)
講完,心裡就自然覺得呢條惡人終有報應,可能聽日可能後日可能下個禮拜,總之就肯定是在未來一日啦。
如果惡人真的在聽日或後日或下個禮拜得到所謂報應(但怎樣才算是真正的報應?)——總之只要在你有生之年發生,操縱報應的嗰位「報應兄」便像幫你出了一口氣;但如果「報應兄」一味拖拖到你入土為安後才願意出手整治,你點睇?又如果「報應兄」決定放佢一馬,惡人終其一生都食好住好仲安享晚年,你又點睇?
有人可能會話:無論有幾食好住好咪又係一樣要死,超!
我亦可以話:超,咁你千辛萬苦儲夠首期買間貴價劏房供到死先供完,又冇做過甚麼惡行,咪又一樣要死。咁,你個報應咪仲甘?假如死就是報應,我們每一個人都有個報應的deadline。

若然未報,合理時間未到!
受監警會啟發,對於檢視報應我有個嶄新切入點——合理時間。
時間好公平,因為客觀,我的一秒和你的一秒,完全一樣(當然,你一秒所賺的錢絕對可以多過我,但這已涉及多一個範疇,而跟時間本身無關)。
合理時間不同。你的合理跟我的合理,可以是完全不同的道理——1.你老闆勒令你第二朝做好個PowerPoint,佢認為俾足成晚時間你,好合理啦笨;但你心裡面肯定會呻:得嗰一晚?好唔合理!2.Lecturer俾足成個sem我去做paper,好合理;我得嗰一個sem去做paper?好唔合理!——合理不合理,是個永遠無法解決的時間糾結。
再檢視報應。「若然未報,時辰未到」中的「時辰」,究竟指乜?太虛無了。若換成「若然未報,合理時間未到」,即使依然唔知幾時才算合理,但至少,聽落官腔啲,而官腔,對塵世間不少人來說,永遠受用。
但有人又會問:Hey,咁「合理時間」是由哪個時段開始計算呢?——自然是由惡人做惡行的那一個moment開始計算啦笨。這麼顯淺的問題,竟然仲有人(佢讀的書肯定比我多,住的單位肯定比我大)好意思提出,實在好唔合理。
(原文刊於am730,20151014)

ROBOCAT 489


ROBOCAT 488


2015年10月9日星期五

ROBOCAT 487


浪漫月巴睇女星(47):我的命中命中,You Were My Everything


























在(根本不存在的)原定計劃中我冇諗過會寫王菲。即使王菲曾經是我最喜愛的歌星。

1.冇諗過寫,原因:A.唔知點寫。B.而且已經太多太多人寫過。

2.所以本文只能從月巴的微小觀點看,一如以往。

3.踏入90年代,開始作狀的我有一個很作狀的行為:一邊睇《李天命的思考藝術》一邊聽王菲《執迷不悔》。書,似懂非懂,但對一個作狀的人來說,「似懂」已夠,而更重要是俾人知道你有睇;聽歌,仲簡單,冇話懂唔懂,只需讓身邊人知道你聽緊(蛻變後的)王菲而不是其他過眼雲煙偶像歌手,便已足夠。作狀嘛,你就是要把你的行為露骨地宣示俾全世界知(獻媚也一樣)。

4.但問心,我又真的超鍾意《執迷不悔》:超鍾意封套上那個王菲;超鍾意那個隨碟附送的月曆(一個月一張卡,好名貴!名貴到唔捨得用,只會間唔中隆而重之地拎出來睇);超鍾意《執迷不悔》這首歌,國語粵語版都鍾意,鍾意到有次交功課把「執迷不悟」寫成「執迷不悔」……其實也超鍾意其餘八首歌——在那個香港唱片工業昂然邁進K歌的年代,好多歌星出碟,通常只有Plug的那兩、三首叫做襟聽。王菲這隻大碟,實在叫我感動到喊。這隻還放在屋企深處的《執迷不悔》,是中六某個失落的放學後,花去一星期零用在好運中心失落地買的。

5.對我來說,《執迷不悔》絕對是90年代最難忘專輯;對於王菲,當然重要,但只是一個重要階段的開始——她證明了自己是一個有唱功得來其實唔娘(90年代前的她在造型上頗出事)的歌手,但距離她心中最理想的音樂仲有成大段距離。而事實是,今天重聽《執迷不悔》成隻碟而依然覺得好聽,是因為王菲把聲和(會替自己加分的)記憶,問心,不少歌曲的感覺編排都已不合時宜——就像大部分你今天依然會聽(唱K時依然會唱)的90年代廣東歌。

6.不像英美歌手可以隔上兩三年先出一隻碟,在那年代的香港,當紅歌手如果不能夠一年出兩隻大碟(再加一或兩隻新曲 + 精選),是講唔通的(反觀今天香港,竟然貼近英美)。王菲也依循這模式狂出碟,我亦不能倖免地需要狂買碟;不像其他同年代紅歌星每隻碟聽落都差唔多,從王菲Keep住出的新碟中,你同時聽 / 見到她Keep住變——由唱腔到編曲,由個人形象(即使有些是Copy別人,但當時我們只會讚她大膽,換轉今時今日,應該只會被插)到唱片包裝(你怎能想像《胡思亂想》竟然夠膽死成集碟搵勻都搵唔到王菲個樣),直至《浮躁》,歌詞不再重要了(所以有些歌根本不存在所謂歌詞,只聽見可能只得王菲明白的吟唱),K歌不K歌不重要了(所以也不存在K歌了),最重要是王菲自己鍾意,鍾意把七首自己作曲的作品呈現出來,鍾意把其他一切交給竇唯張亞東——鍾意把自己真心鍾意的唱出來,而這才不過是《執迷不悔》三年後、1996年的事。諗番,如果不是香港式的趕頭趕命,或許不會咁快地迫出這麼一個王菲來。如果《執迷不悔》是王菲一個新階段的起手式,《浮躁》是這階段的完美收式,由最初刻意求工的斧鑿,到最後不著痕跡的瀟灑。

7.《浮躁》是她在新藝寶時期最後一張完整大碟(但我們都知道其實仲有一張)。然後,97,王菲生B,我由返學變成返工;可能太鍾意返工,對王菲的熱愛減退了,碟還是會買,但不常聽;1999年《只愛陌生人》,成為我最後一張買的王菲專輯。之後十幾年,我的生活再沒有王菲。

8.直至上星期某一夜唔覺意聽番《一人分飾兩角》,AMK作曲,《天空小說》主題曲。那一夜,放學後,極度失落,就像廿二年前買《執迷不悔》的那個中六午後。

9.跟住狂聽番她的歌。我竟然仲識得跟住唱大部分。我找回那個我曾經作狀、曾經勁愛王菲、曾經因為她而狂睇過百次《重慶森林》、曾經以為自己終於唔使失落地返學點知更失落地返工的90年代……那個我由作狀到作悶到作死的十年。

10.這一刻,失落而成熟的我翻聽著《執迷不悔》,期待著那張早應在1997年完整地推出的《敷衍》,但過程中沒有翻睇甚麼思考藝術。唉,世事統統不過是場夢。
(原文刊於am730)

2015年10月7日星期三

終於不惑的我,等唔切知埋天命




























等了又等,等了四十年,我終於不惑了Yeah!

錯信孔子,唉
Yeah What?騙人的。
2015年10月5日晚上,還是39歲的我,完美地諗唔到今篇「月巴事」題目。
於是決定大膽做一個臨床實驗——去瞓。如果四十真的不惑,有理由相信第二朝正式年屆四十的我一瞓醒,就會立即不惑,立即有題目自動彈出來啦……
結果,一覺醒來,我真的四張了,我仲係諗唔到題目呀,X!
估唔到生日第一句自我口中吐出的,就是這個「X」。但這個(夾雜了「Happy Birthday to Me」意味的)「X」,跟過去我所說過的億億萬萬個「X」都不同,除了包含對自己又一次諗唔到題目的無奈,還有對自稱四十而不惑嗰位仁兄的憤慨。
孔子,I Hate You!嗚嗚……

又要做博士,又要講究影響因子
冷靜過後,我諗清楚了。孔子講呢句嘢,對佢來講冇(話啱定)錯,錯的只是我——我太天真,真的太蠢,蠢在輕信權威。
是的,就算被認為再權威的人,都不代表一定啱晒,一定要信晒佢(Why一定要信奉權威?咁權威本身又信奉甚麼?),而過去所出現過的所謂權威,又怎樣證明一定是權威?有沒有一套相當科學或Very客觀的方法去證明權威真係好權威?
過去,冇;But Now,有了。
就是考察一下被捧為權威的當事人係咪博士。而且有冇好高的影響因子。這個考察,足以震撼兒童界學術界。
1.阿媽叫衰仔不要偏食,衰仔大可反問:「你係咪博士?你甚至連營養師都不是!」
2.小學老師叫冇交功課的同學出走廊罰企(我已四張,讀小學已是N年前的事,不肯定而家小學界仲興唔興罰企),該同學絕對可以大條道理反問:「超!你係咪博士先?你甚至連中學老師都不是!」
3.大學教授(假設佢應該係博士吧)要求學生準時交Paper,學生亦自然可以反問:「咪以為你係博士就好巴閉,我Check過,你的影響因子仲低過李輝!」
Well,除了震撼學術界別,也動搖到日常生活。
1.我向來敬重的李錦聯師傅與我一直敬愛的德尊老師,再次合作示範菜式,期間又疑似發生爭拗,德尊老師大可話對方:「師傅你都唔係博士你憑乜教我落芡先!」當然,李師傅也可以彼之道還施彼身:「咁你都唔係德尊博士啦……」二人相視而笑——Double KO,證明大家咁高咁大,彼此不要羨慕。
2.我手痕,Check下今時今日領導香港的一班司長局長學歷,竟然是……我只找到兩個博士!OK,我明白,好多官讀完Degree冇耐就趕住加入(殖民)政府服務(殖民時代的)香港,未必有時間再進修——但當有人以冇博士學位作為冇資格做大學副校長的理由時,作為教育局之首的吳克儉,連博士銜頭都冇個傍身就膽敢統領香港教育發展,嘩成何體統?

知天命不如睇天命
四十不惑了,積極的我正為「五十知天命」而努力。但怎樣才能夠知權威的天命?而且究竟甚麼是天命?
只能說,作為凡人,不論我天命定你天命,都是睇不透的,所以不要打搞,就讓呢啲命繼續好權威地不動如虛空吧……
我決定睇楊天命。當世間事不知怎用語理分析分對錯,運程書至少話我知猴年運程相當唔錯。
(原文刊於am730)

浪漫月巴睇女星(46):書都未讀完的Emma Stone,憑乜去扮高材生?























在(根本從不存在的)原定計劃裡,從來冇諗過會寫Emma Stone。

1.因為她不是我迷戀的女星。

2.過去有唔少人問我不迷戀Emma Stone的理由,我總是啞口無言。

3.多謝HKU校委會,我終於識答了:A.Emma Stone本人並唔係博士,偏偏佢又成日在電影中佯裝高材生,成何體統?B.在Google搜尋「Emma Stone」,只有約 34,000,000項搜尋結果,數字遠低於我之前寫過的Angelina Jolie(佢有約85,000,000項搜尋結果),有冇搞錯?(八卦的我多手,Google埋「盧寵茂」,約412,000項搜尋結果;「李國章」,約265,000項搜尋結果;「廖長江」仲少,只有約43,600項搜尋結果……我不厭其煩手痕地Google埋「月巴氏」,竟然有約1,230,000項搜尋結果喎,哈。)C.自從我早幾日絞腸痧屙鑊甘後,呢一個Emma Stone,竟然一直都冇越洋慰問我,枉我過去仲真金白銀睇過佢咁多戲,行為令人髮指!

4.你可能會問,既然我不迷戀Emma Stone,Why又會真金白銀睇佢的戲?——「因為佢係好人,係Nice Guy囉,唔係因為佢嘅演藝成就。」明未?

5.任何事都需要理由。懶理嗰堆理由係唔係理由。像《情迷失控點》的哲學教授,一直找不到存在的理由,直至(迷戀佢的)女學生叫佢偷聽一個媽咪同朋友的對話後,意識到自己的存在理由就是要替天行道殺死一條友!當佢完美殺人重拾生之慾望後,偏偏又被(迷戀佢的)女學生推理識穿……呢個既可愛又可恨的女學生,就是Emma Stone。

6.Emma Stone經常飾演高材生。即使不是高材生,也總是洋溢智慧,又或知性滿瀉——就算是《飛鳥俠》中那個曾經吸毒的更生人士,迷濛的眼,也總是透出一點點莫測高深的知性光芒。

7.但Emma Stone的知性光芒,跟學歷完全無關——她晨早就為了演戲而輟學,但她向屋企人提出輟學的過程,相當知性,絕非反叛少女式的嗌晒交——她做了一個PowerPoint,名為「Project Hollywood」,以Presentation方式向屋企人闡述自己對演戲的憧憬,而呢次Present仲有歌聽——Emma Stone選配了Madonna的《Hollywood》,裝飾了她的荷里活之夢。結果當然是成功說服屋企人。2004年1月,在媽咪陪同下,兩母女搬到洛杉磯,尋夢。那一年,她15歲。

8.三年後,她首部有份演出的電影,青春喜劇《Superbad》上映,但在香港沒有上映,我唔知你有冇睇過,我就有,而且是買美版DVD睇的,但我當時根本不知道片中這位大眼女孩係乜水。《Superbad》後又拍了幾齣戲,值得一提是《The Rocker》,她飾演一位低音結他手,但她在現實中明明唔識彈Bass(如果以HKU校委會的嚴格標準審視,她根本冇資格去擔當這角色!夾硬搵佢去演,根本就是在分裂部戲!)。為演好這角色,一於去學彈Bass。

9.真正令她開始被留意的是《Zombieland》。我好鍾意,鍾意的理由是喪屍 & Woody Harrelson,但也覺得Emma Stone這個在喪屍圍城下的強悍家姐角色OK好睇,只是未達到迷戀的程度。真正令她紅的是《蜘蛛俠》,我好唔鍾意——即使她和Andrew Garfield的(假戲真做)拍拖戲好好睇(導演Marc Webb拍過好好睇的愛情片《心跳五百天》),但作為一齣Superhero電影,《蜘蛛俠》Super地唔合格。反而更想提的是她首次擔正的《Easy A》——同事C知道我要寫Emma Stone便大力推薦(跟手佢仲興奮地話自己同Emma Stone都係11月6日生日),無奈到交稿前我都冇時間睇……

10.最後想提番當日陪個女搬去L.A.尋夢的Emma媽咪。她曾患上乳癌,後來康復;自此,Emma一直替慈善團體Stand Up to Cancer做義工,協助癌病女士。或許我點都唔會像迷戀其他書寫過的女星般迷戀Emma Stone,但無阻我繼續真金白銀睇她的戲,而無需任何理由促成,她也不需提交任何學歷證明。
(原文刊於am730,20151002)

ROBOCAT 486


ROBOCAT 485