上回講到，綾瀨遙曾經在我最悲哀的某一晚令我瞬間開心過來，今回想講的則是一位由我未成年到而家牛高馬大，持續地令我開心的女星。
1.Yes，正是盧宛茵——Madam Lo。
2.一切要由1991年說起。那一年，我讀緊高中，仲有鋪睇電視癮，由黃金時間第一線劇到處境劇再到第二線劇必定全部睇勻，否則會周身唔聚財影響第二日課堂表現。當年那兩線劇集係乜？唔記得了，記得的，只有攝在兩劇中間的——卡．拉．屋．企！我可以好大膽咁講，《卡拉屋企》絕對是香港自開埠以來最最最最最最最最最最好睇的處境劇！至於97後或千禧後仲有冇好睇的處境劇？唔知喎，我戒咗睇電視了。
3.《卡拉屋企》好睇在——開心。你會真的感受到黃廖兩家在那個虛構世界中，是真心活得快樂的——當然問題天天都多，但他們就是能夠以樂天和善良去面對每一天，而那種樂天和善良並非像今時今日同類劇集的正能量，不硬掘，不露骨，所以不會令人打冷震。或許當年的我將要面對殘酷的會考吧，好需要開心，所以每逢星期一至五我都必定坐定定迎接《卡拉屋企》——連主題曲片段都不能容許自己錯過，因為我要跟住唱嘛。我記性不是特別好，但事隔多年依然能夠唱晒成首《香港新姿態》，全因為旋律好聽歌詞又夠勁：香港地，有幾多專制禁忌；俾心機，要搵錢應記有限期；香港地，要表態直言要上街……頭幾句已經概括道出香港實況以及香港人在回歸殺到前的心理境況，這就是經典。
4.《卡拉屋企》每一個主要演員都揀 / 演得好。像女角，李婉華固然熱情爽朗正到核爆，黎海珊也演繹到角色所需的橫衝直撞，但更重要的肯定是Madam Lo的肥媽。
5.在肥媽之前，Madam Lo令我深刻的角色包括：A.《季節》三姑姐。三姑姐這角色是不討好的，太八婆（記憶中劇裡甚多家庭糾紛都是由她精製而成），但沒有了這八婆又好似爭咁啲乜；B.《賭聖》六姑。六姑的角色設定就是普通庶民，大致上善良，好錫個女，不過爛賭，而且仲好衰唔衰嚴重地迷戀三叔。至於肥媽，沒有後來大部分處境劇中阿媽角色的專制麻煩，反而樂天知命，同時又好鬼趣致，總之「係人見到都想錫啖嗰隻」（語出自《賭俠大戰拉斯維加斯》化骨龍的對白）。
6.三姑姐、六姑、肥媽，完全唔同類型唔同嘴臉，但一個Madam Lo，已能輕易駕馭，所以當好多年後網民驚訝於她能夠在那段由潮文改拍成的短片中一人分飾三角，講真，碎料啦。這段短片我大大話話翻炒過十次，原因只有一個——欣賞Madam Lo眉梢眼角的細緻演繹，尤其那一句聽落冇嘢實則超有骨的「即係藍領啦」，我甚至忍唔住在Madam Lo面前獻醜，演繹過一次。
7.能夠有幸在Madam Lo面前演繹，是因工作所需——當時做緊一個有關青春的題目，同事B和我都相信青春不只是後生仔女專利，青春可以跟年歲無關，所以好想搵一位不後生但又依然感覺青春的女演員——我們不約而同諗起Madam Lo。
8.那一天，石硤尾JCCAC，好悶熱，身穿粉紅上衣的Madam Lo來到，眼前的她不是三姑姐不是六姑更加不是肥媽，而就是Madam Lo本人，不會好social，但又隱隱然有一份nice。作為旁觀者，看著聽著Madam Lo逐一回答同事B的問題，由成長到求學，由畢業到做秘書，由做秘書到瞞住屋企去in電視台，由瞬間走紅到突然結婚……
9.我看到了一個我不曾經歷過的情境。在那個有夢的年代，一個女仔努力去追逐演戲的夢。要多得Madam Lo爸爸，他啟發了乖女聽歌品味，知道乖女有安穩的秘書工唔做而去做演員，依然支持，因為爸爸本身愛攝影，支持乖女，是基於他自己對藝術的熱愛，而不是有其他目的……但那個有夢的年代已不復返。我始終相信Madam Lo有能力去演繹其他類型角色，問題是搵得佢拍戲的都只是搵佢做阿媽，而且只是做同一種類型同一種嘴臉的阿媽。今時今日香港好單調，單調令人悶，悶令人好唔開心。
10.最後Madam Lo推介了一首她很喜歡的的歌，Frank Sinatra《Young at Heart》：You can go to extremes with impossible schemes. You can laugh when your dreams fall apart at the seams…多謝你，Madam Lo，多謝你帶俾我快樂。
（原文刊於am730）
卡拉屋企....my favourite sitcom!
回覆刪除Me2!!!
刪除