關愛恆久遠，一坐永流傳。

打呢一段時我坐緊巴士。我好nervous。我．坐．咗．喺．關．愛．座。

1.
我自然知道關愛座是為有需要人士而設，但我可以跟你說，這一刻的我就是有需要的人。
我絞緊腸沙。很嚴重那一種。如果你也絞過腸沙你自然明白，絞腸沙期間是多麼想搵個位坐低（嚴格來說應該是找個坐廁、或屎塔，whatever啦），而不是企棟棟。
Why唔去上層？大佬我絞緊腸沙呀你仲叫我做埋啲咁危險的動作？
所以我只能瑟縮在下層。
但機警的我早在坐落關愛座之前，已經好認真地審視了一遍，發現基本上每個位都有人坐緊，就是唯獨關愛座冇人坐，而且架巴士將會上highway（就算我想落車都不能），好一段時間冇客上車……於是（機警審慎的）我同（攪緊長沙的）的我講：別怕，坐吧。
其實我還在猶豫，但突如其來的一下洶湧感覺（亦即便意）令我不得不一屁股坐落去……

2.
Wow，我終於完美地坐在關愛座了。而恐懼，開始在滋長。
唔知點解地我總是覺得有人睥住我。但係咪真係有人睥住我？我不知道，只知道有一種恐懼不期然在心底裡竄出來，尤其當我望見有人用手機對住我時，我更感驚恐——係咪影低我準備進行網絡公審或批鬥諸如此類令我突然紅起來的行動？
我有想過為自己辯護：有緣搭埋同一架巴士的咁多位，唔好意思！我絞緊腸沙就嚟瀨嗰隻，好有需要暫時坐喺呢個關愛座上，我都唔想……
但我突然像《死神來了》系列中預感到死亡來襲的主角，預視到當我作出自辯後會發生的事。
Firstly，有人會咁樣反駁：「你肚屙就咪上車啦！」
Secondly，有另一個人加把嘴：「你坐關愛座之餘仲隨時有瀨屎危機，你有冇諗過其他乘客感受？你唔係人！」
Thirdly，又有另一個人指住我鬧：「你禽獸不如！」
Finally，我還是被道德感嚴重超然的乘客影了相再po在fb。
Unfortunately，我除了被形容為霸住關愛座的不知廉恥之徒，更被控有機會隨時瀨屎罔顧衛生污染車廂散播病毒……
Accordingly，我起身，企在巴士落客度門隔籬，用意志克服紛至杳來的屎意，待巴士一過完highway即在第一個站落車。

3.
今時今日使用公共交通工具，除了分秒必爭，更隨時成為一場道德戰爭。
N年前的思想家劉宗周提出了劃時代觀念：「慎獨」——即使獨處一室，明明周圍冇人監視你，你依然要做一個道德的人。
今時今日的「慎坐」，則完全建基於別人（以及你睇唔到的那班匿在網絡中的群眾）的道德目光，你的道德表現完全基於群眾壓力：你道德，因為你淆底；你淆底，你不得不道德——即使你根本不認同這麼一種高壓式道德。但冇計，為了應付其他人（而其他人也同樣在應付你），我們都因為恐懼而表現道德。道德，是做俾人睇的。
注定使用公共交通工具的我惟有警醒自己：搭巴士前，務必去清大小二便；搭港鐵呢，無論點都唔坐，成個車廂明明鬼影都冇隻都唔坐，總之做足準備讓有需要人士去坐。我要做一個有道德的公共交通工具使用者，Yeah。
（原文刊於am730）