諗番，都覺不可思議。小學某個長假期後，同我玩得埋的男同學都不約而同識得唱一首歌，副歌部分是咁唱的：「龍虎豹好睇，好睇，但係又好鬼貴……」
1.《龍虎豹》是否好睇？人人睇法不同，至少我從未試過動用零用錢去買過嚟睇（亦未試過跟同學夾錢買）——但真正重要的是，在那個沒有internet沒有forum沒有facebook的年代，單憑口耳相傳，竟然可以在短時間內令咁多人識得唱一首歌，而這首歌明明沒有派台，沒有上榜，更加沒有勁歌推介。
2.這是我人生中首次體會改歌詞的趣味及威力——嚴格來說第一首認識的改歌詞金曲，應該是改編自《宇宙大帝》的「神奇大帝穿咗褲窿」，但首歌偏向純潔，不夠鹹，冇咁深刻與震撼。
3.我是否好細個就鹹濕？——係啩。鹹濕就是鹹濕，沒有甚麼類似鹹濕。鹹濕，催生了一顆好奇的心，好奇的心轉化成（搣時阿Sir肯定不認同的）求知欲；每當同學講一啲人人都笑係得我唔明的鹹濕笑話時，就會好嬲自己，嬲自己平日唔用功。
4.例如睇《不文集》。有年秋季大旅行竟然有個男同學夠膽死帶咗本去，仲離譜到跟女同學一齊觀看（令我難以接受是其中一個更是我OK鍾意的，頂）！我自然迫埋去懶熟咁睇埋一份啦……其中一篇寫到一眾Superheroes去曬太陽的，包含了不少英文單字，令女同學們大感疑惑：乜H乜L吖？但又冇理由去問班主任嘛（當時班主任咁啱是教英文的）……豈料那男同學突然化身符號學教授，向疑惑女同學詳細講解H和L的所指，聽到班女同學陰陰咀笑之餘仲大讚男同學學識淵博，Shit！而我，只能坐埋最側邊陪笑。
5.在我成長的年代，很多鹹濕養分都是透過文字攝取；如果你不夠勤力懶去睇字，你的鹹濕會顯得尤其乏味。其中一種鹹濕文字來源，是報紙。在某個特別的版，你不會睇到新聞圖片，只會睇到一些洋妞或東瀛女子的清涼照片，照片上更附有一首押晒韻的詩，我一度疑惑：難道圖中女子都是詩人？你還會睇到一些信箱，信箱解答的盡是當年對我來說很深奧、健教科syllabus不會涵蓋的內容，其中一封我諗我到死嗰日都記得——心急人問：「Why鹹帶中的主角總能做出一些能人能不能的高難度動作？」見多識廣的乜乜大使咁答：「Because當中不少演員都做過馬戲班。」自此我對空中飛人多了一份敬畏。
6.上了中學，好難得地認識了一班志同道合的好友——會借鹹帶我睇的好友。是的，唔知點解地總有一、兩個同學能夠keep住定期提供鹹帶給同學看，但他可不是人人都肯借——通常冇份入這影視會的都是那些品學兼優的同學。回首前塵，我中學年代成績品行欠佳究竟是幸或不幸？
7.假如鹹有天意。在不同成長階段都認識到願意跟我分鹹同味的同學，但就是識唔到番簡強這麼一個人——番簡強，梁栢堅的同學，由小四被班主任編埋坐隔籬位，然後升讀同一間中學，再讀埋同一間U，畢業後即使冇做埋同一行但依然有交往——維繫這段友誼的除了友情，還有對改鹹濕歌詞的熱忱。有關他們幾十年的相知相遇相交（流），一一記在《甜詞》裡。
8.甜，在現代已被用來形容鹹，鹹即是甜即是鹹，唔好問點解，這就是語言的約定俗成發展（有時候出街食嘢拜託侍應叫師傅整鹹啲時，難免懷疑會唔會變成甜啲……）。改鹹 / 甜詞，也是一場語言的轉換，怎樣在最少改動以keep番原本歌詞用字與韻腳的情況下，呈現另一個翻天覆地意思？作狀啲咁講吧：怎樣在有效地鬆動原有文本下，顛覆文本，呈現另一個意思？書中輯錄了大量示範，有些是作者親撰，有些是過去在坊間流傳的。
9.用半晚KO本書後我WhatsApp作者：「羨慕 / 妒忌你有番簡強呢個朋友」，佢回應：「冇佢，我今日未識填詞」——創作，總有一個茫然的起點。驀然回首，鹹的朋友很多，鹹到足以啟發我的知己卻沒一個，這本既鹹又甜的友情之書，給我一種失落的苦澀。
10.回到一開波的「龍虎豹好睇」。那是一個冇乜家長會迫仔女在課餘去讀乜讀物的自由年代，也是廣東歌最強的時代，而被改的咁啱又是真正hit歌《夏日寒風》，細路們有的是閒情，把歌傳揚開去。現在，我們曳曳隨時被主人用籠困住，廣東歌又真的不乏悶歌，把最悶的歌改成最鹹 / 甜的詞，嗒落，依然是悶。而這，又是另一種苦澀。
（原文刊於am730）
沒有留言:
發佈留言