2013年8月30日星期五

浪漫月巴睇舊戲(四十一):永恆經典化骨龍,在心中。





















實在欲罷不能。Sorry,這一次又係寫張家輝的戲,但有充份理由的。

張家輝就是化骨龍就是張家輝

很多睇完《激戰》的都話:化骨龍回來了!
嚴格來說賤輝式搞笑同化骨龍式搞笑,底蘊完全不同,但觀眾眼裡的賤輝浮現出化骨龍味,是因為他們都餓張家輝式搞笑太耐了。而當演員能夠坐擁一個別人長年累月都講得出名字的代表角色,絕對是一份光榮。
化骨龍最初來自《賭俠1999》,跟《化骨龍與千年蟲》嗰個無關,但就像是那年頭張家輝在電影江湖裡的一個朵。
《化骨龍》也被某些(自命品味獨特高人一等的)人標籤為爛片一齣。實在是WTF。《化骨龍》絕對絕對絕對不是一部爛片,我甚至夠膽講,現在好多「大片」都經營唔到當中嗰份細膩。
戲的基本設定極簡單,一個老差骨和一個爛仔,由冤家漸變成互訴心中情的拍檔。冇錯,感覺就像《霹靂先鋒》。
老差骨李竹松是李修賢。跟他過去演繹的CID有點不同,李竹松被設定為嚴重電腦白癡——有場戲交代他send email問乖女Angel幾時同媽咪返香港,我好留心咁睇,這個mail由晚上9點9過啲,足足搞到凌晨12點1,才成功send出,而信的內容不過是「何時回來?」。至於上款,李Sir打咗做「Angle」。這是部1999年電影,當年最矚目社會話題是「千年蟲」,李竹松這角色設定明顯在呼應潮流。但這設定只在戲開初四分一被刻意描寫,之後就冇再提。
化骨龍,原名史伐隆。老竇早逝,自小跟龍媽羅蘭相依為命,龍媽在戲裡的職業是演員。
Well,成齣戲就係睇以上三位的演出。

各有各的方向與目的……
老實,那單殺人案存在感極度薄弱,純粹提供化骨龍千年蟲住埋一齊的原因,順便間唔中製造危機,以及合理地安排最後那場槍戰。部戲好睇,全靠兼具人情的細位。
1.Family Value——千年蟲有老婆又有個女,但老婆嫌他掛住做嘢不解溫柔,帶埋個女移民加拿大,仲成日話要離婚;千年蟲表面有個完整家庭,實則是終日自己一條友,有家等於冇家。化骨龍自細冇老竇,成長在單親家庭,但同龍媽感情好到猶如同撈同煲的老友,家庭不完整,但又充滿家庭溫暖。
2.Father & Son——一個是明明做緊人哋老竇但又冇辦法扮演老竇角色的人,另一個是長年沒有父愛的人,結果竟然進化成為類近父子的關係,化骨龍:「如果有得揀,我寧願揀你做我老竇,起碼有個當差嘅老竇照住自己,唔使成日俾人蝦。」千年蟲:「唔好怨命啦,路係自己行嘅。」這段戲,好睇到爆。
3.Beyond——二人衝破心防全因為一首歌。兩個大男人在酒廊合唱《灰色軌跡》——洗不去痕跡,何妨面對要可惜,各有各的方向與目的——這首歌絕對不是亂揀,歌詞道出了這兩個走在不同人生軌跡、但同樣落泊的男人心聲。這絕對是繼《最後勝利》曾志偉高唱《深愛著你》後,最.好.睇.的.一.場.酒.廊.戲。我個心明明屈住屈住但又忍唔住笑(笑是因為張家輝的獨門震音和單用左手施展的台風),達至一種複雜的情感狀態。
當然,這始終是一部笑片。撇除大部分純屬張氏個人示範的笑位,另有兩個,OK特別,值得細味。
「電影市道搞到咁低落咪你呢啲人囉,接咁多組戲做乜啫?」——臨完場化骨龍對龍媽咁講。現實中,羅蘭憑龍婆一角深入民心,深入到有9成鬼片都有佢份做,而1999年,正值香港電影市道衰到不堪,這句話既暗串又自嘲——單在那一年張家輝個人便有7部戲孭飛。
「本身我都有個女朋友係陀槍師姐嚟嘅,佢以前都好似守過呢個環頭,阿娥姐咋嘛,你有冇聽過呀?但係後來,我加入咗做臥底工作,而忽略咗佢。最後,我哋都分咗手。」——這算是In-joke吧?電影上映前一年,關詠荷憑《陀槍師姐》征服視迷,娥姐便是她劇內角色名字。而現實中,二人曾經短暫分手。
最後來一個情深說話作結。親愛的張家輝,或許你日後不會再刻意搞笑也不會再做化骨龍,但我只想講,喜怒哀樂鹹賤cheap都被你演到去極致了,睇你做戲真的是一種崇高享受。
張家輝,掂呀!(最後呢句請用電影開頭張家輝大叫「化骨龍,掂呀!」的腔調讀出)

2 則留言:

  1. 今天終在九龍塘PageOne找到"搣飛割凳",買了。隨手一揭,見文章「淚乾了,在懷念往事」。
    年青時看奇斯洛夫斯基的"兩生花"後,立志從事電影工作,影響半生。
    運好,曾遇到同樣鍾愛"藍、白、紅"的女人,一起生活四年,抱著對方看"Before Sunrise, Before Sunset"。
    後來她負笈海外,某夜來電說:"我不會回來香港了,巴黎的天空比香港闊"。
    她沒有說謊,也不是比喻。我走了一躺法國,確認巴黎的天空比香港大許多,也同時確認了她不會回來香港。

    回覆刪除
    回覆
    1. 唉……
      這經歷,不妨寫下來。
      一切已失去,不可以再追,但回憶和文字抹不走。

      刪除