每逢聽見有人懶勁咁拋出一句「歷史自有公論」當擋箭牌我就會好忟憎。「公論」個「公」其實指乜？阿公？一個最大權力者？歷史事件是否往往要等一個具備如此份量的人作出評價了，才會成為所謂的「公論」？
先睇以下六點
1987年，川尻善昭改編了菊地秀行《妖獸都市》拍成動畫電影。香港曾經上映過。
這部動畫充滿了色情和暴力。當年還是讀緊初中的我，一直都想睇，直至推出了LD，便聯同隔離屋張太個仔夾份租了隻，偷偷哋睇咗。嘩，簡直是一次嚴重衝擊。張太個仔仲似乎有少少頂唔順。
講真我都唔多頂得順。但那一個表面光鮮華麗實則暗藏邋遢的東京都市描繪，是勁的。
1992年香港把《妖獸都市》拍成真人版電影，導演是麥大傑監製是徐克。又是另一次嚴重衝擊。
1.話就話導演是麥大傑監製是徐克，其實即使你同我講這是徐克作品我都會信。那種故事節奏那種急速剪接拍攝，根本就「好徐克」。或者實際情況是咁吧：真的有個叫麥大傑的人負責做導演，但期間監製又keep住俾意見，俾俾吓，主導咗成部戲。
2.1992年，港產片依然好景。那時候流行笑片古裝片動作片江湖片，唯獨不流行科幻片——其實，自家製作的科幻片由始至終（甚至直到永遠）都不曾在香港流行過盛行過。記憶中睇過最有印象的一部，已經是80年代的《衛斯理傳奇》（至於《原振俠與衛斯理》，則只能算是神怪片）。至於《妖獸都市》，我認為算是科幻片。
3.超，科幻片大晒咩？科幻片不是大晒，而是一旦拍科幻片，就不能倖免地需要有些科幻設定，設定可以微小至濕濕碎碎的物件，也可以大至整個世界觀。《妖獸都市》的確存在了一些不算太勁但在港產片絕無僅有的科幻嘢：一個變成鐘用時間來殺人的妖獸，以及一隻可以同機器結合、幻變成任何機械的女妖獸，咁佢可以變乜呢？——電單車、波子機，甚至是一部可以載人升降自如的，lift。但最離譜還是嗰部妖肉波子機，當玩家成功把波子射進高分位置，嗰部機會即時發出狀甚興奮的叫聲……事隔廿年了，都未能再喺港產電影搵到咁癲的設定。
4.世界觀。不是過去也不是未來，也不是原著的東京，而是電影上映的1992年香港，並且講到明，因為正值「交接」前夕，妖獸特別橫行，為免妖獸影響「交接」，必需加倍提防。負責這艱鉅任務的，就是任重而道遠的「反妖獸特警」（這名字算是成齣戲唯一難頂部分）。
5.妖獸是甚麼？咪妖獸囉，但平日既可用人形姿態作掩飾現身人世（甚至大生意成為大資本家），又可同人類交配，生出既是人也是妖的半人妖，像張學友的角色阿刑便是了。阿刑是反妖獸特警，但被袁和平這個「反妖警」阿頭視為血統不純正，既不委以重任，其後更誤會他是內鬼。
6.最後大戰，真正打得贏Final Boss妖獸「鬼眾道」張耀陽的，其實是佢個妖獸老竇及其妖獸私人助理李嘉欣，而致勝關鍵，是二人變番做妖獸，以妖制妖。「反妖警」（即人類）根本奈佢唔何，只有躲在一旁睇波食花生的份兒。
再睇以下四點
睇完以上6點，係有啲嘢但又未算好特別。不妨睇埋以下4點，就會明白這麼一齣被置放在1992年香港的戲，是擺明有寓意的。
1.妖獸最勁一招是妖閉空間，形成一個妖力結界。Final Boss使出這超必時，戲裡只交代他是在「一幢最高的建築物」，而畫面所見，是中銀。
2.妖獸界盛行一種毒品叫「快樂」。「鬼眾道」老竇好欷歔咁話：這是一個寂寞的都市，希望活在這裡的人不用依靠「快樂」。
3.「鬼眾道」老竇殺入那「一幢最高的建築物」的lift裡救出黎明和學友時遇上妖獸侵襲，面上突然浮現了兩個數目字：6 & 4。當然你可以說這純粹交代部lift咁啱去到呢一層，但點解一定要係呢一層而不可以是其他樓層？
4.呢個都市係金錢嘅奴隸。半人半妖張學友不是內鬼，真正與妖接洽賺大錢的內鬼是XXX（其實睇到中場已經估到）。佢對自己有以下形容：我．對．歷．史．冇．興．趣。
20年後在出賣良知的人，就是這一類人形生物。
沒有留言:
發佈留言