本來我是打算寫篇有關《Before Midnight》的觀影後深情文章，但寫了半篇都唔知寫咗乜，情亦深不到哪裡去，惟有，成篇唔要。
咁既然本文刊出日正值中秋，就寫這佳節吧，唉。
小時候中秋愈夜愈美麗
自小便認為，涉及夜晚的節日分外快樂。因為可以夜瞓。
在我成長的年代，夜瞓是被大人禁止的，只有到大時大節才獲格外開恩——這些大時大節包括年三十晚、中秋節和平安夜，我本人向來比較鍾意中國傳統節日，尤其偏愛中秋，原因是：有得食水晶梨。
我冇考究自己情迷水晶梨的深層原因，總之我可以連食三個就是了（奇在大人又會容許我咁食）。水晶梨以外，還有碌柚、楊桃和月餅——當時沒有奶黃沒有冰皮也沒有尊貴雪糕月餅，有的就是雙黃白蓮容，但當人人都專登揀有蛋黃嗰part食時，我偏愛齋蓮蓉。
中秋，就是食食食同食。月巴從來都是有理由的。
但食鑊甘以外，更重要還是可以落街玩。小時候住在牛頭角上邨，邨旁有一個OK大的公園（這公園還存在嗎？），當大人在賞月，我不是拎住燈籠像發了癲般喪跑，就是在秋風吹拂下，煲蠟。講堅，那時候如果你不（懂/屑）煲蠟，是會被其他細路歧視和看扁的。
煲蠟這回事很虛無。我在蠟燭廠做過暑期工，蠟燭之製造，就是把蠟溶掉再倒進製蠟燭機，待其冷卻成形，而煲蠟，就是把成個過程倒轉來做一次。成個行為，很哲學味。
嗱嗱嗱，香港（疑似）進步了，現在煲蠟是違法的。
情流夜中環遇上CID
隨著年紀增長，度過中秋夜的方式也改變了，不變的是：必定會約埋一班人共同度過。
初中：去隔離屋張太屋企，同佢個仔一齊打紅白機，打到累了，就吃由張太為我們晨早準備定的月餅水晶梨碌柚各種應節食品（所以中秋翌日我通常都會肚痾）。
高中：約埋三五知己躝街睇戲，散場後再躝街。期間必備活動是沿途「掃街」（我希望大家知道「掃街」的真正意思吧）。
大學：跟同學在中大宿舍打邊邊。然後拎齊月餅啤酒，搵笪對住吐露港的空靈之地，各自發表不設實際的人生理想（以及心底裡深愛住哪位女同學）。
出來社會做事的初期：依然會約昔日朋友共度。最記得有一年，收工後飛巴士入去美林邨，跟一班讀書時識落的好友，吹了通頂的水。那時候過中秋，有冇水晶梨食已不是重點。
出嚟社會做事的中期：見朋友機會少了，見同事機會多了。有一年中秋，便同一個極投契的同事由中環半山行去西環（再折返中環）。當行到某個非富則貴人士居所集中地時，突然被幾名CID截停，問我哋喺度做乜……當搞清我們來意兼查埋身份證後，警民雙方竟閒聊起來！我多口問，點解要特登在那處巡邏？其中一個阿Sir苦笑：「唉呢度多有錢佬住吖嘛。」我有時會想，如果今時今日遇上同類型情況，還會咁輕鬆？
我已經好多年冇約朋友過中秋，vice versa。
至於今晚，有理由相信我應該會徹夜匿喺屋度喪打《GTA V》。沒有月餅沒有碌柚也沒有水晶梨（其實本來有兩個，不過我忍唔到口，食咗）。打到某一刻，喵從房裡行出來咬糧，悲從中來的我好想佢陪我合唱一曲《從不喜歡孤單一個》。無奈佢不是彭家麗，唔騷我之餘，更加一臉衰相，好唔識do……
如果你今晚約了朋友共度中秋，盡興吧。快樂時，要快樂；有些快樂，不能復刻，只能回味。
沒有留言:
發佈留言