2013年9月12日星期四

聽日,就係「黑色星期五」。




















令我知道塵世間有「黑色星期五」,全靠《黑色星期五》。這個電影系列我一早睇晒,成為我人生中一件自豪事。
但請注意,「黑色星期五」一切如常,工還是要返,高官還是會(引用唔知邊度嚟的意見)寫網誌。

倍感溫馨,黑色星期五FAQ
我愛Jason,愛到在公司個位安放一隻他的figure趨吉避凶。難得遇上黑色星期五,今天特意分享我本人對Jason的愛與恨和回憶。你對呢個偉大電影系列零認識?為方便大家,我設計了一個FAQ。
Q:首集《黑色星期五》是在哪一年獻世?
A:1980年。Sean S. Cunningham見《月光光心慌慌》瘋狂收得,打算借用人哋成功概念拍一齣差唔多的賺番筆。
Q:Why叫做《黑色星期五》(Friday the 13th)?
A:冇原因。Sean S. Cunningham在進行前期工作時突然像標童般諗到呢個名,即使劇本未寫完,已經搶先在電影雜誌賣廣告——就像生人霸死地,等人唔使打呢個戲名主意。
Q:Jason是否在第一集就開始殺人?
A:NoNo,第一集負責濫殺無辜的是另有其人,Jason只出現在別人口述中,一個死於意外的可憐兒童。第一集太收得,成本50萬,單計本土已收3,000幾萬(當然係美金),電影公司立即嗌開拍續集,原本被設定成受害者的Jason被迫成為劊子手。首集編劇Victor Miller極度唔妥這安排。
Q:究竟《黑色星期五》合共拍咗幾多集?
A:12,嚴格來說是11.5,因為《Freddy vs. Jason》有《猛鬼街》嗰隻Freddy領銜主演。

逐集簡評,方便你揀嚟睇
講堅,《黑色星期五》只是抄考《月光光心慌慌》的二、三流仿作,但愛從來都是盲目的,自從初中時睇了第三集後我便深深愛上沉默的積遜(佢真係一句嘢都冇講過)。如果你想認識他而又不想中伏,可參考以下12集簡評。
《Friday the 13th》(1980):基本上就是一齣發生在郊外(但渣啲)的《月光光心慌慌》,也承襲了很多由《月光光心慌慌》定下的Slasher Film規條,例:誰一動色心想搞嘢就死,最後逃過一劫的必然是貞潔女生。必睇。
《Friday the 13th Part 2》(1981):Jason首度出場(殺人)!我認為最緊湊的一集,翻炒得最密。
《Friday the 13th Part III》(1982):歷史時刻,Jason首度戴上作為身份標記的曲棍球面罩。暴力度提升。
《Friday the 13th: The Final Chapter》(1984):設計了一個情迷荷里活Sci-fi片的細路Tommy智鬥Jason。
《Friday the 13th: A New Beginning》(1985):上集的Tommy成長了,但逃離唔到積遜的夢魘,被關進精神病康復所……注意,今集Jason真身沒有出場,真兇只是個模仿犯。無奈成齣戲頗懨悶。
《Friday the 13th Part VI: Jason Lives》(1986):Tommy同Jason作最後對決。既然睇開咯,唔爭在睇埋。
《Friday the 13th Part VII: The New Blood》(1988):重點是,超能力少女 vs. Jason。唔……OK啦。
《Friday the 13th Part VIII: Jason Takes Manhattan》(1989):最呃人的一集。三分二劇情發生在一架爛船上,最後三分一才移師曼克頓,budget所限,曼克頓其實是溫哥華。建議忽視,但如果睇開咯,咪睇埋囉。
《Jason Goes to Hell: The Final Friday》(1993):原創人Sean S. Cunningham回歸掌舵,但Manhattan嗰集實在太差,即使呢集其實OK好睇,都挽救不了。對Slasher粉絲來說卻是驚喜:最後一幕,Freddy隻鬼手抓走咗Jason個面罩!預告兩大殺人藝術家不日將同場較技。
《Jason X》(2002):九年後,說好了的Freddy vs. Jason冇聲氣,Jason被放逐未來太空繼續殺。幾好笑的一集,當日睇時計埋我全場得五個人,而其中一個是洋漢,所有笑聲都是由我和他發出,散場後我倆仲點咗吓頭,惺惺相惜。
《Freddy vs. Jason》(2003):于仁泰執導,各方面都好平穩,也是我經常翻炒的一集。
《Friday the 13th》(2009):推倒重來。主要結合頭三集精粹,再配合新世代手法,Jason連行步路都敏捷咗。
由始至終Jason活躍地都是郊外,城市外圍。你問我過往每逢去郊野公園BBQ或wild camp,會唔會因太投入而驚遇上Jason類型人物?驚驚哋啦。但未來一代不用再面對同類恐懼了——只要在郊野公園起樓不再是禁忌。
要驚,不如驚第時連山長水遠的大澳門啲樓都買唔起仲實際。

沒有留言:

發佈留言