我開始尊敬高官了——當我知道運輸及房屋局副局長邱誠武為了政改，親身創作了「一人一票選特首，普選可以開步走」、「一票難得，通過就得」等slogan後。任重而道遠又忙碌的高官，竟然要做埋呢啲粗重工夫。
我有好幾位同學都加入了政府，擔任唔知乜O。多年冇聯絡了，不知道他們使唔使幫手諗slogan。作為昔日同窗，一於在冇人叫我去做的情況下，自行構思了一堆宣傳政改的口號，不敢說好勁，但至少從多個角度切入，顧及不同階層和對象心理（slogan一向都有指向性），並無私地在這裡公開。如果啱用，攞去用！（又或可邀請我加入政府頂替白宮發言人，我承諾，在office hour絕不玩facebook。）
1.為TBB觀眾而設
TBB再悶，還是有大把人會睇，以下，特別為TBB觀眾而設。
「今晚睇李？政改睇你！」、「普選難分假與真，華麗通過齊轉身！」——只怕節目質素拖累了宣傳效果。唔緊要，我們都知現在最好的節目是（23年前的）《大時代》，以下幾句，便改自劇中金句，《大時代》迷一定識：
「咁多人撐唔見你撐！」
「今日通唔過，唔要人工；聽日通唔過，唔要人工；做得好，你至俾人工我！」（但高官冇方進新咁蠢，呢句，用唔到。）
「人善人選爺不選，人惡人怕爺不怕！」（句中的『爺』指乜？你不可能不知道吧。）
2.針對ATV觀眾
ATV再冇嘢睇，還是有一小撮人會睇。作為一個有承擔做實事的政府，不能忽略他們。
「我們牌照被吊銷，政改之心繼續燒。」
「亞視很渺小小小，政改真奇妙妙妙。」
「岩布仙尼ATV，一人一票好啱Key！」
「否決政改太無情！請繼續收睇歲月留聲～」（這一句既宣傳政改亦宣傳埋亞視，相得益彰，兼可釋出政府善意。）
3.忍唔住笑
高官最大問題，往往俾人一種高高在上的感覺（即使係事實）。那麼，不妨幽自己一默，笑吓自己，同市民拉近距離。
「不怕馬路如虎口，我哋出手又出口。」（哈！）
「官員落區不落車，鬼叫俾人圍住咩。」（哈哈！）
「落區不是開玩笑，但有時真係忍唔住笑……」（哈哈哈哈哈哈！）
4.王母蟠桃版
你們品嘗過「王母蟠桃」嗎？這種聲稱用上「三千年開花，三千年結子」的仙果，堪稱人間美食，那句「此果只應天上有，人間哪得幾回嘗？」更是不少人的集體回憶，所以我忍唔住借用了：「普選只應天上有，人間哪得幾回嘗？」我甚至認為政府大可以同「王母蟠桃」來個crossover，別注版包裝盒上一於寫埋：「831框架，601篩選。」
5.向泛民釋出善意
講到尾，政改通過不通過，根本同我們無關，最有關的是泛民議員。我不厭其煩作了兩句只for泛民議員的slogan。一長一短，可視乎場合斟酌使用——短verson：「有得入閘，仲唔落搭？」；長version：「通過政改可入閘，泛民友好快落搭！」
6.Finally，靠嚇
自古以來，大部分政權靠的是恩威並施，一啖砂糖七啖屎。當上述slogan都不管用時，靠嚇啦。
「你不愛梁特？但梁特會找上你！」（但就算通過了政改，不排除梁特依然極有可能以所謂一人一票情況下連任……）
當然，作為市民，面對高官向你派宣傳單落嘴頭宣傳時，你大可用一句俚語回應。邊句？自己諗吧，難唔到你嘅。
（原文刊於am730）
沒有留言:
發佈留言