人善人欺水不欺，人惡人怕水不怕！

有啲劇，勁到每次重播你都忍唔住翻炒；有啲劇，勁到你睇過一次後，餘生就不想再睇多半秒，以免自己再一次陷落當中的生死愛慾恩怨情仇。對我來說，《大時代》屬後者。

不忍再睇方進新唔收錢摺報紙
我當然明白，睇住「大奇蹟日」方展博如何成為大贏家而丁蟹冚家輸到逐隻跳樓，是絕對大快人心，問題是，我必先再一次目睹丁蟹如何打傻方進新、方進新如何努力地去摺報紙（後注定被打死）、玲姐如何含辛茹苦湊大方氏一家再睇住佢哋慘被丁家害死搞到自己精神錯亂不得好死……而天才方展博因為曾目睹老竇被打死以致一度放棄人生瞓足好多集，最後才覺醒報復……你要我再一次承受以上慘烈劇情所掀動的痛苦？太痛苦了吧。
韋家輝其實在1989年已經令我經歷了一遍痛苦歷程，《義不容情》。溫兆倫的丁有康為了名利，奸到無邊無際，而黃日華的丁有健為了報仇，結果犧牲了自己的大好家庭承受孤獨一生……
我最難忘是頭五集，藍潔瑛的梅芬芳如何被「合法地」處死，之後蘇杏璇的雲姨如何艱辛地湊大幾個根本同佢冇血緣關係的細路，但最後又是不得好死。雲姨和玲姐，根本是同一個人，同樣承受了超越一般人所能承受的痛苦。
夠了。我決定永不重看《義不容情》和《大時代》。韋家輝，你好嘢。

少年不識蟹滋味
丁有康和丁蟹無論點睇都是超級奸角。
分別是：丁有康大概是知道自己所做的都是天地不容的奸事，但冇辦法，為了名利為了自己，明知奸都照做。丁有康的心理構造其實跟大部分電視劇著名（或不著名）奸角差唔多，只是丁有康實在奸得太出類拔萃（而溫兆倫又得天獨厚地演繹到嗰份出類拔萃的奸），於是，成為了經典。
丁蟹，根本從不認為自己做的是天地不容，反而是天經地義——只要合乎他本人的道德邏輯。任何錯事離譜事只要經過丁蟹的道德邏輯過濾，統統可被演繹成對的事合理的事。像第一集，他知道丁孝蟹偷人嘢食，本來諗住摑佢，孝蟹便說自己無非想偷嘢俾細佬食，丁蟹轉念之間，便把偷嘢食這件事正當化合理化了。
但《大時代》首播時我仲係個中六學生，累積了一點知識，但對塵世間人類真實運作根本唔多清楚。丁蟹的言行舉止心理構造，對我和同學來說，只是一個個小息時的笑話（最好笑是丁蟹上庭自辯的一段），根本不知道丁蟹邏輯是多麼的強橫。
長大了，而今識盡蟹滋味，甚至發現只要把丁蟹金句改動少少，便可以用來完美解釋、應付、合理化塵世間好多事。
1.陳咩咩做金像獎司儀的獨特方式受盡非議，佢回應：我有我做，你有你噏，我就做咗，你話得就得，唔得就唔得，但我enjoy。這種懶理塵世目光只管自己enjoy的態度，是OK的，但其實同啲凡夫俗子使乜講咁多，一句「我講得窒，但係冇做錯。」便可以了！——原句是「我打死人，但係冇做錯」。
2.西港島線站站離奇滲水。高層解畫，車站位處地底數十米下，有少量地下水滲入屬普遍現象（咁其他冇滲水的站咪好唔尋常？），但佢亦有就此普遍現象向乘客致歉。太正路了，建議不妨加多句：「呢件事嘅重點唔係個站有冇滲水，而係港鐵回頭金不換。」——原句是「呢件事嘅重點唔係我有冇殺人，而喺浪子回頭金不換」。
3.力撐「唔食飯冇糧出都要水炮車」的人，應該整一句更理直氣壯的slogan：「人善人欺水（炮車）不欺，人惡人怕水（炮車）不怕。」——聰明的你應該知道原句是「人善人欺天不欺，人惡人怕天不怕」吧。
丁有康之大鑊，令你咬牙切齒；丁蟹之大鑊，令你吹佢唔漲，而偏偏丁蟹仲一定要迫你去接受他本人單方面認可的善。
如果我（不知幸或不幸地）在街頭撞正宣傳政改方案「一定要得」的高官，我立即想到的只會是陳萬賢某句金句。
你哋自己估係邊句啦。
（原文刊於am730）