《狂野時速7》上映第一天我便立即衝入場睇。我不能忍受自己第二日先睇。
好想知道結局，但又唔想咁快散場。當大銀幕打出「For Paul」，全場拍掌。
散場後我思潮起伏。離開戲院後我繼續思潮起伏——甚至當我搭完通宵巴返到屋企去完廁所沖埋涼，依然思潮起伏。
那麼就讓思潮隨著狂野的時速瘋狂起伏吧！於是決定在那個深夜臨時為自己搞一次「狂野時速放題」——由2001年的第一集開始翻炒，炒到2013年的第六集……
返本歸初，我第一齣看的《狂野時速》其實是2003年的續集。實不相瞞，吸引我去睇的完全是裡裡外外前前後後左左右右無不充滿火辣和激情的Eva Mendes。至於男主角Paul Walker，我其實冇乜感覺；而對於第二集缺席的Vin Diesel（佢去咗拍《3X反恐暴族》）更稱得上OK憎，憎佢懶型憎佢懶大隻（但肌肉又擺明不太結實），所以第一集上映時，完全冇諗過入場。
問心，即使有Eva Mendes，第二集的確麻麻。點知第三集，仲衰——故事完全偏離主線劇情，感覺似外傳多一點，最大鑊是主角換上了一個既唔靚仔又不大隻的鬼仔。我甚至講唔出這鬼仔的名字。
當我以為這系列終會淪為那些direct to video的呃fans死唔斷氣貨色，2009年的第四集竟然勁好睇，好睇到我立即找回第一集了解番Paul Walker與Vin Diesel的恩怨情仇。原來這系列最好睇的除了飛得愈來愈癲的車，由始至終都是這兩個男人經由速度迸發的情與義。
如果第四集是好睇，第五集就是勁勁勁勁勁勁勁勁勁勁好睇！Justin Lin第三次執導，加入了（每一次出場都好大汗的）The Rock（我知人哋係叫Dwayne Johnson，但我改唔到口），將單純飛車戲蛻變成結合飛車的action movie——最後一場Paul Walker X Vin Diesel飛車奪夾萬（蛻變自米高卑《Bad Boys II》的一場橋上飛車），我夠膽講，絕對是飛車戲新經典。
而更重要是，Vin Diesel那team法外之徒除了走在一起食大茶飯，更儼如一個family，沒有先天血緣卻有後天感情補足，作為觀眾的我也不經不覺對這家庭累積了感情，所以當第六集某名家庭成員突然狀烈犧牲時我真的接受唔到，而當第六集上映後唔夠半年Paul Walker竟然在現實中死於交通意外時，我更加憤怒到狂問個天，而個天沉默不語。
兩年過去，終於等到第七集。
1.將成個系列起死回生的Justin Lin不再拍了，改由James Wan執導。James Wan是誰？《Saw》第一集、《The Conjuring》、《Insidious》導演。拍慣恐怖片的他，拍動作飛車一樣耍家，同時引入了恐怖片必備的突如其來危機感——今集的獨行奸角Jason Statham，往往在Vin Diesel等人（和你及我）估唔到的情況下現身，恍如死神。James Wan，你好嘢。
2.新加入的打仔奸角Jason Statham，稱職。佢同The Rock的那一場office困獸鬥很OK，反而同Vin Diesel停車場對打時可能為遷就對方，明顯打得OK慢，不夠痛快。
3.同樣是新加入的Kurt Russell，正到爆。又同樣是新加入的Nathalie Emmanuel，正到核爆。
4.飛車場面是繼續誇張的了（但我睇得亢奮喎）。尤其鍾意最後一場大戰，戰場被拉返去Vin Diesel他們最熟悉的街頭。幾條戰線同時進行，而又有條不紊，各有各的危機感；最後The Rock加入連成一線，亢奮！
5.最後大戰前夕，Vin Diesel等人好型咁企在山上遙望山下的都市，如果冇睇錯，這裡正正是當年第一集交代Paul Walker出場的場景。我當堂起晒雞皮。一切由這裡開始，也在這裡終結。
6.一個當初我冇預料到會愛上的電影系列，一班我從來冇諗過會喜歡的演員，如今竟然入血入心。
7.當然最念茲在茲的始終是怎樣交代Paul Walker去留。只能說，現在的處理是最好的處理，但無論點，我依然接受唔到他已經永遠地離我而去。於是我又再問天：點解無端白事死的是Paul Walker，而不是那些keep住剝削、禍害其他生命的人形生物？個天沉默不語。那一個曾經追趕生命的速度卻早已煙消雲散。
（原文刊於am730）
沒有留言:
發佈留言