唔同大陸合拍，邊有出路啊？——創造力量同幻想會嚇你一跳的鍾樹根議員，兜巴摑醒了長期發電影夢的我。
合拍為體，Hollywood為用
自小，便有志投身電影行業，也拍過獨立短片（即而家所謂的甚麼微電影）。
原來一直用錯了方法。當我以為拍純香港題材就代表正確時，原來只是我傻咗。於是，我決定採用「合拍為體，Hollywood為用」的方法論，苦心孤詣寫了以下一堆電影故事，一心強攻大陸市場。呢鋪仲唔殺出血路？掂吖。
《華爾街之雲》
傳記片。主角就是成功讓公司在美國上市的中國首富馬雲。故事集中在馬雲的言行——其實主要是他一系列發人深省繞樑三日的金句，而由於金句實在太多，電影將以對白——呀唔係，係獨白為主，務求將所有金句一嘢交代晒，讓觀眾睇完齣戲就收到讀了三百年MBA的奇幻效果！唯一難度是選角。基於主角本人樣貌太獨特，現實中難以搵一個似模似樣的演員，惟有邀請主角本人親自演繹。但據聞他本人最近有點頭痕，未必答允。唉。
《狂野（自由）行》
荷里活那齣《狂野行》，說一個女子單拖孭住backpack出走荒野挽救自己已被腐蝕的心……正路勵志片格局——太淺薄了。我呢齣《狂野（自由）行》，描述一大堆自由行湧來香港消費，但消費只是表象只是表面行為，他們實際在做的是無私地挽救香港經濟。係咪勵志和偉大十萬倍先？就連電影宣傳語句我都諗埋：「如果沒有我們，香港經濟實質上是不能運作。」最後一場戲，一班自私的人走出來阻住別人拯救香港，好彩遇上明白事理的慈母請食胡椒噴霧放題，商場更霎時間呈現飄雪嘉年華的夢幻視覺效果，誓必成為電影史上的名場面。
《狂喼時速》
故事同《狂野（自由）行》差不多，分別是，《狂喼時速》是飛車片。當荷里活嗰個《狂野時速》系列頂籠只能拍十幾架車在片，我呢齣《狂喼時速》，則能一次過呈現千萬個喼——自由行的戰車，怎樣在上水沙田等地風馳電掣，場面更浩翰！但我不滿足於這效果，決定把片喼場面伸延至過去你諗都冇諗過的場景，例如，那個旅發局主席的屋企吧。我估，無私的他，開心都嚟唔切，必定肯借出豪宅拍攝。
《有中國特色的變形金剛》
好多人話《變形金剛4》好唔掂。冇錯，真係好唔掂。主要原因，米高卑根本摸不透變形在中國的精髓，而單方面以為由鰂魚涌後山瞬間就能飛到重慶就代表了中港今時今日的密不可分。而我呢齣，簡單而俐落，重點特技鏡頭有兩個：1.馬可以瞬間變成鹿又可以立即變做馬。咁佢的真實身分究竟係馬定鹿？唔重要，不真實摸不透唔清唔楚才符合國情；2.超級高官可以變成超級貪官再變埋做超級監躉，問你死未。
《我們都是這樣食大的》
用12年拍一個男仔成長好巴閉嗎？那個男仔面對的最嚴重問題，不過是阿媽多次遇人不淑，以及俾女飛，但佢依然肥肥白白，太健康了吧。《我們都是這樣食大的》則描寫一個中國男孩如何長年累月食假奶粉地溝油以及各種千奇百趣假食品但依然無病無痛快高長大。這才是真正艱鉅的成長囉。
《高官的五十道色戒》
格雷，我呸。好有錢咩？點都及不上高官吧。當格雷要匿埋喺佢嗰間Red Room才可以解開色戒時，出類拔萃的高官，能夠把任何地方也當成Red Room之餘，更鍾意約埋三五知己開波，開波前更喜歡影大合照立此存照。比起私私縮縮的格雷，高官明顯奔放得多。所以在我的構思裡，這齣戲必然充斥大量明刀明槍的衝擊性畫面，務求令觀眾唞不過氣來。而作為一個出色電影人，必需深謀遠慮，我已經諗定下一步了——如果呢部收得，將開拍續集《高官的五十個戶口》，畢竟咱們不少高官（及佢啲仔女親戚）的（海外）戶口之多，向來馳名於世。
但我最想拍的是以下一部，片名都諗好了：《令十三億人震驚的事實》。
無奈這麼一部史詩式電影，暫時只得片名。我承認，我諗唔到有甚麼是會令十三億人震驚的。
就算震驚到搵齊昕做女主角，頂籠，也只能令香港人震驚——但香港得嗰幾百萬人，同埋啲人而家都唔睇電視、電影，只係睇韓劇……邊有出路啊？
（原文刊於am730，2015年2月11日）
有笑點 我鍾意
回覆刪除