夜半無人私語時，你以為好有情調，其實很思覺失調。
每一個晚上，與蟯蟲對話
如果我們都有另一種「嘢」寄生於體內，那麼，每逢夜半無人，就可以同呢隻明明屬於自己身體一部分但又擁有意志的「嘢」，傾偈。感覺既不孤單也不失調。
最初啟發我有以上念頭的是小學健教科。呢科教曉了我，塵世間原來有種生物，寄生蟲。一般情況下你不會見到佢哋，但佢哋又有可能長時間陪住你。但我們一班同學都好怕寄生蟲，畢竟生得蟲，即代表你好dirty，而且佢哋沒有優美外形——即使你明明見佢哋唔到。
蟯蟲除外。生鬼的蟯蟲習慣趁主人瞓著時，靜靜地從主人肛門（俗稱屎忽窿）爬出來產卵——我立即諗（埋一邊）：如果我完美地詐瞓並成功呃到隻蟯蟲爬出來，咁我咪可以見到佢真身並say聲hi？
我沒有將這麼一個劃時代想法跟當時的老師及同學分享，我怕自己變成哥白尼，被保守的人群聲討。好多年後，以上想法依然揮之不去，於是在一篇私小說寫了出來：孤獨的主角接受不了蟯蟲擅自住喺佢體內又擅自晚晚當其肛門是隨意門，但他實在太寂寞，寂寞得每一個晚上只能跟這條（經由自己孤獨的屎忽窿爬出來的）蟯蟲對話，排遣寂寞……
一直認為這構思very卡夫卡，甚至考慮他朝有機會發表時筆名索性叫做：卡夫巴。
直至看了《寄生獸》漫畫，才知道自己當年的構思太dirty（畢竟成日都屎忽窿屎忽窿），岩明均就唔同，借「寄生」說了一個充滿警世意味的瘋狂人吃人寓言。「我在書上查過關於『惡魔』的資料，我覺得最接近惡魔的生物還是人類。」寄生在泉新一手裡的米奇說。
各類寄生者的好與壞，FYR
科技日新月異（呢句好廢），發展又一日千里（呢句仲廢），既然連教你行後巷抄捷徑的app也可以被聰明地設計出來，難保第時真的有寄生服務提供，讓你與一個三唔識七的生命共生。如果失驚無神多樣嘢寄生在我手裡，情況會係點？我既疑惑又興奮。以下是我的一些大膽想像，以供參考。
「寄生文」
好處：重視親密接觸。
壞處：經常要求親密接觸。
「寄生亞視股東」
好處：唔使出糧，依然有班員工貼錢返工。
壞處：經常帶住良心做人，令我倍感壓力。
「寄生董」
好處：感受成為香港第一任特首的滋味。
壞處：感受成為香港第一個落台特首（然後成日用腦）的滋味。
「寄生漿」
好處：經常叫我加油，很勵志。
壞處：經常向我大叫，很吵耳。
「寄生光」
好處：開會時可以瞓、勁瞓、怒瞓，清醒時就剪指甲，總之做盡各種本應留番喺屋企做的事。當正常人成日呻要帶公司嘢返屋企做，佢就keep住帶屋企嘢去議事廳做。
壞處：返到屋企唔知做乜好，於是又瞓。唉。
「寄生689」
好處：不敢想像。
壞處：不敢想像。
「寄生雲」
好處：中國首富。即使剛跌出首富寶座，但作為第二富或第三富，都肯定比你和我富。
壞處：的確有點囉唆，無時無刻向我發表各類人生金句、營商之道，以及顯示我不成熟的四大特徴等等……當我不耐煩時，佢話：看懂了，等於讀了三年MBA！我問：是蘇文大學頒授的MBA嗎？「寄生雲」回應：你用25塊錢就想買一個勞力士手表，這是不可能的！
以上各類寄生者都太具爭議性，相比下，「寄生發」似乎是最正的選擇——
好處：深受萬千市民愛戴，受歡迎程度比那個現任特首高出N倍（其實要比那個現任特首受歡迎，有幾難？）。
壞處：太受愛載，以致同佢出親街行親山就被捕獲；而佢又來者不拒，每當被捕獲時仲連隨問人攞手機影合照……仲有一樣壞處，佢不介意被封殺，「咪搵少啲囉」，完全背道而馳好唔識撈——畢竟塵世間最識撈的生物，就是人啊人。
好想更識撈的我，還是幻化成一團脂肪，寄生在有錢佬身上算了。
（原文刊於am730）
沒有留言:
發佈留言