剛剛過去的星期日，中午。在上一篇「浪漫月巴睇女星．林志美」出現過的友人H突然WhatsApp我：「下次『睇女星』寫吳君如啦笨。」
1.我好憎友人H成日擅自俾「睇女星」的人選我，但我更憎的是自己——再一次採用了友人H提供的人選。
2.同我相識多年的佢失驚無神叫我寫吳君如，是因為佢挑通眼眉，估到那一刻的我應該睇緊電視，睇緊TBB播映的《朱麗葉與梁山伯》。
3.2000年入場看《朱麗葉與梁山伯》的景象，永世難忘。成間戲院連埋帶位哥哥，得十個人。電影的哀愁在空蕩蕩的戲院裡迴盪，久久不散。散場，九個本來坐得好開的人先後離場，每一個都冇乜表情。Yes，每一個都是單拖來捧場——唔計我，其他八個人究竟是本身鍾意單拖睇戲還是本來想約人但冇人肯落搭？我不知道。
4.我只知道那是香港電影最霉的時期（偏偏當時又未有創造力量同幻想會嚇你一跳的鍾樹根博士提出挽救電影業的劃時代方案），開到戲喎，拍啦；拍完咯喎，上啦；冇人睇喎，預咗啦……總之快啲出埋VCD咁就功德圓滿嘞。奇怪是，那是我入場睇得最多香港電影的時候，當人人係唔係都話那時期香港電影是垃圾，我偏偏佩服電影人的勇敢——市況咁惡劣都拍。
5.偏偏在如此惡劣市況下，才容納到那些在市道興旺歌舞昇平時不容許拍（或冇人會咁得閒諗到）的奇怪題材和故事，像《朱麗葉與梁山伯》。在偏遠兼仲未有西鐵直達的元朗，一個冇運行蠱惑仔與一個因乳癌而冇咗半邊胸的酒樓知客，由相遇到開始命定對方就是自己生存下去的理由；由對生命死心乜都冇所謂到開始找到有所謂的入口——成套戲冇動作場面冇男女激情更加冇靚人靚景，有的，只是吳鎮宇的無奈和吳君如的愁容。
6.但我過去睇慣睇熟的吳君如，明明是：A.醜，例子太多，不贅了；B.唔知醜，像《專釣大鱷》的倀雞英；C.唔知醜之餘仲要恃醜行兇，像《最佳損友》的墮Lin娜（愛佢的男人需要好勇敢）。有一段時期的吳君如，包攬了大量醜角，目的，不外乎是在有比較情況下突出真正女主角的靚，以及令大家笑。她用她的醜，令大家快樂——把別人的快樂建築在自己的醜陋之上。
7.曾幾何時的吳君如在sell醜，《朱麗葉與梁山伯》卻要她展示愁。醜是外在，一看即明；愁是內在，一種看不見的情緒——當今時今日好多姐仔以為齋做個愁眉苦臉就代表恰如其分展示了愁，真正的愁，應該是就算明明笑緊都感受得到。我不認識任何演戲理論，而只知道一點：我是否如實感受到演員試圖傳遞給觀眾的情緒。看《朱麗葉與梁山伯》的時候，我真的感受到Judy在沒有了半邊胸下，對自己這種缺失的耿耿於懷。吳君如真的向我傳遞了Judy的核心情 / 愁緒。我看到了一個（杜撰的）普通人在命運下的卑微。
8.但這不是吳君如首次對卑微的演繹。N年前，她和周星馳的《望夫成龍》，我在不知情下租了LD，一心以為是延續TBB《鬥氣一族》的冤家碰頭式笑片，點知，竟然是（完全唔好笑的）愛情片：一對本來住在城市邊陲的夫妻，闖進城市，老公愈撈愈掂扶搖直上兼受靚女垂青，老婆呢，不惜一切只為了成全老公……頂，我竟然睇到眼濕濕，眼濕濕是因為女方由始至終地卑微，而她又冇乜所謂，愈冇所謂，就愈是甘於卑微。我一直認為周星馳熒幕上最好的女partner應該是吳君如。像《千王之王2000》，他們演一對老夫老妻，戲份絕對唔多（畢竟周星馳提供的檔期極度有限），但已經做到一種可愛而日常的老夫老妻感覺。而這個時期的吳君如，其實已經不用再被刻意醜化——至少在外貌上。
9.在最初，人人都爭住去做靚女，唯獨吳君如不介意扮醜，而且一係唔做一做就要做到最最最最醜，醜到一個叫人永世難忘的境地（例如墮Lin娜，我諗我到人生走到盡頭斷氣前一刻都會記得）；而當那班曾幾何時的靚女因年歲而不再襟睇時，從來不賣靚樣的吳君如反而不受影響，更奇妙是在不少人眼中更變得愈來愈順眼——甚至有了原來君如都幾靚吖的感覺。又或是：吳君如根本從來都唔醜，只是冇其他人咁靚而已囉。
10.最後，我要承認，我冇睇過任何一齣《金雞》，原因不便透露……但我會睇《12金鴨》，一來想睇姜皓文，二來也想睇如實地演男人的吳君如。但我最渴望睇的吳君如其實是：不用扮鬼扮馬扮醜扮男（等等外在嘢）便已經足以令我永世難忘的演繹，Yes，就像《朱麗葉與梁山伯》的Judy。
（原文刊於am730）
沒有留言:
發佈留言