情若無花不結果， 送埋紮花又如何？

情人節前夕，我思緒紊亂。
紊亂不是因為煩惱當日有甚麼活動，而是情人節本身已經令我好煩惱。

開場：一個好玄的夢
多年來我都發著一個夢：我同一個暗戀N年的女生在情人節約會，約會地方不是名貴餐廳或馳名拍拖勝地（香港還有這種地方嗎？），每一次夢中見，她都是帶我到 大嶼山一個郊野公園，但去到嘞，又不是BBQ燒腸腸，她只是一句：「這裡體現了你的價值。」嘩好玄呀。咁多年來我都解不開這個夢。

從工 / 寫作的觀點看
世上有些工作的確可以同情人節無關。
例如我做過暑期工的7仔吧。7仔不會在那一天特別將domdom和叮叮食物pack埋一齊，搞一個「情人節套餐」掠水吧（真人真事，以前每當有客人購買 domdom，總會同時買埋大堆薯片蝦條汽水糯米雞，令我誤以為他正在準備大食會），收銀時也不用懶熱情地向客人講聲「Happy Valentine's Day」……
但我份工需要。無論我做的是飲食版抑或娛樂版，都需要諗一些應節題目：飲食版，情人節晚餐攻略；娛樂版，便安排狗仔隊去跟那些結了婚或拍緊拖的藝人，如果一齊度過但全程冇嘢講，咪話佢哋情人節冷戰或吵大鑊囉；如果影到是但一個行街，仲簡單，各自搵食囉。
但當連負責寫的嗰條友（即係我）根本都不重視這節日，而還要夾硬交出感情來，是很痛苦的。就像寫情人節晚餐攻略，引言必定是「又到一年一度情人節，愛錫女 友的你又要花心思安排連串驚喜，不能或缺的自然是一頓超浪漫晚餐……」我想寫的其實是：「X，又到情人節。你明知出去食是必然被掠水的，但鬼叫條女鍾意 咩，而且仲要買定花喎，好讓佢『未食先驕』……」當然，這樣寫是博炒。

從餐飲的觀點看
情人節餐這玩意從來只會在那些名貴及懶名貴餐廳出現，麻甩佬當晚自然會避去此類（欺詐）場所。又是真人真事，有年情人節我識趣地去茶餐廳搵食，但茶餐廳竟 然不識趣地好學唔學搞埋那些情人節套餐（妖，明明就係平日嗰個鐵板扒餐！）。我好憤怒，憤怒在店方自行將作為茶餐廳的尊嚴出賣。

從語言的觀點看
媾女的必需過程，是將你的愛意給對方知道，可以用口講，也可以寫出來。所動用的，都是語言。兩種方法我都用過，即使失敗，但錯不在語言，而在於我個樣。
我憂慮的是下一代，媾女時隨時咁講：
「瑪莉，妳美得很到位，妳的美是世界的亮點——妳對我就是重．中．之．重！如果妳落實跟我一起，我定必將我的愛加大力 度，在各方面做多做大做強，讓妳得到愛的支援，讓世伯伯母各展所長，讓我們這一家得以發揮，逐步進入社會生活的方方面面……」
我不想我的下一代咁樣示愛，所以我一定不會有下一代。

最後，解夢時刻……
因為奮強，我終於解通了那個纏繞我多年的夢！很環保的他說，發展大嶼山，能將這地方由醜小鴨變成白天鵝。
女生在夢中的那句話，原來在暗示我Ugly和Useless，想追佢？唔該發展吓啦——把一個本來自然的地方發展成不自然（但奇在環境又會比而家好咗億 倍）的地方——換言之，我需要整容。你的樣子如何，你的媾女力量也必如何。但我諗，用而家呢個衰様得來的愛，才是真正無添加的愛吧。
我愛大嶼山天然的花，不愛情人節那些包到懶靚（兼賣得好貴）的花。
不過愛錫女友而要花心思安排連串驚喜的你，都係照送番紮包到懶靚（兼賣得好貴）的花囉，費事自招煩惱囉，唉。
（原文刊於am730）