2014年2月14日星期五

浪漫月巴睇舊戲(六十一):97後,沒理由相戀可以沒有暗湧
















曾幾何時我同佢出親街,活動都是睇戲。我可以肯定,我們任何一方都不是甚麼影癡,睇的戲也不是甚麼歐西名導高深電影,散場後也絕對不會作出知性觀影交流。

或許我不應該揀這齣戲來寫

情侶是否適合去睇《愈快樂愈墮落》?我不知道。我只知道,這是我同佢最後一齣一齊入場排排坐睇的電影。
然後,散咗,幾年後佢結了婚,有埋小朋友。
然後,十幾年後,月巴而又怕凍的我匿埋被竇翻炒了一次《愈快樂愈墮落》——原來,乜都唔記得晒。
再然後,我用厚厚的被包實自己,在市區5度新界再低幾度的嚴峻情況下開始寫——望住個Mon好耐我都只係打咗「撰文:月巴氏」幾隻字。大鑊。
我諗我不應該揀這齣戲來寫,揀這麼一齣跟私人狀況(似乎)太有關聯的戲來寫。

回歸前後的情緒紀錄
我鍾意《女人心》、OK鍾意《胭脂扣》、極度迷戀《地下情》,但我又不認為自己是關錦鵬粉絲。
對比上述三齣,《愈快樂愈墮落》在很多方面都及不上——演員的演繹,某幾場戲的(突兀)處理——最嚴重肯定是邱淑貞和柯宇綸去離島玩嗰場,嘩,好似睇緊上世紀6、70年代的國語片(這形容絕對沒有踩低國語片的意味),那一刻的感覺就是——套戲明明唔係我拍,但身處戲院作為觀眾的我竟然會尷尬到搵窿捐,好奇怪。
但對比上述三齣我喜歡的關錦鵬電影,《愈快樂愈墮落》有著本身的獨特,電影紀錄了那段回歸前後的情緒,而且不像某些擺到明要紀錄時間的戲,當中不含任何政治事件或社會上大是大非的描述(唯一一場是吳君如開設的租碟舖裡,電視白描地播著鄧小平喪禮的報道),只是藉著一對住在天水圍名貴屋苑的中產夫婦(我唔sure佢哋是離地抑或是不離地),以及圍繞他們的幾個浮世男女,去作出一次宣洩。

在滿布密雲的青馬大橋,只能繼續向前
三個男人,都屈住好多嘢喺個心入面。處理方式不同。
1.陳錦鴻從來都冇諗過要宣洩,或有需要宣洩,他似乎有一種機能,把任何屈埋喺心的情緒,藉著日常生活排解。直至老婆死了,他才正式(在一個男人面前)崩潰,哭了。
2.曾志偉似乎已經過了需要宣洩心事的年紀,「我已經好耐冇鍾意人,亦冇打算再鍾意人」是他對外界的回應——問題是,堅的嗎?抑或純粹是他遇上的注定是不可能愛他的陳錦鴻?
3.柯宇綸,成套戲最後生、愛得最進取嗰個,但原來,佢先係最唔知自己想點嗰個。他在戲裡所作的大部分宣洩,都是假的,都是呃自己的掩飾;唯獨最後那一次,真的——而這一次真愛是真的宣洩,讓陳錦鴻明白了很多他過去根本不明白、或從來都冇諗過要去明白的事與物。
至於在成齣戲裡最懂得把情緒宣洩的邱淑貞,一人分飾兩角,但兩個角色都同樣是暫借的情人,或愛的替身。
有人永遠失去了愛的憑藉,有人對愛足不前,有人根本唔知(或扮唔知)自己愛的是哪個性別——作為大時代下的小人物,我們都迷惑,不知道自己真正身份,而既然連真正身份都不知,自然也不知道要作出甚麼相對應行為。
偏偏我們身處在電影中滿布密雲的青馬大橋,只能一直向前,停不下來。
其實不排除我睇錯晒成部戲。我不知道。
我知道的只是,佢睇完齣戲冇耐,就飛咗我。或許,佢才是(把電影和現實)睇得最通透的那一個。或許我應該問問佢意見,但我們沒有再聯絡了。
而且有理由相信,會直到死嗰日。
(原文刊於am730)

沒有留言:

發佈留言