身邊99%的人都在追睇《來自星星的你》——我冇。不是因為我與別不同，只是因為怕自己太沉溺而身陷其中。
先交代我不能接受的地方
基於《星星》熱，心血來潮想找一些同外星人有關的舊香港電影（其實以上兩句不存在必然因果關係）。最後發現，《星際鈍胎》only。
我本人的睇戲態度是，只要齣戲有一或兩點得我歡心，我是願意把全齣無條件接收的。
若以這標準審視《星際鈍胎》，是pass的；但問題是，得不到我歡心的地方又實在差得太離譜，為免大家中伏（而埋怨我），決定先把這些地方交代清楚。
1.我份人粗枝大葉，有時睇到一些場口與場口不銜接的戲，都冇乜所謂，但《星際鈍胎》某些場口的過渡，突兀到我以為自己隻DVD出了問題（我隻碟是趁那些優惠大酬賓時買的）。我嘗試合理化這尷尬情況：拍攝期間，主角伊雷因債務問題自行消失了一段時間，嚴重影響進度，可能因為咁，惟有改動劇本，加入一些原本不存在的場口……
2.那時候不少港產片都奉行「九本戲」法則。一部90分鐘電影，大致可斬成9份，每份10分鐘左右，每一份各有作用。《星際鈍胎》大致如此，一開始以一場交通意外交代幾個重要角色；然後分別以兩場戲，深化伊雷和鍾楚紅這兩個角色的個性和遭遇，並為之後劇情鋪路……問題是九本戲裡，充斥不少被過分拖長的戲和gag——明明追一條街便可以，偏偏要安排追足九條街；明明已經不好笑的gag，還被嚴重延伸，唉。
3.Gag。我自然不知道1983年買飛入場的觀眾笑唔笑得出，但對於2014年買碟睇的我來說，大部分都笑唔出——笑得出，純粹是因為演員的演繹方式，而同個gag本身無關。
4.我從來都不是棲息在道德高地的超級道德撒亞人，但也嫌電影對鍾楚紅（角色）的剝削，過火咗啲。
再交代我相當接受的地方
講完得不到我歡心的地方，輪到講得我歡心的。
伊雷——係人都知我超級鍾意睇伊雷做戲。他是（備受忽視的）超級演技派，搞笑自然OK嚴肅更加OK。其中一場，交代他突然感懷身世，悲從中來哭了出來，我是真的看見伊雷眼眶先盛載著淚，然後淚水太多，才緩慢地流下——但這一場戲明明是純for搞笑，我那一刻的心情，竟然因為伊雷的淚而搞到好複雜……講多句，他的角色叫做「伊電」。呢一嘢，我忍唔住笑咗出嚟。
鍾楚紅——她演的是一個超蠢 & 超靚的善良女子。超靚，一度令佢吃盡苦頭，也因為超靚，令佢先得到富二代垂青，繼而又搭上「白金升降機」成為超紅女星。至於超蠢，則反映在一條問題。富二代想娶佢，但要先過老竇嗰關，老竇問佢：「你係咪Virgin？」鍾楚紅想了想，問番人哋轉頭：「有冇貼士？」呢一嘢，我又忍唔住笑咗出嚟。
科幻——香港電影最弱的弱點。不知道這齣戲的緣起，是否要食當年的ET熱，但睇完成齣戲時我諗：其實就算整走晒那些飛船和科幻包裝，編劇們一樣有能力寫到一個keep到骨幹的故事出來喎。不過，總之，老闆就是要你去拍一齣科幻片嘛，咁咪科幻囉笨。片中真正科幻的元素，只有太空船模型和最後那一個太空船內部的景，撇除太空船外形實在太似《Star War》的千歲鷹，我認為，是絕對唔失禮的（配合埋導演章國明的鏡頭處理，效果OK）。而另一個更癲的科幻設計，來自最後伊雷 vs Final Boss——嗱嗱嗱Final Boss嗰把激光劍肯定係抄自《Star War》，伊雷嗰把呢就——絕對本土！因為可變成雙截激光棍！呢一嘢，我真係忍唔住笑咗出嚟。
最後，解題時間。「來自星星的……伏！」個「伏」字，絕對不明示或暗示這是一齣「伏片」，而是指涉著劇情的一個twist、Final Boss的一個詭計（一如以往，不劇透了），這詭計揭示了：社會上最陰濕最危險的人，往往就是那些坐擁知識和權力的人（傅柯：知識即權力）。神秘外星人未必可怕，但在現實社會高高在上指點江山的人，最要提防。
（原文刊於am730）
沒有留言:
發佈留言