識時務者為蠢人，升官發財指引

古語有云：咪做蠢人。

做一個叻的蠢人
所以在古代（即97前），兩間電視台都有製作節目以作配合：麗的（即後來的亞視），有為培育細路做醒目仔的《醒目仔時間》；TBB，也有為令大人叻啲的《叻人新世紀》。
但現在，曾努力培育醒目仔的亞視不獲續牌，而有份主持《叻人新世紀》的殿——堂級歌手李克勤，也似乎進入了另一個境界，選擇笠上（好難認佢唔出的）面具參加大陸歌唱比賽——Why一個出過咁多碟又叻震音的歌手仲要參加比賽？我諗唔通，我更諗唔通的是評判竟然認佢唔出……霎時間，我不知道參賽者叻啲定嗰班評判叻啲。
Anyway，作為家長，當然不希望自己子女蠢（過別人的子女），於是大家都迫子女參加呢樣報讀嗰樣，無非想佢哋醒啲叻啲……問題是，做叻人真的著數嗎？環顧今日香港蠢人遍布，當中不少蠢人更可以做高官、或甚麼發言人，月月如常獲取高（過你同我N倍的）人工——這難堪的事實叫我開始明白：醒目地做一個叻的蠢人，才是真正的才能。

月巴呈獻，子女智能測試指引
香港已進化至一個有規有矩的城市，而規矩，來自指引。沒有指引，好多人唔識生存。
為了讓關心子女發展的家長們自行評估子女智能，我參考了社會上的一些爭議性事件，再認真地做了一個測試指引；從指引中的選項，你大致可以預測子女智能水平，以及日後適合從事的行業。

1.語言題：試讓子女讀出「中國建築」，睇吓讀得流不流暢。
A.好流暢（冇錯，閣下子女語言能力係唔錯，但未來發展頂籠都只係唔錯）；
B.OK甩咳，又驚讀錯（閣下子女非庸才，應加倍培育）；
C.完全讀唔到（Yeah！閣下子女有望加入房署做高官！）

2.情景聯想題：圖中所見，有一個噴晒鼻血的女子以及一群警察，試讓子女想像究竟發生咗乜事。
A.天氣乾燥所以流鼻血（閣下子女完全欠缺想像力，建議俾佢睇多啲TBB劇）；
B.有人向女子施襲（太理所當然，偏偏香港已經沒有理所當然這回事，閣下子女在人生路途注定吃虧閉翳）；
C.女子以胸部襲警（WOW！閣下子女注定是司法界奇才！）

3.現實處理題（一）：某女學生由高處墮下，郁都唔郁，試讓子女描述該女學生身體狀況。
A.佢暈咗啫（閣下子女適合做訓導）；
B.佢行得嘅（閣下子女適合做副校長）；
C.不作任何描述而只管冷靜地尋求指引，總之大前提係千祈唔好打999（唔做校長簡直浪費，恭喜！）

4.現實處理題（二）：港大校委會會議進行期間有學生衝擊會場，假設閣下子女是與會者之一，會點做？
A.插水（有急智，但唔夠）；
B.插水並（似乎）暈倒（仲未夠囉）；
C.插水並（似乎）暈倒再高呼學生無法無天當然仲要call白車華麗轉身離場（完美！醫學界需要你！）

5.經濟題：高鐵估計（估咋）最終造價高達九百億，你的子女認為此項工程是：
A.黐線！（Sorry，閣下子女極有可能係黐線）；
B.洗濕咗個頭，都要起埋落去啦（識時務，但未夠）；
C.嘩有冇咁筍吖？（閣下子女對經濟發展睇法絕對宏觀！）

6.自由題（一）：媽咪買餸時消費意欲降低，原因是？
A.阿爸失業（答案太正路）；
B.百物騰貴（答咗等於冇答）；
C.創科局未能成立（咁都答得出！絕對適合加入建制派！）

7.自由題（二）：阿媽話你玩完啲玩具又試通處擺，你的解釋是？
A.懶囉（注定做廢青）；
B.等工人執得啦（唔錯，有前途）；
C.土地問題（以致居住空間不足，衍生冇地方擺玩具）——閣下子女不得不參選特首！

終極指引：但假如閣下子女在以上各題都揀C，你應該遠離佢多啲，因為佢喪過喪屍。

（交稿嗰刻尚未發生港大校委會插水事件，唉……惟有喺呢度加番。原文刊於am730）