2013年12月20日星期五

浪漫月巴睇舊戲(五十六):等食等屙等瞓等老等死以外的選擇






















那天跟同事C傾題目時講到梅艷芳,再講到《男歌女唱》。我說如無意外會寫這部戲,他表現得很詫異。

奔波勞碌的透明「五等人」 
2001年,梅艷芳共有四部戲上映:《鍾無艷》、《慌心假期》、《愛君如夢》、《男歌女唱》。
牌面最弱的一部肯定是《男歌女唱》。
1.導演是鄒凱光,當年的他只拍過幾部冇乜人記得的戲(但《青春援助交際》是一部頗不俗的異色作,有機會寫),其他三部呢,執導的是杜Sir、張之亮和劉偉強。
2.同梅艷芳做對手的是黃子華,即使早一年的《男親女愛》破盡收視紀錄,但那是電視界的事,同電影界可以完全無關,如果有關,《一蚊雞保鑣》票房唔會咁慘淡。反觀其他,《鍾無艷》有天后Sammi和當紮的張栢芝,《愛君如夢》仲有偉大的劉天王。
3.過去梅艷芳演的角色,總是先天上已經與眾不同,但她在《男歌女唱》的朱維德,與眾不同地好同——眾,是指塵世間的平凡眾生,是他也是你和我嗰一隻。
朱維德情況可能更嚴重。在前男友眼光獨到的評語中,她平庸,奔波勞碌;等食,等屙,等瞓,等老,等死,簡稱「五等人」——仲未完,冇人緣,冇朋友,冇希望。
是的,作為既平庸又奔波勞碌的表表者如我,即使每天都擺明在等食等屙等瞓等老等死(但好踏實地,我冇奢望過會等到一筆豐厚強積金),但返到公司,都仲會有同事願意撥冗同我嗲兩句,例如在引言出現的同事C,仲會同我傾題目傾梅艷芳,證明我未到一個透明人地步。
但朱維德是。在面積不算大、員工也不算多的office裡,作為資源部唯一代表而又很認真工作的她,完美地被同事當透明(梅艷芳在《男歌女唱》的演出總是有種突兀感,但這種突兀某程度又呼應著她本身的角色設定)。
黃子華的黃勁相反。置身每一個地方他總是最顯眼嗰位。但顯眼,不等同出類拔萃。

這其實是一部勵志片 
《男歌女唱》肯定是在動用《男親女愛》的剩餘價值,黃勁就像余樂天的失散兄弟,但《男歌女唱》的office戲只佔極小部分,所以當余樂天都仲需要扮做嘢時,黃勁的工作態度就是,不工作。
Office戲,只為了營造朱維德的太透明和黃勁的好顯眼。
真正重要場所是K場。一個讓我們曾經宣洩過痛快過悲哀過癲過劈過嘔過的場所。我們在跌跌撞撞日常生活中失去了的,便去K場搵番吧,搵的方式,就是引吭高歌那一首首別人的歌。朱維德也一樣,她的飲歌是陳百強的《等》,在等食等屙等瞓等老等死以外,還在等一個人。只是她有個病,不能對住人唱歌;所以即使她入圍了一個歌唱比賽,都不敢去唱。
而故事,就是描述黃勁,怎樣將活在透明人間的朱維德,育成為敢於面對人群的K歌之后。
講到尾,是一個等食等屙等瞓等老等死的平庸奔波勞碌透明人,學懂面對自己的人生歷程。
所以即使《男歌女唱》不是甚麼名導主理,也沒有天王助陣,更沒有超巨筆直,但我鍾意——朱維德的生命困局,好真實,這種真實是我他也是你和我都不得不面對,和務必解決的。
「唔好逃避,一於不理,話之人哋,面對自己。」——這是黃勁寄語朱維德的鼓勵。這一場,也是全部戲最精緻的一個設計。
還有,在今年TBB頒獎禮攞獎的田蕊妮和Benz雄也有份演出,而且都演得好出。即使攞到TBB頒的獎可能不算甚麼,但事實是,不少人都在努力,努力是一場時間的工夫,過程中你只有等,可能最終等到,亦可能乜都等唔到。
(原文刊於am730)

2 則留言:

  1. 今日tbb就播男歌女唱了,因最後一part先睇到,我見到唔算分別太大既梅姐同子華,但田蕊妮個濃妝,杜文澤既青澀睇得出係好耐之前既戲

    成日有個疑問,你寫野之前係咪要再睇一次先呢?唔係點解一套咁耐既戲可以記得咁多細節位?我自問睇戲好快唔記得,所以先寫blog等自己記得,如果其實只係我自己太無記性先會睇完唔記得,就當我無問過啦,哈

    回覆刪除
    回覆
    1. 最初幾篇冇,但而家一定會在寫之前先睇一次,一來真係唔記得,二來在事隔多年後的翻炒過程裡,總會睇到一啲以前睇唔到嘅嘢

      刪除