浪漫月巴睇舊戲（五十四）：做香港人從來都唔容易，仲好辛苦。

「做人，從來都唔容易。」
黃子華在棟篤笑咁講。我好記得呢句話但就硬係記唔起佢喺邊一個棟篤笑講（不是《兒童不宜》就是《越大鑊越快樂》）。

無論老友同事或上司，都知我是黃子華粉絲
基於種種外圍和內圍因素，我仲未睇過半集《My盛Lady》，反而分別翻炒了一次《一蚊雞保鑣》和《沙甸魚殺人事件》。對比截至2013年12月5日為止已經被我睇咗46次的《一蚊雞》，《沙甸魚》我只睇過兩次咁大把。
因為實在太down了。那年第一次睇，尚算青春，未算好體會到那份情緒，但已經OK down；很多年後，已經成為別人眼裡的中年阿叔了，對平凡人的所謂人生也總算有一點所謂體會了，再睇——Shit，down足好幾日。
好彩平生最耍家的就是對人歡笑背人down，所以完全冇人察覺到那幾天的我其實走在情緒下陷邊緣。
但也不排除：根本從來就冇人care。沙甸魚修為可能更高。是有人care佢，但沙甸魚根本不care有冇人care佢。
最能給予沙甸魚安全感的生活場所，是一個租回來的唐樓單位。在裡頭，沒有任何稱得上懶有品味的裝修擺設，只是擺滿了貨架，貨架上塞滿從超級市場買回來的壞貨，積穀防飢。這地方，純屬沙甸魚私人享有，連拍了N年拖的女朋友都（因為得不到批准而）冇嚟過。
把自己安然地困在單位內的沙甸魚，就像卡夫卡《地洞》裡那隻鼴鼠，又或《地下室手記》的那一個「我」——嗱嗱嗱我絕對不會干涉你們，但唔該你哋同時也不要干涉我。這就是他追求的完美生活。
但香港，可不是卡夫卡的寓言世界或杜斯妥也夫斯基的俄國地下室，你話想點就點，而且人，是要搵食的。
既然要搵食，就不得不同外界接觸——咁就大鑊了。

不確定的未來不設保險
這部戲你可以話好簡單亦可以話好似好複雜。我不懂得好簡單地處埋好似好複雜的事，惟有試用問答形式梳理。

Q：沙甸魚做盛行？
A：一個超市小職員，分行經理說要升佢職，佢唔想升，仲反建議不如升資歷比佢耐的珠姐，但分行經理堅拒。然後，沙甸魚偷聽到珠姐講佢是非，但幾日後又同佢慶祝生日。沙甸魚完全不能明白，一個明明之前才講完自己是非的人，點解會祝自己生日快樂。

Q：沙甸魚竟然有拖拍？
A：冇得解，比佢搵得多的女友仲俾埋首期，打算同佢結婚。睇樓期間，二人在那個新單位內情到濃時啜啜啜啜啜然後沙甸魚突然嗌停，用更澎湃的理性壓制澎湃的感性，因為冇帶杜蕾斯囉。當連處理女友這麼一個外在生命體已經需要動用咁大能量時，再面對一個突如其來的B？實在超出佢本人能力範圍。

Q：片名點解會叫「殺人事件」？
A：因為真係有人死咗。沙甸魚的包租婆。案發地點正是給多沙甸魚無比安全感的唐樓單位，但人不是沙甸魚殺的，麻煩在他不懂得怎樣跟外界解釋人不是他殺的。跟據沙甸魚對「證據」二字的理解，外界只會單憑表面證據然後一口咬定佢（應該）係殺人兇手。

Q：溫碧霞的角色是？
A：包租婆個女。她有一個成日做八卦雜誌封面人物的公子男友。她一直以為自己抓緊了命運和幸福，但原來公子男友覺得跟她（「合體」後）性格不合，用完即棄。

Q：咁廖啟智的角色呢？
A：差人。一個有幸被選為紙板警察作為推廣大使的差人。劇情安排他由頭到尾都在撚化沙甸魚，卒之撚化到沙甸魚作出終極反撲。還有一點，佢有高買習慣。

Q：這麼樣的故事可以點樣收科？
A：沙甸魚依然是沙甸魚而不是《的士司機》的Travis，爆了一句「做人好辛苦呀呀呀！」後，他準備跳樓，但冇死到，因為——不劇透了。最後，在溫碧霞帶領下，他把多年來為不確定的未來而儲備的罐頭，掟晒出街。這些在過去似乎為他生活提供保險的過期罐頭，他不再需要了。

這是1994年的一部戲。20年前沙甸魚話做人好辛苦，今天做人應該是超辛苦——即使由始至終都不是要做聖人偉人又或梁振英所講的甚麼人材，而不過是，普通人。因為塵世間根本冇一樣嘢可以永遠妥善保障普通人的未來，包括那些在YouTube牙斬斬話很想聽到你的意見（但這部影片的評論功能已停用）的高官們。

----------------
讀者更正番我，「做人，從來都唔容易。」應來自《冇炭用》，Thx！